II ASAPULO 29 - Embimbiliya - Bíblia Sagrada em Umbundu

¹ Hesekiya eci a fetika oku viala wa kala lanyamo akui avali la atãlo kuenje wa viala ko Yerusalãi anyamo akui avali lecea. Onduko ya inaye Aviya, omõla a Sakariya.

² Wa linga eci ca sunguluka kovaso a Yehova, ndeci muẽle ca lingaile isiaye Daviti.

³ Kunyamo watete wusoma waye, kosãi yatete, wa yikula apito onjo ya Yehova, yu wa a panga vali ciwa.

⁴ Wa pañinya ovitunda la va Lewi, yu wa vongoluila pamuamue kolusenje luonembele, konele yutundilo.

⁵ Wa popia lavo hati, Ene a va Lewi! Njeveleli! Kaliye liyelisi, kuenda yelisi onjo ya Yehova, Suku yolosekulu viene! Esĩlo li kasi vocitumãlo ci kola, li tundisili posamua.

⁶ Momo olosekulu vietu via lueya, via linga eci cĩvi kovaso a Yehova Suku yetu. Vo yanduluka, ocitumãlo ca Yehova va cimba ekosi kuenda va cimba onyima.

⁷ Va yikavo apito ocindumba, va ima olondiyelo kuenda Suku ya Isareli ka vo timĩhilile insensu. Ndaño oku u lumbila ovilumba vioku pia elisi vocitumãlo ci kola ka vo lumbilile.

⁸ Oco onyeño ya Yehova ya wila Yuda la Yerusalãi, kuenda wa tava okuti va nyehuiwa, va komohelua, va siopiwa, ndomo vu ci lete lovaso ene.

⁹ Oco tali, olosekulu vietu via kupuiwa losipata, lomãla vetu valume, lomãla vetu vakãi, kuenda akãi vetu va ci kasilili kumandekua.

¹⁰ Kaliye vutima wange nda sokiya oku lisila ocisila la Yehova, Suku ya Isareli, oco onyeño yaye yalua yi tu tinduke.

¹¹ Kaliye ko ka lingi eselula, amãla vange. Momo Yehova wo noleli oku talama kovaso aye loka u vumba, ho lingi akuenje vaye, loku u timĩhila insensu.

¹² Oco va Lewi va katuka. Ovo vava: Mahata omõla a Amasayi, la Yoele omõla a Asariya, vopo va Kohata; kuenda po va Merari, Kisi omõla a Avidi, la Asariya omõla a Yehalelele; po va Gerisiono, Yowa omõla a Sima, la Edene omõla a Yowa;

¹³ po va Elicafana, Simiri la Yeuele; po va Asafe, Sakariya la Mataniya;

¹⁴ po va Hemani, Yehuele la Simei; po va Yedutimu, Semaya la Usiyele.

¹⁵ Oco vongolola vakuepata liavo, va likolisa kuenje va iñila vonjo ya Yehova ha va yi yelisa, ndeci Soma a ci handeleka lolondaka via Yehova.

¹⁶ Ovitunda via iñila vokati konjo ya Yehova, ha va yi yelisa. Esĩlo liosi va sanga vonembele ya Yehova, va li tundisila vocitali conjo ya Yehova, kuenje va Lewi va li tuala kolui Kedrone.

¹⁷ Va fetika oku yelisa keteke liatete liosãi yatete, kuenje keteke liecelala liosãi yaco va pitila kocindumba ca Yehova. Yu va yelisa onjo ya Yehova voloneke ecelala, kuenje keteke liekui lepandu liosãi yatete oco va malusula.

¹⁸ Noke va iñila ku Soma Hesekiya, kuenje vati, Tua yelisa onjo yosi ya Yehova lutala wovilumba vioku pia elisi kumue lovikuata viaco viosi, kuenda omesa yombolo yoku taliwa, kumue lovikuata viaco viosi.

¹⁹ Kuenda vali ovikuata viosi vina Soma Ahasi a pukuile kusoma waye, cina a lueya, etu tua vi angiliya loku vi kolisa. Tala, vievi kovaso yutala wa Yehova.

²⁰ Oco Soma Hesekiya wa pasuka ociteketeke, wongolola olombuale viovimbo, kuenje wa lamanela konjo ya Yehova.

²¹ Vambata olonui epanduvali lovitupi epanduvali violomeme lotumeme epanduvali, lovitupi epanduvali violohombo, ha va lumbila usoma locitumãlo ci kola la Yuda ocilumba cekandu. Soma wa handeleka ovitunda, omãla va Arone, oku vi lumbila kutala wa Yehova.

²² Oco va ipa olonui, kuenje ovitunda via tambula osonde, yu va yi nyila kutala. Va ipa ovitupi violomeme, kuenje va nyila osonde kutala. Va ipavo otumeme kuenje va nyila osonde kutala.

²³ Ovitupi violohombo, vina viocilumba cekandu, va vi nena ku Soma lokohongele, yu va kapa ovaka avo kilu liavio.

²⁴ Ovitunda via vipa, kuenje losonde yaco va lumbila ocilumba cekandu kutala, ha va tuvika ekandu lia Isareli yosi, momo. Soma wa handelekele okuti ocilumba coku pia elisi kuenda ocilumba cekandu, kavali kavio vi lumbilue Isareli yosi.

²⁵ Wa kapa va Lewi vonjo ya Yehova. Va kala layundu lovisumba lolohalupa, ndeci ca handelekele Daviti kuenda Gadi, ukuavitumasuku velombe lia Soma kuenda uprofeto Natana, momo ocihandeleko caco ca tunda ku Yehova, yu ca eciwa lovaprofeto vaye.

²⁶ Va Lewi va talama lovisikilo via Daviti, kuenda ovitunda via kala lolombeta.

²⁷ Hesekiya wa handeleka oku lumbila kutala ocilumba coku pia elisi. Eci ocilumba coku pia elisi ca fetika, ocisungo ca Yehova ca fetikavo, kumue lolombeta lovisikilo via Daviti Soma ya Isareli.

²⁸ Oco ohongele yosi ya fendela, olonjimbi via imba, vakualombeta va sika. Va tualako toke ocilumba coku pia elisi ca puapo.

²⁹ Eci va malusula oku lumba, Soma la vosi va kala kumue laye va petama kuenje va fendela.

³⁰ Soma Hesekiya kuenda olombuale va handeleka va Lewi oku imbila Yehova asivayo lolondaka via Daviti levi viuprofeto Asafe. Oco va imba asivayo lonjolela, va petamisa ovitue viavo yu va fendela.

³¹ Oco Hesekiya wa tuala ondaka kuenje hati, Kaliye, wa litumbiki ku Yehova, oco amiko, neni ovinyama vioku lumba, lovilumba violopandu vonjo ya Yehova. Oco ohongele ya nena ovinyama vioku lumba lovilumba violopandu, kuenda ava vosi va kala lutima waco, va nena ovilumba vioku pia elisi.

³² Ovilumba vioku pia elisi, vina ohongele ya nena, via soka akui epanduvali kolonui locita covitupi violomeme kuenda ovita vivali viotumeme. Evi viosi via linga ocilumba coku yokela Yehova.

³³ Kua tumbikiwavo ovita epandu violongombe lolohulukãi vitatu violomeme.

³⁴ Puãi ovitunda ka via luile, kuenje ka via tẽlele oku yuva ovilumba viosi vioku pia elisi. Oco vangandiavo va Lewi va va kuatisako, toke upange wa pua, kuenda toke ovitunda vikuavo via liyelisa, momo va Lewi va kapele calua utima koku liyelisa, ovitunda ci sule.

³⁵ Kua kalavo ovilumba viakahandangala vioku pia elisi kuenda ulela wovilumba viombembua kuenda vali ovilumba vioku nyua poku lumba ovilumba vioku pia elisi. Oco upange wonjo ya Yehova wa katuka vali.

³⁶ Kuenje Hesekiya kumue lomanu vosi va sanjukila eci Suku a angiliyila omanu, momo ca lingiwa ocisalukila.