II ASAPULO 9 - Embimbiliya - Bíblia Sagrada em Umbundu

¹ Nasoma ya Seva eci a yeva oluhimo lua Salomone, oco weya ko Yerusalãi oku u Dyika lapulilo a tĩla. Weya locikumba calua lolongamelo viambata olosimbolua, lulu wakahandangala, lovawe a tĩla. Eci eya ku Salomone, wo sapuila cosi ca kala vutima Waye.

² Leye Salomone wo tambulula kapulilo aye osi. Lacimue ca tangeleka Salomone okuti ka telele oku u ci lomboluila.

³ Nasoma ya Seva eci a mõla uvanga wosi wa Salomone, lonjo yina a tungile,

⁴ lokulia kuokomesa yaye, lokutumãla kuakuenje vaye, lokuvumba kuakulu vaye luwalo wavo, lavakuakopo yaye luwalo wavo, lovilumba viaye vioku pia elisi, vina a lumbaila vonjo ya Yehova, oco utima waye wa soya.

⁵ Oco wa popia la Soma hati, Ondaka yovilinga viove luvanga wove, yina nda yevela vofeka yange, yocili.

⁶ Haimo ame sia kolelele olondaka toke ndeya, kuenje ovaso ange a ci limuila. Tala, ndaño onepa yunene wuvanga wove ka ya sapuililue. Voluhimo nda ku yevela, wa pitahalamo.

⁷ Omanu vove va sumulũha. Akuenje vove va sumulũha, avandeti vakuakutalama kovaso ove loku yeva uvanga wove.

⁸ Yehova Suku yove u wa ku sanjukila, haeye wa ku tumbika kocalo caye ndosoma ya Yehova Suku yove, a sivayiwe. Omo Suku yove wa sola va Isareli ha va tumalisa otembo ka yi pui, oco a ku lingisila osoma hu tetulula lesunga.

⁹ Yu wa eca ku Soma ocita lakui avali kolotalendo viulu, kuenda olosimbolua viakahandangala lovawe a tĩla. Ka kua la kala olosimbolua ndevi Nasoma ya Seva a ihile Soma Salomone.

¹⁰ Kuenda vali akuenje va Hurama kumue lakuenje va Salomone, vana va nena ulu wokOfiri, va nenavo oviti vialimugi lovawe a tĩla.

¹¹ Oviti viaco vialimugi Soma wa tunga lavio olondondelo vionjo ya Yehova levi vionjo ya Soma, lolohalupa lotulialia tuolonjimbi. Ka kua la muiwa oviti ndovio vofeka ya Yuda.

¹² Soma Salomone wa iha Nasoma ya Seva cosi a yongola leci cosi a pinga, eci a nenelele Soma ci sule. Oco wa tiukila, kuenje wa enda kofeka yaye, eye kumue lakuenje vaye.

¹³ Kaliye, opesu yulu Salomone a tambula vunyamo, ya soka ovita epandu lakui epandu lepandu kolotalendo viulu,

¹⁴ kuenda vali owu wa nena nena vakuavitanda lovafũli. Olosoma viosi via Arabia lolombiali viofeka va nenavo ulu lopalata ku Salomone.

¹⁵ Soma Salomone wa tunga ovita vivali vioviyepelo vinene viulu wa tẽliwa. Ociyepelo lociyepelo ca tungiwa lovita epandu violosiekele viulu wa tẽliwa.

¹⁶ Wa tunga ovita vitatu vioviyepelo vikuavo viulu wa tẽliwa. Ociyepelo lociyepelo ca tungiwa lovita vitatu violosiekele viulu. Soma wa vi kapa vonjo yesisi lia Levanone.

¹⁷ Soma wa tungavo ocalo cinene lolombinga violonjamba, yu wa ci laña lulu wopululu.

¹⁸ Ocalo caco ca kala lolondondelo epandu, lociliatelo culu, ca lamelela kocalo, kuenda kondio lokepĩli ca kala lotuhuatelelo tuoku yeka ovoko. Konele yotuhuatelelo kua kala olohosi vivali via talama vilu.

¹⁹ Konele eyi lokonele oyo kolondondelo viaco epandu, kua kala olohosi ekui lavivali via talama vilu. Lakumue kusoma kua tungiwa ocalo ndeci.

²⁰ Ovikuata viosi vioku nyuila via Soma Salomone viulu, ndaño ovikuata viosi vionjo yesisi lia Levanone viulu wopululu. Koloneke via Salomone, opalata ka ya tendelue nda cimue ci silivila.

²¹ Momo olonaviyu via Soma via endaenda ko Tarsisi kumue lakuenje va Hurama. Vanyamo atatu olonaviyu via Tarsisi vieyaiya lumosi oku nena ulu, lopalata, lolombinga violonjamba, lolosima kuenda olonjila violo-pavão.

²² Oco kukuasi lokuvanga Soma Salomone wa velelepo olosoma viosi viokilu lieve.

²³ Olosoma viosi viokilu lieve va sanda ocipala ca Salomone ha va yevi uvanga waye una Suku a kapa vutima waye.

²⁴ Va nena omunu omunu ombanjaile yaye, ovikuata viopalata lovikuata viulu, lovowalo, lovimaleho, lolosimbolua, lotuvalu, lolomula ndulambu unyamo kunyamo.

²⁵ Salomone wa kala lolohũlũkãi vikuãla kovimanga viotuvalu lakãlu, lekui lavivali kolohũlũkãi viavakuakuendela kotuvalu. Wa va kapa vovaimbo akãlu kuenda vo Yerusalãi kumue la Soma.

²⁶ Wa viala olosoma viosi tunde kolui Ferati toke kofeka ya va Filisiti, lokolongave viEgito.

²⁷ Vo Yerusalãi Soma wa siatisa opalata ndovawe, kuenda ovinendele wa vi luisa ndoviti viakuyu vatapi.

²⁸ Otuvalu tua Salomone tua tunda tunda kEgito lokolofeka viosi.

²⁹ Ovilinga vikuavo via Salomone, evi viatete levi via sulako, ka via sonehelue he velivulu liasapulo uprofeto Natana, lovelivulu liocitumasuku ca Ahiya u Silo, lovelivulu liovinjoinjoi via Ido vina a muĩla Yerevoama, omõla a Nevata?

³⁰ Salomone wa viala anyamo akui akuãla kIsareli yosi, vo Yerusalãi.

³¹ Salomone wa pekela lolosekulu viaye, yu vo kenda vimbo lia isiaye Daviti. Kuenje omolaye Rehovama wa piñala komangu yaye.