II ASAPULO 31 - Embimbiliya - Bíblia Sagrada em Umbundu

¹ Eci ovina evi viosi via pua, oco va Isareli vosi vana veyile, va enda kovaimbo a Yuda, kuenje va nyanyõla oviñumañuma, va timbula Asera kuenda va lundula olonumbuko lovotala oko Yuda yosi la Benjamini, ndaño kEfarimi la Manase, toke va nyõla cosi pe. Noke va Isareli vosi va tiukila kovaimbo avo, omunu omunu kocitumãlo caye.

² Hesekiya wa sokiya ovisoko viovitunda la va Lewi, ocisoko locisoko omunu lomunu ndupange waye. Ovitunda la va Lewi wa va kapa kovilumba vioku pia elisi levi viombembua ha va vumbi volombundi viocilombo ca Yehova, loku imba olopandu lasivayo.

³ Soma wa eca onepa yovipako viaye, ha yi lingi ovilumba vioku pia elisi, ndokuti ovilumba vioku pia elisi komele lo koñolosi, lovilumba vioku pia elisi kasambata lokokumoleha kuosãi kuenda kolofesta via tukuiwa, ndomo ca sonehiwa vovihandeleko via Yehova.

⁴ Kuenda wa handeleka omanu va tunga ko Yerusalãi oku eca onepa yovitunda la va Lewi, oco ovo va liece kovihandeleko via Yehova.

⁵ Eci ocihandeleko caco ca yevala kuosi, haico va Isareli va eca ovaima atete akahandangala olomema lovinyu lulela, lowiki, lovaima osi ovovapia. Kuenda va nena onepa yekui yovina viosi, yakahandangala.

⁶ Va Isareli la va Yuda, vana va tunga vovaimbo a Yuda, va nenavo onepa yekui yolongombe lolomeme leyi yovina vi kola via tumbikiwa ku Yehova Suku yavo, yu va vi ongeka olondunda.

⁷ Kosãi yatatu va fetika oku ongeka olondunda, kuenje va vi malusula kosãi yepanduvali.

⁸ Eci Hesekiya eya kumue lolombuale kuenje va mõla olondunda, oco va sivaya Yehova lomanu vaye va Isareli.

⁹ Hesekiya wa pula ovitunda la va Lewi kondaka yolondunda viaco.

¹⁰ Oco ocitunda cinene Asariya, ukuepata lia Sadoke, wo tambulula hati, Tunde apa omanu va fetika oku nena ovilumba vonjo ya Yehova, tua lia, tue kuta, kuenje tua supisapo calua, momo Yehova wa sumuluisa omanu vaye. Eci ca supapo, oco ca linga olondunda evi.

¹¹ Oco Hesekiya wa tuma oku angiliya olohondo vonjo ya Yehova, yu va vi angiliya.

¹² Kuenje ovilumba lolonepa viekui kuenda ovina via tumbikiwa va vi nenamo lesunguluko lialua. Konaniya, u Lewi, eye kalei kavio, kuenda manjaye Simei eye wa kuamamo.

¹³ Yehiyele la Asasiya la Nahati la Asahele la Yerimote la Yosavada la Elide la Isimakiya la Mahata kuenda Benaya, ovo asongui va yevelaila ku Konaniya la manjaye Simei, ndeci ca handeleka Soma Hesekiya kumue la Asariya, usongui wonjo ya Suku.

¹⁴ Kore, omõla a Imina, u Lewi, ukuambundi yokutundilo, eye kalei kovilumba viocipango via eciwa ku Suku, haeye ukuakuava ovilumba via Yehova vioku tulika lovina vi kola calua.

¹⁵ Kovaimbo ovitunda, Edene la Miniyami la Yesuwa la Semaya la Amariya la Sekaniya, ovo vo kuataisa lutate walua oku eca ocikepa cavangandiavo, ci kale kuava vanene, ci kale kuava vatito, ndovisoko viavo.

¹⁶ Puãi ka va ecele kalume va sonehiwa ndapata avo, vopisa oku tenda komala valume vakuanyamo atatu, vana va iñaila vonjo ya Yehova ndocikele cavo ceteke leteke ha va lingimo upange wavo ndokulitepa kuovisoko viavo.

¹⁷ Ovitunda via sonehiwa ndapata olosekulu viavo, kuenda va Lewi va sonehiwa ndovikele viavo, ocisoko locisoko tunde ku vakuanyamo akui avali lava va pitahalamo.

¹⁸ Ovitunda via sonehiwa kumue lotumãla tuavo lakãi vavo lomãla vavo valume lomãla vavo vakãi, owiñi waco wosi; momo va kala lutate woku liyelaisa.

¹⁹ Kondaka yomãla va Arone, ovitunda vina via kala vovisenge viovikanjo via tiamela kovaimbo ovitunda, vimbo limbo mua kala omanu va tukuiwa kolonduko, vakuakueca ovikepa kalume vosi vopokati kovitunda la va Lewi, vana va sonehiwa.

²⁰ Eci oco ca linga Hesekiya ko Yuda yosi. Eye wa linga eci ciwa, ca sunguluka, haico cocili kovaso a Yehova Suku yaye.

²¹ Cosi a fetika oku linga, ci kale upange wonjo ya Suku, ci kale ovihandeleko pamue ovisila, ha sandi Suku yaye, cosi wa ci linga lutima waye wosi kuenje wa sumuluha.