II ASAPULO 8 - Embimbiliya - Bíblia Sagrada em Umbundu

¹ Vanyamo akui avali Salomone wa tunga onjo ya Yehova leyi yaye muẽle.

² Kovaso yaco, wa tumbulula ovaimbo ana Hurama a wihile, kuenje wa tumalisamo va Isareli.

³ Salomone wa katukila Hamati Sova yu wa yi yula.

⁴ Wa tunga Tadimore vekalasoko kuenda ovaimbo osi olosila ana a tungaila ko Hamati.

⁵ Wa tunga Bete Horone yokonano kuenda Bete Horone yokombuelo, hao ovaimbo a kolisua lovimbaka lolombundi lovisiakala.

⁶ Wa tungavo Baalata kuenda ovaimbo osi olosila, ana a Salomone, kuenda ovaimbo akãlu la-a akuatuvalu, la cosi Salomone a panga oku tunga ko Yerusalãi pamue ko Levanone pamue vali kolofeka viosi viuviali waye.

⁷ Omanu vosi vana ha va Isareliko, haivo va supile pova Hiti la va Amori la va Perisi la va Hiwi la va Yewusi,

⁸ omãla vavo vana va sialele vofeka haivo va Isareli ka va kunduile, Salomone wa va konga ha va lingi apika toke etaili lilo.

⁹ Puãi pu va Isareli, Salomone kopilepo apika vupange waye, puãi va kala vakuavita, vakesongo liaye, vakesongo liakãlu la vakuatuvalu.

¹⁰ Ava ovo asongui va kapelua la Soma Salomone oku tumila omanu; va soka ovita vivali lakui atãlo kasongui.

¹¹ Salomone wopa omõla a Fareo ukãi kimbo lia Daviti, yu wo nena konjo o tungilile, momo eye hati, Ukãi wange ka ka tumale vonjo ya Daviti, Soma ya Isareli, momo apa peya ocikasa covisila via Yehova pa kola.

¹² Oco Salomone wa lumbila Yehova ovilumba vioku pia elisi kutala wa Yehova, una a tungile kovaso yocindumba.

¹³ Wa lumba eci ca tukuilua eteke leteke, kuenda kasambata lokokumoleha kuosãi lokolofesta vitatu viunyamo, ndokuti ofesta yombolo ka yi kuete etumbisa, leyi yolosemana, leyi yolosinge, ndomo Mose a ci handelekele.

¹⁴ Ndocihandeleko ca isiaye Daviti, wa tumbikila ovisoko viovitunda upange wavo, kuenda wa kapela va Lewi ovikele viavo vioku tumbangiya Yehova loku vumba eteke keteke kovaso yovitunda. Wa kapavo kombundi lombundi ovisoko viavakualombundi, momo eci oco ca handelekele Daviti, omunu wa Suku.

¹⁵ Ovo ka va pambukile vocihandeleko ca sia Soma kovitunda loko va Lewi, ndaño kondaka yovokuasi, ndaño kolondaka viosi vikuavo.

¹⁶ Oco upange wosi wa Salomone wa malusuka, tunde eteke a seveta ociseveto conjo ya Yehova, toke ya pua. Kuenje onjo ya Yehova ya pua.

¹⁷ Noke Salomone wa enda kEciongevere lo kEloti, konele yokalunga, kofeka yEdome.

¹⁸ Kuenje Hurama wo tumisa lakuenje vaye olonaviyu, kumosi lakuenje vakuoloño wokalunga. Ovo va enda kOfiri kumue lakuenje va Salomone, oku kopako ovita vikuãla lakui atãlo kolotalendo viulu, kuenje va vi nena ku Soma Salomone.