II ASAPULO 6 - Embimbiliya - Bíblia Sagrada em Umbundu

¹ Oco Salomone wa popia hati, Yehova hati, Nda panga oku tumãla vowelema wowi!

² Nda ku tungila onjo yoku tumalamo. Nda ku tungila ocitumãlo hu kalamo otembo ka yi pui.

³ Soma wa pukukako, kuenje wa sumuluisa ohongele yosi ya Isareli, oco ohongele yosi ya Isareli ya talama vilu.

⁴ Eye wa popia hati, Yehova Suka ya Isareli a sivayiwe, una wa popia lomẽla waye la tate Daviti, loku ci lemulula leka liaye, hati,

⁵ Tunde apa ndopa omanu vange va Isareli kofeka yEgito, povapata osi a Isareli, lalimue imbo nda nolapo ha li tungi onjo, onduko yange ha yi kalamo; kuenda lomue omunu nda nola ha lingi osoma yomanu vange va Isareli.

⁶ Puãi nda nola Yerusalãi, onduko yange ha yi kalamo; kuenda nda nola Daviti ha viala omanu vange va Isareli.

⁷ Tate Daviti wa kala lutima woku tungila onduko ya Yehova Suku ya Isareli onjo.

⁸ Puãi Yehova wa popia la tate Daviti, hati, Omo vutima wove mua kala ocisimilo coku tungila onduko yange onjo, wa linga ciwa oku kala lutima waco.

⁹ Haimo lumue ku tungi onjo, puãi omolove o tunda koviongo viove, eye o tungila onduko yange onjo.

¹⁰ Yehova wa kolisa ondaka yaye yina a popele, nda piñala komangu ya tate Daviti, nda tumãla kocalo ca Isareli, ndeci Yehova a likuminyile, kuenje nda tungila onduko ya Yehova Suku ya Isareli onjo.

¹¹ Haimo nda kapa ocikasa muna mu kasi ocisila ca Yehova, cina a lisilile la va Isareli.

¹² Oco Salomone wa talama vilu kovaso yutala wa Yehova, kovaso yohongele yosi ya Isareli, yu wolõla ovoko aye.

¹³ Salomone wa tungile ocimbulumbumba cosipi. Okulepa kuaco kua soka ovikeya vitãlo, upati waco ovikeya vitãlo, lusovi ovikeya vitatu. Wa ci kapele vokati kocitali, kuenje wa talama kilu liaco, Noke wa kekama kolongolo viaye kovaso ohongele yosi ya Isareli, yu woluĩla ovoko aye vilu,

¹⁴ kuenje hati, A Yehova Suku ya Isareli, ndaño kilu ndaño posi ka kuli Suku wa lisoka love, wukuakulava ocisila haive wukuahenda ka yi pongoloka lovakuenje vove vana va endaila kovaso ove lutima wavo wosi.

¹⁵ Wa telisila ukuenje wove, tate Daviti, eci wo likuminyile; ocili ove wa popia lomẽla wove kuenje wa ci lemulula leka liove, ndomo ci kasi etaili lilo.

¹⁶ Kaliye a Yehova, Suku ya Isareli, telisila ukuenje wove tate Daviti, eci wo likuminya, huti, Kovaso ange, ku kambi kapiñala o tumãla kocalo ca Isareli, nda omãla vove va lunguka vonjila yavo loku endaila vovihandeleko viange, ndeci ove wa endaila kovaso ange.

¹⁷ Kaliye a Yehova, Suku ya Isareli, ondaka yove yina wa popia lukuenje wove Daviti yi telisiwe.

¹⁸ Puãi ocili Suku o tava hẽ oku tunga kilu lieve? Ota, vilu, lovilu liovailu ku suimo! Oco hẽ, vonjo eyi nda ku tungila o suamo ndati?

¹⁹ Haimo a Yehova Suku yange, tava kohutililo yukuenje wove lokelombelo liaye, yevelela kevilikiyo lokohutililo yina ukuenje wove a likutilila kovaso ove.

²⁰ Ovaso ove a vanje konjo yilo utanya luteke, a vanje vocitumãlo eci wa likuminyile oku kapamo onduko yove, oco o yevelele kohutililo yukuenje wove a likutilila vonjo yilo.

²¹ Yevelela kelombelo liukuenje wove leli liomanu vove va Isareli, eci va likutilila loku imba ovaso konjo yilo. Kocitumãlo cove kilu, tava oku yeva, kuenje eci o yevako, ecela.

²² Nda omunu umue o lueyela ukuavo kuenda vo kisika oku lisinga kuenje iya loku lisingila kovaso yutala wove vonjo yilo,

²³ oco ove kilu, yevelela, linga kuenda tetuluila akuenje vove, loku pisa ondingaĩvi, ovilinga viaye vivi ha vi wila kutue waye muẽle, puãi yowisa ukuesunga loku u muisa onima yesunga liaye.

²⁴ Nda omanu vove va Isareli va kupuilua kovaso unyali, momo va ku lueyela, kuenje nda va kondokela kokuove loku limbuka onduko yove, loku likutilila loku lomba kokuove vonjo yilo,

²⁵ oco ove, kilu, yevelela kuenda ecela ekandu liomanu vove va Isareli, va tiuwiya vali kofeka yina wa ecele kokuavo lokolosekulu viavo.

²⁶ Eci ilu lia londa, kuenje ka kuli ombela, momo va ku lueyela, nda va likutilila loku imba ovaso konjo yilo loku limbuka onduko yove ha va kondoka kekandu liavo, eci ove o va yambula,

²⁷ oco ove, kilu, yevelela, ecela ekandu liakuenje vove leli liomanu vove va Isareli, eci o va longisa onjila yiwa muna va sesamela oku endela, kuenda lokisa ombela vofeka yove, yina wa ecele ndocipiñalo komanu vove.

²⁸ Nda vofeka muiya elambu, lefengi, locikakula pamue ovikũla viovuka, pamue kuiya olohuma lovimbonde; nda ovanyali vavo va va ñualela ocingonja vovaimbo avo; nda kuiya ekundu limue pamue uvei umue;

²⁹ kuenje nda omunu umue pamue omanu vove vosi va Isareli va likutilila ohutililo yimue loku lomba elombelo limue, omunu omunu loku kuliha ohali yaye muẽle lesumuo liaye muẽle, loku oluĩla ovoko konjo yilo;

³⁰ oco ove, kilu, kocitumãlo cove, yevelela, ecela, kuenje muisa omunu omunu eci ca sesamela olonjila viaye viosi, momo ove wa kuliha utima waye. Momo ove, ove lika, wa kuliha ovitima viomala vomanu.

³¹ Oco ovo va ku sumbe loku endaila volonjila viove oloneke viosi va tumãla vofeka yina wa ecele kolosekulu vietu.

³² Kuenda vali ukombe una ka tiamela komanu vove va Isareli, eci a tunda kofeka yocipãla mekonda lionduko yove leka liove lia pama lokuoko kuove kuolõha, eci eya ha likutilila loku imba ovaso konjo yilo,

³³ ove, kilu, kocitumãlo cove, yevelela, kuenje cosi ukombe waco a ku pinga, u ciha. Oco omanu vosi vokilu lieve va kulihe onduko yove ha va ku sumbi ndeci ca ku sumba omanu vove va Isareli, loku kuliha okuti onjo yilo nda tunga, yi tukuiwa londuko yove.

³⁴ Nda omanu vove va tunda oku yaka lovanyali vavo, loku kuama onjila wa va handeleka kuenje va likutilila kokuove loku imba ovaso avo kimbo lina ove wa nola lokonjo nda tungila onduko yove,

³⁵ oco ove, kilu, yeva kohutililo yavo lokelombelo liavo, kuenje va tundila olunda.

³⁶ Nda va ku lueyela, momo ka kuli omunu ka lueya, kuenje ove o va temela loku va eca kunyali, ha endi lavo kumandekua vofeka yimue, nda ocipãla nda ocipepi,

³⁷ haimo nda vofeka yumandekua wavo va litiukamo, ha va pongoloka loku lomba kokuove, vofeka yumandekua wavo, ha vati, Tua linga ekandu, tua lueya, tua linga emande;

³⁸ nda va kondokela kokuove lutima wavo wosi lomuenyo wavo wosi vofeka yumandekua wavo, kuna va tualelue umandekua, kuenje nda va likutilila loku imba ovaso kofeka yavo yina wa ecele kolosekulu viavo, lokimbo lina wa nola, lokonjo nda tungila onduko yove;

³⁹ oco ove, kilu, kocitumãlo cove, yeva kohutililo yavo lokalombelo avo. Va tundila olunda, ecela omanu vove va ku lueyela.

⁴⁰ Kaliye, a Suku yange, ovaso ove a patuluke, lovatui ove a yevelele kohutililo yovocitumaĩo cilo.

⁴¹ Kaliye, a Yehova Suku, votoka, iñila vocipuyukilo cove, ove locikasa cunene wove. Ovitunda viove vi paleke eyovo, olosandu viove vi sanjukile uwa.

⁴² A Yehova Suku, ku ka tutuiye ombuavekua yove. Ivaluka ohenda yove ka yi pongoloka kukuenje wove Daviti.