II ASAPULO 34 - Embimbiliya - Bíblia Sagrada em Umbundu

¹ Yosiya eci a fetika oku viala wa kala lanyamo ecelala. Wa viala ko Yerusalãi anyamo akui atatu lamosi.

² Wa linga eci ca sunguluka kovaso a Yehova kuenda wa endaila volonjila via isiaye Daviti, ka pambukilile kondio ndaño kepĩli.

³ Kunyamo wecelala wusoma waye, osimbu a kala handi umalehe, oco a fetika oku sandiliya Suku ya isiaye Daviti; kuenje kunyamo wekui la vali we fetika oku upako olonumbuko la Asera loviteka via songiwa loviteka via itilua, ha yelisa Yuda la Yerusalãi.

⁴ Ovotala a Baale va a leñuila kovaso aye, kuenda ovotala insensu ana a kala kilu liaco wa a lundula. Asera loviteka via songiwa levi via itilua, wa vi nyanyola loku vi keleketa, kuenje oneketela yavio wa yi peselela kayambo a vana va vi lumbalaile.

⁵ Akepa ovitunda wa a yokela kovotala avo, oco wa yelisa Yuda la Yerusalãi.

⁶ Kovaimbo a Manase la Efarimi la Simeone, toke ko Nafitali, pokati kalunda ao, eye wa leñula ovotala,

⁷ wa keleketa Asera loviteka via songiwa loku lundula ovotala insensu vofeka yosi ya Isareli. Noke wa tiukila ko Yerusalãi.

⁸ Kaliye kunyamo wekui lecelala wusoma waye, eci a yelisa ofeka kuenda onjo, oco wa tuma Siafane omõla a Asaliya, la Maaseya ombiali yimbo, kuenda Yowa, omõla a Yowahasa, oku tumbulula onjo ya Yehova Suku yaye.

⁹ Oco veya kocitunda cinene Hilikiya, kuenje va eca olombongo via nenelue vonjo ya Suku, vina va Lewi vakualombundi va pomuile ko Manase lokEfarimi lokocisupe cosi ca Isareli, loko Yuda yosi la Benjamini kuenda kolonungi via Yerusalãi.

¹⁰ Yu va vi eca povaka olondingupange via songuila upange vonjo ya Yehova, kuenje olondingupange vina via kala loku talavayavonjo ya Yehova, via semũlula kuenda via tumbulula lavio onjo.

¹¹ Va vi eca kolokalupindelu lokovakuakutunga ha va landi lavio ovawe a songiwa loviti viatokekelo levi vioku linga olohangalo violonjo vina olosoma via Yuda via nyolele.

¹² Oco alume va linga upange lutate walua. Asongui vavo vava: Yahate la Ovadiya, va Lewi vopo va Merari, kuenda Sakariya la Mesiulama vopo va Kohata, ovo va vetiya upange. Va Lewi, vosi vana va kala luloño woku sika ovisikilo,

¹³ va linga asongui volongamba, haivo va songuila vosi va talavaya kovopange aiñi aiñi. Vamue pova Lewi va kala asonehi lasongui la vakualombundi.

¹⁴ Eci vopa olombongo via nenelue vonjo ya Yehova, oco ocitunda Hilikiya wa sanga elivulu liovihandeleko via Yehova, via ecele Mose.

¹⁵ Hilikiya wa popia la Siafane, usonehi, hati, Nda sanga elivulu liovihandeleko vonjo ya Yehova. Hilikiya wa eca elivulu ku Siafane.

¹⁶ Siafane wa nena elivulu ku Soma, kuenda vali wa sapuila Soma hati, Cosi ca kundikilue akuenje vove, ovo va kasi loku ci linga.

¹⁷ Olombongo vina via kala vonjo ya Yehova, va vi sukumulamo, yu va vi eca povaka asongui vupange lopovaka olondingupange.

¹⁸ Siafane, usonehi, wa sapuila Soma hati, Ocitunda Hilikiya wa nyiha elivulu. Oco Siafane wa li tangela kovaso a Soma.

¹⁹ Eci Soma a yeva olondaka viovihandeleko, wa tola uwalo waye.

²⁰ Soma wa tuma Hilikiya, la Ahikama omõla a Siafane, la Avidone omõla a Mika, la Siafane, usonehi, la Asara, ukuenje wa Soma, wa popia lavo hati,

²¹ Kuendi, ka muliliko ku Yehova, ame lava va supa kIsareli loko Yuda, mekonda liolondaka vielivulu lilo lia sangiwa. Onyeño yalua ya Yehova ya tu sukumuhila, momo olosekulu vietu ka via lavele ondaka ya Yehova, ha vi lingi ndeci cosi ca sonehiwa velivulu lilo.

²² Oco Hilikiya kumue lava Soma a tuma, va enda kuprofeto Hulida ukãi wa Sialume, omõla a Tokihata, omõla a Hasira, usoleki Wovowalo. Eye wa tunga ko Yerusalãi, koluvumba luavali. Va vangula laye ondaka yaco.

²³ Ukãi wa popia lavo hati, Ca popia Yehova Suku ya Isareli, ceci, hati, Sapuila ulume wa ku tuma kokuange, huti,

²⁴ Ca popia Yehova, ceci, hati, Tala, imbo lilo lava va tungamo ndi va kokela ohali lasiñalo osi a sonehiwa velivulu lia tangelua kovaso a Soma ya Yuda.

²⁵ Momo va njanduluka, va timihila insensu olosuku vikuavo ha va wengula onyeño yange lovilinga viosi viovaka avo, oco onyeño yange yi sukumuhila imbo lilo, kuenje ka yi imuiwa.

²⁶ Puãi popi la Soma ya Yuda una wo tumi oku u puliliyilako ku Yehova, hoti, Ca popia Yehova Suku ya Isareli kolondaka vina wa yeva, ceci, hati,

²⁷ Omo utima wove ka wa sivile, kuenje wa liketisa kovaso a Suku eci a yeva olondaka viaye a popela imbo lilo lava va tungamo, kuenda omo wa liketisa kovaso ange, wa tola uwalo wove loku lilila kovaso ange, oco lamevo nda ku yeva. Oco ca popia Yehova.

²⁸ Tala, hu pekelisa kumue lolosekulu viove, va ku tuala keyambo lombembua, kuenje ovaso ove ka a moli ohali yosi yina ndi laika oku muisa imbo lilo lava va tungamo. Oco va tuala ondaka yaco ku Soma.

²⁹ Oco Soma wa pañinya, yu wongoluila pamuamue akulu vosi va Yuda la Yerusalãi.

³⁰ Kuenje Soma wa lamanela vonjo ya Yehova, kumue lalume vosi va Yuda, lolonungi via Yerusalãi, lovitunda la va Lewi kuenda omanu vosi vanene lava vatito. Yu wa va tangela olondaka viosi vielivulu liocisila lina lia sangiwa vonjo ya Yehova.

³¹ Soma wa talama vilu, pomangu yaye, kuenje wa lisila ocisila kovaso a Yehova coku kuama Yehova loku lava ovihandeleko viaye lovovangi aye lovisila viaye lutima waye wosi lomuenyo waye wosi, ha pokola kolondaka viocisila vina via sonehiwa velivulu liaco.

³² Kuenje wa kokela vosi va kala ko Yerusalãi loko Benjamini oku wilavo vocisila caco. Olonungi via Yerusalãi via linga ndocisila ca Suku, Suku yolosekulu viavo.

³³ Kuenje Yosiya wopa umbondo wosi vofeka yosi ya va Isareli, yu wa kisika vosi va kala kIsareli oku vumba Yehova, Suku yavo. Komuenyo waye wosi, ovo ka va pambukile poku kuama Yehova, Suku yolosekulu viavo.