II ASAPULO 3 - Embimbiliya - Bíblia Sagrada em Umbundu

¹ Oco Salomone wa fetika oku tunga onjo ya Yehova ko Yerusalãi, komunda Moriya, kocimbandi ca Orinane u Yevusi, kuna Yehova a tukulukilile isiaye Daviti, haiko Daviti a angiliyile.

² Yu wa fetika oku tunga keteke lia vali liosãi yavali, kulima wakuãla wusoma waye.

³ Oseteko Salomone a tunga layo onjo ya Suku yeyi: Okulepa kuayo akui epandu kovikeya, wa tenda lukeya wale, kuenda upati waco akui avali kovikeya.

⁴ Okulepa kuocindumba ca kala kovaso yonjo kua lisoka lupati wonjo, ndokuti akui avali kovikeya kuenda usovi waco ocita lakui avali kovikeya. Wa ci laña vokati lulu wa fina.

⁵ Vohondo yinene wa yambelamo lavaya ovinendele, kuenda wa lañamo lulu wa fina, loku luvikiyamo oviti vieva lalienge.

⁶ Onjo wa yi posuisa lovawe a tĩla. Ulu waco ulu wo ko Parawayi.

⁷ Onjo kumue lolohangalo viaco, lovikuli, lovimano, lapito aco, cosi wa ci lañavo lulu. Vovimano wa luvikiyamo vakeruvi.

⁸ Yu wa tunga ohondo yi kola koku kola. Okulepa kuayo kua lisoka lupati wonjo, ndokuti ovikeya akui avali. Upati wayo akui avali kovikeya. Wa yi laña lulu wa fina, wa soka ovita epandu kolotalendo.

⁹ Ulu wolombambo oku u yonga, wa soka akui atãlo kolosiekele. Olohondo viokilu wa vi laña lulu.

¹⁰ Vonjo yi kola koku kola wa songelamo vakeruvi vavali, yu wa va laña lulu.

¹¹ Avava avakeruvi, okulepa kuao kua soka akui avali kovikeya. Evava lia umue povakeruvi lia soka ovikeya vitãlo, kuenda liasa vocimano conjo. Evava likuavo lia kalavo lovikeya vitãlo, kuenda liasa vevava liukeruvi ukuavo.

¹² Evava liukeruvi ukuavo lia soka ovikeya vitãlo, kuenda liasa vocimano conjo. Evava liaye likuavo lia kalavo lovikeya vitãlo kuenda lia litokeka levava liukeruvi ukuavo.

¹³ Avava a vakeruvi a nyanyumuha kuenje a soka akui avali kovikeya. Vakeruvi va tai vilu kuenje ovipala viavo via imba ovaso vonjo,

¹⁴ Yu wa tonga ongumbo lonanga yonoloti leyi yi vumbula leyi yi kusuka kumosi lovalatanya, kuenje wa pangelako oviluvialuvia viavakeruvi.

¹⁵ Wa panga olongunji vivali kovaso yonjo, usovi wavio wa soka ovikeya akui atatu layitãlo. Utue wongunji longunji wa soka ovikeya vitãlo.

¹⁶ Wa panga alienge nda yana ovocitumãlo ci kola kuenje wa a kapa kosungu yolongunji. Wa panga ocita caromã kuenje wa a kapa kalienge.

¹⁷ Wa sembika olongunji kovaso yonembele, yimue kondio yikuavo kepili. Yokondio wa yi luka, hati, Yakini, leyi yokepĩli wa yi luka hati, Boase.