II ASAPULO 32 - Embimbiliya - Bíblia Sagrada em Umbundu

¹ Kovaso yovina evi, kovaso yovilinga evi viesunguluko, oco Senakeriva Soma ya Asuria weya, kuenje wa iñila vo Yuda, yu wa ñuala ocingonja ovaimbo a pama kuenje wa sima oku a kuata.

² Eci Hesekiya a mõla okuti Senakeriva weya kuenda wa yongola oku yaka la Yerusalãi,

³ oco wa sokiya kumue lolombuale viaye lomanu vaye va pama, oku sitika olono viovava vina via kala konele yimbo; yu vo kuatisako.

⁴ Oco owiñi walua womanu wa liongolola, kuenje va sitika olono viosi ndaño muẽle olui luna lu pita vofeka. Ovo vati, Olosoma via Asuria hẽ vi sangela nye ovava alua eci viya?

⁵ Hesekiya wa kuata utoi kuenje wa tumbulula ocimbaka cosi cina ca kupukile. Kilu liaco wa tungako olombonge lokonyima yaco wa tungako ocimbaka cikuavo, kuenda wa pamisa Milo vimbo lia Daviti. Wa tẽlavo ovimaleho loviyepelo viakahandangala.

⁶ Wa kapa vakesongo liovita kovaso omanu, yu wa vongoluila kokuaye kolusenje luokombundi yimbo, kuenje wa va kolisa lolondaka viaye, hati,

⁷ Kolisiko, kuati utoi. Ko ka yokoki, ko ka salukili Soma ya Asuria, ndaño owiñi wosi u kasi kumue laye, momo konele yetu kuli u wa velapo.

⁸ Konele yaye kuli okuoko kuetimba, puãi konele yetu kuli Yehova Suku yetu, o tu kuatisa loku tu yakela ovilunga vietu. Lolondaka evi via Hesekiya, Soma ya Yuda, omanu va tula utima.

⁹ Kovaso yaco, Senakeriva Soma ya Asuria, osimbu a kala loku ñuala Lakisi ocingonja lolohoka viaye viosi, wa tuma akuenje vaye ko Yerusalãi ku Hesekiya Soma ya Yuda, lokomanu vosi va Yuda va kala ko Yerusalãi, hati,

¹⁰ Ca popia Senakeriva Soma ya Asuria ceci, hati, Wa koleli nye okuti vu kala vo Yerusalãi loku sivila kocingonja?

¹¹ Hesekiya eci a kasi loku popia lene hati, Yehova Suku yetu o tu popela peka lia Soma ya Asuria, ka kasi vu hẽ loku vu kemba, ho kokeli okufa lonjala lenyona?

¹² Ha Hesekiyako hẽ wa leñula olonumbuko viaye lovotala aye kuenje wa handeleka Yuda la Yerusalãi hati, Fendeleli kovaso yutala umuamue, haiko vu timihila insensu?

¹³ Ka wa kulihili hẽ eci ame lolosekulu viange tua linga lomanu vosi volofeka vikuavo? Olosuku viomanu volofeka viaco via tela hẽ oku va popela peka liange?

¹⁴ Pokati kolosuku viosi violofeka vina olosekulu viange via kunduile pe, osuku yi pi ya tẽla oku popela omanu vayo peka liange, okuti Suku yene o tẽlavo oku vu popela peka liange?

¹⁵ Kaliye Hesekiya ka ko kembi loku vu tamba ndoco. Ko ko koleli momo layimue osuku yofeka yimue pamue yusoma umue ya tẽla oku popela omanu vayo peka liange pamue peka liolosekulu viange. Ota, Suku yene ko popeli ale peka liange!

¹⁶ Akuenje va Senakeriva vamako oku tondala Yehova Suku lukuenje waye Hesekiya.

¹⁷ Wa sonehavo ovikanda vioku sepula Yehova Suku ya Isareli loku u tondala, hati, Ndeci olosuku viomanu volofeka ka via popelele omanu vavio povaka ange, haico Suku ya Hesekiya ka popela omanu vaye peka liange.

¹⁸ Olondaka Ciaco va vi kaluka lolukandi velimi lia va Yuda komanu va Yerusalãi vana va kala kilu liocimbaka, ha va va saluisa loku va yokokisa, oco va kuate imbo.

¹⁹ Suku ya Yerusalãi vo sipulula, ndeci va sipulola olosuku viomanu vokilu lieve, vina via pangiwa lovaka omanu.

²⁰ Oco Soma Hesekiya kumue luprofeto Isaya, omõla a Amose, va likutililila ondaka yaco, kuenda va vilikiya kilu.

²¹ Yehova wa tuma ungelo, leye wa kundula alume vosi va pama vakuotoi lasongui lavakesongo vocilombo ca Soma ya Asuria. Oco wa tiukila kofeka yaye osõi ka likuete. Eci a iñila vonjo ya suku yaye, oco omãla vaye muẽle va wipa losipata.

²² Oco Yehova wa popela Hesekiya lolonungi via Yerusalãi peka lia Senakeriva, Soma ya Asuria, lopeka liovanyali vosi vakuavo, kuenje wa va vindikiya kolonele viosi.

²³ Va lua va nena oviali ku Yehova ko Yerusalãi, kuenda olombanjaile vinene ku Hesekiya, Soma ya Yuda. Oco tunde opo, wa kemala kovaso olofeka viosi.

²⁴ Koloneke viaco, Hesekiya wa vela, wa si oku fa, yu wa likutilila ku Yehova, leye wo tambulula kuenje wo lekisa ocikomo.

²⁵ Puãi Hesekiya ka panduile ohenda yo lingilua, momo utima waye wa lenda lusõsi. Oco onyeño ya Yehova yo wila, eye kumue la Yuda la Yerusalãi.

²⁶ Haimo lumue Hesekiya wa likapa kutito omo a limbuka usõsi wutima waye, eye lolonungi via Yerusalãi, oco onyeño ya Yehova ka ya va wilile koloneke via Hesekiya.

²⁷ Hesekiya wa kala lovokuasi alua lekemãlo. Wa litungila olonjo vioku soleka opalata lulu, lovawe a tĩla, lolosimbolua, loviyepelo, lovikuata viñi viñi via tĩla.

²⁸ Wa litungilavo olosila vioku soleka olomema lovinyu lulela, kuenda wa tunga oviunda viovinyama viñi viñi, lovipanga violomeme.

²⁹ Kuenda vali wa litungila ovaimbo, yu wa liangiliyila oviunda vinenenene violomeme lolongombe. Momo Suku wa wiha ovipako viakahandangala.

³⁰ Hesekiya haeye wa sitika olui Gihone konano, yu wopamo okapila, wa ka talisa konele yutakelo wimbo lia Daviti. Oco Hesekiya wa sumuluha kovopange aye osi.

³¹ Puãi kondaka yolomunga violombuale via Bavulono, vina via tumilue kokuaye oku puliliya ocikomo ca pita vofeka, Suku wa wimba ovaso oku u nyika, ha kuliha cosi ca kala vutima waye.

³² Ovilinga vikuavo via Hesekiya, lovilinga viaye viwa, tala via sonehiwa velivulu liovinjonde viuprofeto Isaya, omõla a Amose, lo velivulu liolosoma via Yuda la Isareli.

³³ Hesekiya wa pekela lolosekulu viaye, kuenje vo kenda apa pa tumuha, payambo omãla va Daviti. Kuenda Yuda yosi lolonungi via Yerusalãi va pepisa onambi yaye. Omolaye Manase wa piñala komangu yaye.