II ASAPULO 33 - Embimbiliya - Bíblia Sagrada em Umbundu

¹ Manase eci a fetika oku viala wa kala lanyamo ekui la avali, kuenje wa viala anyamo akuĩ atãlo la atãlo vo Yerusalãi.

² Wa lingainga eci cĩvi kovaso a Yehova, ndumbondo wavakualofeka vana Yehova a tundisa kovaso a va Isareli.

³ Wa tumbulula vali ovotala okolonumbuko ana isiaye Hesekiya a leñuile. Wa tungila vo Baale ovotala, wa panga Asera kuenda wa fendaila olohoka viosi viokilu yu wa vi vumba.

⁴ Vonjo ya Yehova yina Yehova a popele hati, Vo Yerusalãi mu kala ño hu onduko yange, eye wa tungilamo ovotala.

⁵ Wa tungila olohoka viosi viokilu ovotala, vovitali vivali vionjo ya Yehova.

⁶ Wa yokela omãla vaye ndocilumba vocimbota comõla a Hinoma. Wa pilola, wa taha taha, wa kala lovombanda, wa talavaya lakualondele lolonganga. Wa linga evĩho lialua kovaso a Yehova, loku wengula onyeño yaye.

⁷ Ociñumañuma ca songiwa, cina a pangele, wa ci kapa vonjo ya Suku, yina Suku a popele la Daviti kuenda omolaye Salomone hati, Vonjo yilo lovo Yerusalãi, imbo nda nola povapata osi a va Isareli, ñapamo onduko yange otembo ka yi pui.

⁸ Si sembula vali omãi ya Isareli vofeka yina nda tukuilile olosekulu viene, nda ovo va pokola ha va lingi cosi nda va handelekele lomela wa Mose, ndokuti ovihandeleko viosi, lovisila lovihõlo.

⁹ Manase wa tamba Yuda lolonungi via Yerusalãi, kuenje va linga evĩho lia piala, lina liakualofeka vana Yehova a nyolele kovaso a va Isareli li sule.

¹⁰ Yehova wa popia la Manase lomami vaye, puãi ka va yeveleko.

¹¹ Oco Yehova wa va katuila vakesongo kolohoka viosoma ya Asuria. Ovo va kuta Manase lalienge, yu vo kuta likumbi viosipi, kuenje vo tuala ko Bavulono.

¹² Eci a kala vohali, wa likuambela ku Yehova Suku yaye. Wa liketisila calua kovaso a Suku yolosekulu viaye.

¹³ Wa likutilila kokuaye kuenje Suku wa tava koku likuambela kuaye. Wa yeva elombelo liaye kuenje wo nena vali vo Yerusalãi vusoma waye. Oco Manase wa kuliha okuti Yehova eye Suku.

¹⁴ Noke wa tungila imbo lia Daviti ocimbaka cokosamua, kutakelo wa Gihone vocimbota, toke ocipepi lombundi yolusi. Wa ci ñualisa Ofele, kuenje wa ci katula toke ca linga cisovisovi. Wa kapavo vakesongo kolohoka vovaimbo osi a pama ovo Yuda.

¹⁵ Olosuku viamale lociteka, vonjo ya Yehova wa viupamo. Ovotala osi a tungilile komunda yonjo ya Yehova lo vo Yerusalãi, wa a inasila kosamua yimbo.

¹⁶ Wa tumbulula utala wa Yehova kuenje wa lumbilako ovilumba viombembua levi violopandu. Wa handeleka Yuda oku vumba Yehova Suku ya Isareli.

¹⁷ Haimo omanu lopo va lumbaila kovotala okolonumbuko, puãi va lumbailako lika Yehova Suku yavo.

¹⁸ Ovilinga vikuavo via Manase, lohutililo yaye ku Suku yaye, lolondaka viavakuavitumasuku vana va popia laye vonduko ya Yehova Suku ya Isareli, tala, via sonehiwa velivulu liovilinga violosoma via Isareli.

¹⁹ Ohutililo yaye, lomo Suku a tava kokulikuambela kuaye, lakandu aye osi lolongole viaye, lapa a tungile ovotala polonumbuko loku kapapo Asera loviñumañuma, cina ka liketisile handi, tala, via sonehiwa velivulu liavakuavitumasuku.

²⁰ Oco Manase wa pekela kumue lolosekulu viaye, kuenje vo kenda vonjo yaye. Omolaye Amoni wa piñai komangu yaye.

²¹ Amoni eci a fetika oku viala wa kala lanyamo akui avali la avali, kuenje wa viala anyamo avali vo Yerusalãi.

²² Wa lingainga eci cĩvi kovaso a Yehova, ndeci ca lingaile isiay Manase. Amoni wa lumbaila oviñumañuma viosi via songiwa, vina isiaye a pangele, yu wa vi vumba.

²³ Ka liketisile kovaso a Yehova ndeci isiaye Manase a liketisile, puãi eye Amoni wa vokaiyako oku luey.

²⁴ Akuenje vaye vo tumbikila ongombo kuenje va wipaila vonjo yaye muẽle.

²⁵ Puãi omanu vosi vofeka va ipa vosi vana va tumbikilile Soma Amoni ongombo. Kuenda imanu vofeka va vialeka omolaye Yosiya komangu yaye.