II ASAPULO 35 - Embimbiliya - Bíblia Sagrada em Umbundu

¹ Yosiya wa lingila Yehova o Pascoa ko Yerusalãi. Va ipa o Pascoa keteke liekui lakuãla liosãi yatete.

² Wa kapa ovitunda kovikele viavo, yu wa va kolisa ha va lingi upange wonjo ya Yehova.

³ Wa popia la va Lewi vana va longisa Isareli yosi, havio va kola ku Yehova, hati, Kapi ocikasa ci kola vonjo yina ya tungile Salomone, omõla a Daviti, Soma ya Isareli. Ko ka cambati vali kovitai viene. Kaliye vumbi Yehova Suku yene lomanu vaye va Isareli.

⁴ Liangiliyi ndapata olosekulu viene, ocisoko locisoko, ndeci ca soneha Daviti, Soma ya Isareli, kuenda ndeci ca soneha Salomone omolaye.

⁵ Talami vocitumãlo ci kola kumosi lovisoko viapata avamanjene omanu vofeka, ocisoko locisoko ci talame la vamue vakuapata a va Lewi.

⁶ Ipayi o Pascoa, liyelisi kuenda angiliyiliko vamanjene, ho lingi ndondaka ya Yehova ya sonehiwa la Mose.

⁷ Oco Yosiya wa kuata kocunda caye akui atatu kolohulukãi viotumeme lotuhombo, yu wa vi eca komanu vofeka, vana va kalapo, viosi ha vi lingi ovilumba vio Pascoa. Wa ecavo olohũlũkãi vitatu violonui. Evi viosi via tunda kovipako via Soma.

⁸ Olombuale viaye via pangavo oku eca komanu lokovitunda loko va Lewi. Hilikiya la Sakariya la Yehiyele, asongui vonjo ya Suku, va eca kovitunda olohũlũkãi vivali lovita epandu viotumeme lotuhombo, lovita vitatu violongombe, ha vi lingi ovilumba vio Pascoa.

⁹ Konaniya leyevo, lavamanjaye Semaya la Netanele kuenda Hasiaviya la Yeyele la Yosavada, akulu va va Lewi, va eca ku va Lewi olohũlũkãi vitãlo viotumeme lotuhombo, lovita vitãlo violongombe.

¹⁰ Oco upange wa sokiyiwa kuenje ovitunda via talama pomangu yavio la va Lewi le kovisoko viavo, ndocihandeleko ca Soma.

¹¹ Va ipa o Pascoa, kuenje ovitunda via nyila osonde, yina va tambula peka lia va Lewi, osimbu va Lewi va yuva.

¹² Ovilumba vioku pia elisi va vi likapela oco va vi ece kovisoko viapata omanu vofeka, ha va vi lumbila Yehova ndomo ca sonehiwa velivulu lia Mose. Haico va linga lolongombe.

¹³ Va yoka okameme ko Pascoa vondalu, ndomo ca handelekiwa. Puãi ovilumba vi kola va vi teleka volombia viaño lovolombia vinene kuenda vovisanja, yu va vi tuala lombili komanu vosi.

¹⁴ Noke va pongiya eci cavo leci covitunda momo ovitunda, omãla va Arone, toke kuteke va sakalala loku lumba ovilumba vioku pia elisi kumosi lulela. Oco va Lewi va pongiya cavo leci covitunda omãla va Arone.

¹⁵ Olonjimbi va Asafe va talama pomangu yavo, ndocihandeleko ca Daviti la Asafe la Hemani la Yedutunu, ukuavitumasuku velombe lia Soma. Vakualombundi va lendela kolombundi viosi, ovo ka ca sukilile oku tunda tunda kupange, momo vangandiavo va Lewi va va pongiyilako.

¹⁶ Oco upange wosi wa Yehova woku lia o Pascoa loku lumba ovilumba vioku pia elisi kutala wa Yehova, wa sokiyiwa keteke liaco, ndocihandeleko ca Soma Yosiya.

¹⁷ Va Isareli vana va kalako, va lia o Pascoa kotembo yaco, kuenda voloneke epanduvali va lia ofesta yolombolo ka vi kuete etumbisa

¹⁸ Tunde koloneke viuprofeto Samuele, kIsareli ka kua la kala o Pascoa ndeyi, kuenda layimue polosoma via Isareli ya lingile o Pascoa ndeyi ya linga Yosiya kumue lovitunda la va Lewi la Yuda yosi, la va Isareli vana va kalapo, lolonungi via Yerusalãi.

¹⁹ O Pascoa eyindeti ya lingiwa kunyamo wekui lecelala wusoma wa Yosiya.

²⁰ Kovaso yovina evi, eci Yosiya a tumbulula onembele, oco Neko, Soma yEgito, wa tundu oku liyaka la Karikemise, kolui Ferati. Kuenje Yosiya wo tundila.

²¹ Puãi eye wo tumisa olomunga, hati, Ove lame, tu likuetele nye, a Soma ya Yuda? Haveko nda ku katukila etaili, puãi nda katukila epata lina ñasi oku liyaka lalio. Kuenda Suku wa numa oku yayulako, oco liweka oku tamalala la Suku una o kasi lame sanga o ku nyõla.

²² Haimo lumue Yosiya ka tavele oku tiukako, puãi wa liviaviaiya ha yaki laye. Ka yevele kolondaka via Neko, via tunda vomela wa Suku, kuenje wa iñila vocilunga ketapi lia Megido.

²³ Vakualohonji vasa Soma Yosiya, kuenje Soma wa popia lakuenje vaye, hati, Kulo njupiko, momo nda valuiwa cimue.

²⁴ Oco akuenje vaye va wupa vekalu, yu vo kapa vekalu liaye liavali, kuenje vo tuala ko Yerusalãi. Wa fa, yu vo kenda vayambo olosekulu viaye. Yuda yosi la Yerusalãi va lila Yosiya.

²⁵ Yeremiya wa sovola ocisungo coku lila Yosiya, kuenda olonjimbi viosi vialume lolonjimbi viakãi, va tukola Yosiya pokulila kuavo, toke etaili lilo. Va ci linga ociholo kIsareli, kuenje ca sonehiwa velivulu liovisungo vioku lila.

²⁶ Ovilinga vikuavo via Yosiya, lovilinga viaye viwa vina via likuata leci ca sonehiwa vovihandeleko via Yehova,

²⁷ ovilinga viaye viatete levi via sulako, tala viosi via sonehiwa velivulu liolosoma via Isareli la Yuda.