II ASAPULO 30 - Embimbiliya - Bíblia Sagrada em Umbundu

¹ Hesekiya wa tuma kIsareli loko Yuda yosi, kuenje wa sonehela Efarimi la Manase ikanda, oco veye konjo ya Yehova ko Yerusalãi, oku lingila Yehova Suku ya Isareli o Pascoa.

² Momo osoma kumue lolombuale viaye kuenda ohongele yosi yoko Yerusalãi, va likuminya oku lia o Pascoa kosãi yavali.

³ Ka va telele oku yi lia koloneke viaco, momo ovitunda via liyelisa ka via luile ndaño omanu ka va liongoluilile handi ko Yerusalãi.

⁴ Ondaka yaco ya sungulukila Soma lohongele yosi.

⁵ Kuenje va sokiya oku imba oluiya kIsareli yosi, tunde ko Bereseva toke ko Dani, oco omanu veye ko Yerusalãi ha va lingila Yehova Suku ya Isareli o Pascoa, momo ka va ci lingaile owiñi ndomo ca sonehiwa vovihandeleko.

⁶ Oco olomunga via enda lovikanda via tumiwa la Soma kumue lolombuale viaye, yu va ñuala Isareli yosi la Yuda ndomo Soma a ci handeleka. Va popia vati, Ene a va Isareli, pongolokeli ku Yehova, Suku ya Avirahama la Isake la Isareli, oco eye a tiuke kokuene wa supipo, haene wa puluki povaka olosoma via Asuria.

⁷ Ko ka lingi ndolosekulu viene pamue ndavangandiene vana va lueyela Yehova Suku yolosekulu viavo, yu a va eca kenyoleho, ndomo ene vu ci lete.

⁸ Kaliye ko ka lingi vasilongua, ndeci olosekulu viene, puãi kuati peka lia Yehova, enjui vocitumãlo caye ci kola, cina eye a kolisa ño hu. Vumbi Yehova Suku yene, oco onyeño yaye yalua yu tinduke.

⁹ Momo nda vu pongolokela ku Yehova, oco vangandiene lomãla vene va sanga ohenda kuava va va tuala kumandekua, kuenje va tiuka vali vofeka yilo. Momo Yehova Suku yene, ukuacali haeye ukuahenda, eye ka wimbi ekosi nda vu tiuka kokuaye.

¹⁰ Oco olomunga via pita vimbo limbo vovaimbo osi ofeka ya Efarimi la Manase, toke ko Sevulono, puãi va va yola epembe loku va fuanguila.

¹¹ Haimo vamue va Asere la va Manase la vamue va Sevulono va likapa kutito kuenje veya ko Yerusalãi.

¹² Eka lia Suku lia kalavo ko Yuda oku va iha utima umuamue ha va lingi eci Soma kumue lolombuale viaye va handeleka londaka ya Yehova.

¹³ Kosãi yavali, ko Yerusalãi kua liongoluila omanu valua veya oku lia ofesta yolombolo ka vi kuete etumbisa. Ca linga ohongele yinene calua.

¹⁴ Oco va votoka kuenje va leñula ovotala ana a kala ko Yerusalãi ndaño ovotala osi insensu va a leñula loku a imba volui Kedrone.

¹⁵ Noke va ipa o Pascoa keteke liekui lakuãla liosãi yavali. Ovitunda la va Lewi va kutiwa osoi yu va likolisa kuenje va nena ovilumba vioku pia elisi vonjo ya Yehova.

¹⁶ Yu va kala kupange wa va tukuilua ndocihandeleko ca Mose omunu wa Suku. Ovitunda via nyila osonde va tambula peka lia va Lewi.

¹⁷ Vohongele mua kala valua ka va likolisile, oco ava vosi ka va yelele, va Lewi va kala locikele coku va ipaila olomeme vio Pascoa, ha vi koli ku Suku.

¹⁸ Momo owiñi walua womanu, ca piãla va lua va Efarimi la va Manase la va Isakare, la va Sevulono, ka va liyelisile, haimo va lia o Pascoa, puãi ndomo ca sonehiwa hamoko. Kuenje Hesekiya wa va lombela hati, Yehova ukuahenda a ecele

¹⁹ u wosi wa kapela utima waye oku sanda Suku Yehova, Suku yolosekulu viaye, ndaño ka kuete onjelo yina yi sesamela vocitumãlo ci kola.

²⁰ Oco Yehova wa tava ku Hesekiya, kuenje wa kayisa omanu.

²¹ Oloneke epanduvali va Isareli, vana va kala ko Yerusalãi, va lia lonjolela yalua ofesta yolombolo ka vi kuete etumbisa. Eteke keteke, va Lewi kuenda ovitunda va sivaya Yehova, va imbila Yehova lovisikilo viovileñi vinene.

²² Oco Hesekiya wa kolisa lolondaka viaye va Lewi vosi vana va lekisa olondunge viwa kupange wa Yehova. Oloneke epanduvali omanu va lia okulia kuofesta loku lumba ovilumba viombembua loku pandula Yehova, Suku yolosekulu viavo.

²³ Ohongele yosi ya likuminya oku amisako vali oloneke epanduvali, oco vamisako vali oloneke epanduvali lonjolela.

²⁴ Momo Hesekiya Soma ya Yuda, wa eca kohongele ohulukãi yolonui lolohulukãi epanduvali violomeme, ha vi lingi ovilumba. Olombuale via eca kohongele ohulukãi yolonui lolohulukãi ekui violomeme. Kuenda owiñi walua wovitunda wa likolisa.

²⁵ Ohongele yosi ya Yuda, kumue lovitunda la va Lewi kuenda owiñi wosi wava va tunda kIsareli, lakombe va tunda kofeka ya Isareli lava va tunga ko Yuda, vosi yavo va sanjuka.

²⁶ Oco ko Yerusalãi kua kala esanju lialua, momo tunde koloneke via Salomone, omola a Daviti, Soma ya Isareli, ka kua la kala esanju ndolio ko Yerusalãi.

²⁷ Oco ovitunda la va Lewi va votoka, yu va sumuluisa omanu. Kuenje ondaka yavo ya yevala, lelombelo liavo lia pitila toke kocitumãlo ci kola ca Suku, kovailu.