II ASAPULO 5 - Embimbiliya - Bíblia Sagrada em Umbundu

¹ Oco upange wosi Soma Salomone a lingila onjo ya Yehova wa pua. Salomone wa nenamo ovina isiaye Daviti a tumbikile, opalata lulu lovikuata viosi kuenje wa vi soleka vovokuasi onjo ya Suku.

² Oco Salomone wongoluila vo Yerusalãi akulu va Isareli lasongui vosi vapata, lolombuale viapata a va Isareli, ha va kopa ocikasa covisila via Yehova kimbo lia Daviti, hailio Siono.

³ Alume vosi va Isareli va liongoluila ku Soma Salomone, kofesta yosãi yepanduvali.

⁴ Akulu vosi va Isareli veya kuenje va Lewi va yelula ocikasa.

⁵ Kuenje va nena ocikasa lombalaka yoku ñualehela la Yehova lovikuata viosi vi kola, vina via kala vombalaka. Ovitunda la va Lewi ovo va vi nena.

⁶ Soma Salomone wa kala kovaso yocikasa, kumue lohongele yosi ya Isareli yo liongoluila. Va lumba olomeme lolongombe vialua, oku vi tenda ka ca telelue.

⁷ Oco ovitunda via nena ocikasa covisila via Yehova vocitumãlo caco, vocitumãlo ci kola conjo, vohondo yi kola koku kola, vemi liavava a vakeruvi.

⁸ Vakeruvi va nyanyumuĩla avava avo kilu liocitumãlo cocikasa, kuenda vakeruvi va sikilila ocikasa kumue lolomuangaluwa viaco.

⁹ Olomuangaluwa viocikasa, omo via lepa calua, olosungu viavio via molehela vohondo yi kola, kovaso yocitumãlo ci kola. Puãi posamua ka via molẽhele. Kuenje haimo vi li toke etaili lilo.

¹⁰ Vocikasa caco ka mua kaile cimue cikuavo, te lika ovawe avali ana Mose a kapelemo ko Horeve, cina Yehova a lisila ocisila la va Isareli, eci va tunda kEgito.

¹¹ Kaliye, eci ovitunda via tunda kohondo yi kola, omo ovitunda viosi vina via kalapo via likolisile kuenda ka via litepele kovisoko,

¹² olonjimbi viosi via va Lewi, Asafe la Hemani la Yedutunu lomãla vavo, lavangandiavo, va wala ovalatanya; va talama layundu lovisumba lolohalupa konele yutundilo wutala, kumue locita lakui avali kovitunda vakuakusika olombeta;

¹³ eci vakuakusika olombeta lolonjimbi va katuila pamosi ocisungo coku sivaya loku pandula Yehova, leci ocisungo ca totãla kumue lolombeta layundu lovisikilo vikuavo, kuenje va sivaya Yehova vati, Momo uwa, momo ohenda yaye ka yi pongoloka yenda ño hu, oco onjo, onjo ya Yehova, ye yuka lelende.

¹⁴ Kuenje ovitunda ka via telele oku kalamo loku linga upange, omo mua kala elende, lomo ulamba wa Yehova wa yukisa onjo ya Suku.