II ASAPULO 36 - Embimbiliya - Bíblia Sagrada em Umbundu

¹ Omanu vofeka va vialeka Yehoahasi, omõla a Yosiya, vo piñalisa komangu ya isiaye, vo Yerusalãi.

² Yehoahasi eci a fetika oku viala wa kala lanyamo akui avali la atatu, kuenje wa viala olosãi vitatu vo Yerusalãi.

³ Soma yEgito wa wupa komangu yaye ko Yerusalãi, kuenje wa kisika ofeka ulambu wocita colotalendo viopalata lotalendo yulu.

⁴ Soma yEgito wa vialeka manjaye Eliakimi ha lingi Soma ya Yuda la Yerusalãi. Onduko yaye wa yi pongolola Yehoyakimi. Puãi huvaye Yehoahasi, Neko wo kuata kuenje wo tuala kEgito.

⁵ Yehoyakimi eci a fetika oku viala wa kala lanyamo akui avali la akuala kuenje wa viala anyamo ekui lamosi vo Yerusalãi. Wa lingainga eci cĩvi kovaso a Yehova Suku yaye.

⁶ Nevukandesa Soma ya Bavulono wo katukila, yu wo kuta lalienge ho tuala ko Bavulono.

⁷ Nevukandesa wa tualavo ko Bavulono onepa yovikuata vionjo ya Yehova, wa vi kapa veyemba liaye ko Bavulono.

⁸ Ovilinga vikuavo via Yehoyakimi, lovombondo osi a linga, luvi wa sangiwa vonulo yaye, tala, via sonehiwa velivulu liolosoma via Isareli la yuda. Omolaye Yehoyakini wa piñala komangu yaye.

⁹ Yehoyakini eci a fetika oku viala wa kala lanyamo ecelala, kuenje wa viala olosãi vitatu koloneke ekui vo Yerusalãi. Wa linga eci cĩvi kovaso a Yehova.

¹⁰ Pokuca kuolombela, Soma Nevukandesa wa tuma oku wupa, yu vo tuala ko Bavulono kumue lovikuata via tĩla vionjo ya Yehova. Wa vialeka huvaye Sedekiya ha lingi Soma ya Yuda la Yerusalãi.

¹¹ Sedekiya eci a fetika oku viala wa kala lanyamo akuĩ avali lamosi, kuenje wa viala ko Yerusalãi anyamo ekui lamosi.

¹² Eye wa lingainga eci civi kovaso a Yehova Suku yaye. Ka liketisile kovaso uprofeto Yeremiya, una wa popia olondaka via tunda vomela wa Yehova.

¹³ Wa ñualelapo Soma Nevukadesa, una wo kisikile oku lisinga la Suku; wa ngangavalisa osingo yaye kuenje wa sivisa utima waye oco ka ka pongolokele ku Yehova, Suku ya Isareli.

¹⁴ Kuenda vali asongui vosi vovitunda, lomanu le va lueya cakahandangala, loku linga umbondo wosi wavakualofeka. Va vihisa onjo ya Yehova, yina a yi kolisile ko Yerusalãi.

¹⁵ Yehova Suka yolosekulu viavo, ka liwekele oku va tumaisa olomunga viaye, momo wa kala lohenda lomanu vaye locitumãlo caye.

¹⁶ Puãi ovo va fuanguila olomunga via Suku, va sepula olondaka viaye, loku yola epembe ovaprofeto vaye, toke onyeño ya Yehova ya wengukila omanu vaye, toke ka kua kaile vali ekayo.

¹⁷ Oco wa va katuila Soma ya va Kaldea, leye wa ipa amalehe vavo losipata, vonjo yocitumãlo cavo ci kola; kuenda lomue a kuatela ohenda ci kale ukuenje lufeko, ci kale osekulu lekongo. Vosi wa va eca povaka aye.

¹⁸ Kuenje ovikuata viosi vionjo ya Suku, evi vinene levi vitito, lovokuasi onjo ya Yehova, lovokuasi a Soma la a olombuale viaye, cosi wa enda laco ko Bavulono.

¹⁹ Va yoka onjo ya Suku, va kupula ocimbaka ca Yerusalãi, kuenje ayemba aco osi va a imba ondalu, loku nyõla ovikuata viosi via tĩla.

²⁰ Kuenda ava va puluka kosipata, wa enda lavo ko Bavulono kuenje va linga apika vaye kuenda vomãla vaye, toke koloneke viuviali wa Persia,

²¹ oku lemulula ondaka ya popia Yehova lomela wa Yeremiya, toke ofeka ya kuata asambata ayo, momo ya puyuka oloneke viosi ya kala elunda, toke ca tela anyamo akui epanduvali.

²² Kaliye, okutẽlisa ondaka ya popia Yehova lomela wa Yeremiya oco kunyamo wa tete wa Kuro, Soma ya Persia, Yehova wa tuñunya utima wa Kuro, Soma ya Persia, ha imbi oluiya kusoma waye wosi, loku lu soneha ndomo:

²³ Ca popia Kuro, Soma ya Persia, ceci, hati, Yehova Suku yokilu, wa nyiha ovosoma osi okilu lieve. Haeye wa ñundika oku u tungila onjo ko Yerusalãi yoko Yuda. U wosi pokati kene o tiamẽla komanu vaye, Yehova Suku yaye a kale kumue laye, kuenda a lamaneleko.