II ASAPULO 7 - Embimbiliya - Bíblia Sagrada em Umbundu

¹ Eci Salomone a mala ohutililo yaye, ondalu ya tunda kilu, yu ya lia ocilumba coku pia elisi lovilumba vikuavo, kuenje ulamba wa Yehova wa yukisa onembele.

² Ovitunda ka via telele oku iñila vonjo ya Yehova, momo ulamba wa Yehova wa yukisa onjo ya Yehova.

³ Eci va Isareli vosi va mõla ondalu ya loka lulamba wa Yehova konembele, oco va petama, va tuvika ovipala viavo posi ya kundulua lovawe. Va fendela loku pandula Yehova, vati, Momo uwa, momo ohenda yaye ka yi pongoloka, yenda ño hu.

⁴ Oco Soma kumue lomanu vosi va lumba ovilumba kovaso a Yehova.

⁵ Soma Salomone wa lumba akui avali lavivali kolohũlũkãi violongombe kuenda ocita lakui avali kolohũlũkãi violomeme. Oco Soma kumue lomanu vosi va tumbika onjo ya Suku.

⁶ Ovitunda via talama polomangu viavo. Va Lewi lavo le va talama lovisikilo vioku sikila Yehova, vina Soma Daviti a pangelele oku panduila Yehova, olonjanja viosi eci Daviti a sivaya lokusika kuavo, momo ohenda yaye ka yi pongoloka yenda ño hu. Ovitunda via lisuñama lavo kuenje via sika olombeta. Va Isareli vosi va talama vilu.

⁷ Salomone wa kolisa onepa yopokati la kati kocitali, cina ca kala kovaso yonjo ya Yehova, momo oko a lumbila ocilumba coku pia elisi lulela wovilumba viombembua, momo kutala wosipi una wa tungile Salomone, ovilumba vioku pia elisi lovilumba violomema lulela, ka via suileko.

⁸ Koloneke viaco, Salomone wa linga ofesta yoloneke epanduvali kumue la Isareli yosi. Owiñi wakahandangala wa tundile tunde ko Hamati toke kolui luEgito.

⁹ Keteke liecelala va linga ohongele yinene, momo etumbiko liutala va li linga oloneke epanduvali kuenda ofesta oloneke epanduvali.

¹⁰ Keteke liakui avali latatu liosãi yepanduvali, wa sandowaila omanu kolombalaka viavo, lovo va sanjuka lutima we yuka onjolela. Va sanjukila esumuluho Yehova a muisa Daviti la Salomone lomanu vaye va Isareli.

¹¹ Oco Salomone wa malusula onjo ya Yehova lonjo ya Soma. Cosi Salomone a simile vutima waye oku ci linga vonjo ya Yehova lovonjo yaye muẽle cosi muẽle wa ci suisapo.

¹² Oco kuteke Yehova wa tukulukila Salomone, wa popia laye hati, Nda yeva ohutililo yove, kuenje nda linolela ocitumãlo cilo ndonjo yocilumba.

¹³ Nda ndondisa ilu okuti ka li eci ombela pamue nda numa olohuma ha vi kundula ofeka, pamue numa efengi pokati komanu vange,

¹⁴ oco omanu vange, vana va tukuiwa londuko yange, nda va liketisa loku likutilila kuenda nda va sanda ocipala cange loku tinduka kolonjila viavo vivi, oco ame kilu njevako, kuenje ngecela ekandu liavo, ñayisa ofeka yavo.

¹⁵ Kaliye ovaso ange a vanja, lovatui ange a yevelela kohutililo yovocitumãlo cilo.

¹⁶ Momo kaliye nda nola onjo yilo, nda yi kolisa, onduko yange ha yi kalamo otembo ka yi pui. Ovaso ange lutima wange vi kalamo ño hu.

¹⁷ Love nda wendaila kovaso ange ndeci ca endaile so Daviti, hu lingi cosi nda ku handeleka, loku lava ovisila viange loviholo viange,

¹⁸ oco ame ñolisa ño hu ocalo cusoma wove, ndeci nda lisila la so Daviti; siti, Ka ku ku kambela kapiñala o viala Isareli.

¹⁹ Puãi nda vu pambuka loku yanduluka ovisila viange lovihandeleko viange vina ndo kapeli kovaso ene, kuenje wendi loku vumba olosuku vikuavo loku vi fendela,

²⁰ ndu veyuli vofeka yina nda wihi. Kuenje onjo nda kolisila onduko yange, ndi yi takumula kovaso ange, ndi yi linga ndolusapo kuenda ndepembe pokati kolofeka viosi.

²¹ Kuenda konjo yilo ya kemala ndeti, wosi o pitako o ka komoha, hati, Nye Yehova a lingila ndoco lofeka yilo, lonjo yilo?

²² Kuenje va ka tambulula vati, Omo va yanduluka Yehova Suku yolosekulu viavo una wa vopile kofeka yEgito, kuenje va kakatela olosuku vikuavo, va vi fendela loku vi vumba, oco eye a va muisila ohali eyi yosi.