II ASAPULO 28 - Embimbiliya - Bíblia Sagrada em Umbundu

¹ Ahasi eci a fetika oku viala wa kala lakui avali kanyamo, kuenje wa viala anyamo ekui lepandu ko Yerusalãi. Ka lingaile eci ca sunguluka kovaso a Yehova, ndeci ca lingaile isiaye Daviti,

² puãi wa endaila volonjila violosoma via Isareli. Wa pangela Baale oviñumañuma via itilua.

³ Kuenda vali wa timiha insensu vocimbota comõla a Hinoma, loku yoka omãla vaye vondalu, ndumbondo wavakualofeka, vana Yehova a tundisile kovaso a va Isareli.

⁴ Wa lumba lumba loku timiha insensu kolonumbuko lokawulu kuenda vemi lioviti viosi via pulika.

⁵ Oco Yehova Suku yaye wa weca peka lia Soma ya Suria. Eye wo yula, kuenje pomanu vaye vambatapo owiñi walua wolohute, yu wa va tuala ko Damasko. Kuenda wa eciwavo peka lia Soma ya Isareli, yu wo lundula cimue.

⁶ Peka, omõla a Remaliya, veteke liongongo ko Yuda wa ipako ocita lakui avali kolohũlũkãi vialume, vosi yavo vakuotõi, momo va yandulukile Yehova Suku yolosekulu viavo.

⁷ Sikiri, ulume ukuotõi u Efarimi, wa ipa Maaseya, omõla a Soma, la Asirikama, kalei kelombe, kuenda Elikana, kalei ka Soma.

⁸ Va Isareli povangandiavo vambatapo olohute via soka ovita vivali kolohũlũkãi viakãi lakuenje lafeko. Va va pundavo ovikuata vialua, yu va enda lavio ko Samaria.

⁹ Puãi uprofeto umue wa Yehova oko a kala. Onduko yaye Odede. Yu wa tunda oku ñualehela lolohoka vina via kala loku iya ko Samaria, kuenje wa popia lavo hati, Tali, omo Yehova Suku yolosekulu viene a temela Yuda, wa va eca peka liene, lene wa va kunduli lonyeño yalua ya pitila toke kilu.

¹⁰ Kaliye va Yuda la va Yerusalãi, wa simi oku va lingisa apika vene valume lava vakãi. Puãi ene muẽle, ka wa lueyeleli hẽ Yehova Suku yene?

¹¹ Kaliye, njeveleli! Tiuli vali olohute vina wa kuati kovangandiene, momo onyeño ya Yehova yo wengukili.

¹² Oco vamue povasongui va va Efarimi, Asariya, omõla a Yohanana, la Berekiya, omõla a Mesilemote, la Yehisikiya, omõla a Sialume, la Amasa, omõla a Hadilai, va votoka, yu va tamalala lava va tunda kovita.

¹³ Va popia lavo vati, Kulo etaili ko neniko olohute, momo vu soka oku tu lueyisa kovaso a Yehova, loku vokiya kakandu etu lokolohole vietu. Momo olohole vietu vialua ale, kuenje onyeño ya wengukila Isareli.

¹⁴ Oco alume vakuavita, olohute levi va pundile, va vi sia kovaso yolombuale lohongele yosi.

¹⁵ Alume vana va tukuiwa kolonduko va votoka, kuenje va tambula olohute. Lovikuata vina via pundilue, va walisa ava pokati kavo va kala epõlõla, va va walisa, va va iha olohaku, va va lisa loku va nyuisa, va va waveka ulela; ava va sovoloka pokati kavo, va vambatela kovimbulu, yu va va tuala kuvangandiavo, ko Yeriko, imbo lioviti vieva. Noke va tiukila ko Samaria.

¹⁶ Koloneke viaco, Soma Ahasi wa tuma oku pinga olosoma via Asuria ha vo kuatisa.

¹⁷ Momo va Edome veyile vali, va yula Yuda loku ambata olohute.

¹⁸ Va Filisiti lavovo va tuiyila ovaimbo ovatapi la a o kombuelo ya Yuda, kuenje va kuata Bete Siemese la Ayalone la Gederoti la Soko kumue lovikanjo viaco, la Timina kumue lovikanjo viaco, la Gimiso kumue lovikanjo viaco. Kuenje va tungamo.

¹⁹ Momo Yehova wa yambula Yuda mekonda lia Ahasi, Soma ya Isareli, una wa linga umbondo ko Yuda kuenda wa lueyela calua Yehova.

²⁰ Tigilati Pilesere, Soma ya Asuria, weya kokuaye, kuenje wo sakalaisa yu ko kuatisile.

²¹ Oco Ahasi wopa povikuata vionjo ya Yehova lopovikuata vionjo ya Soma lopovikuata violombuale, kuenje wa vi eca ku Soma ya Asuria, puãi ka co kuatisile.

²² Koloneke viohali yaye, lopo wa lueyela vali Yehova, eye muẽle Soma Ahasi.

²³ Wa lumbila olosuku vioko Damasko, vina vio yulile. Yu wa popia hati, Omo olosuku violosoma via Suria vi va kuatisa, oco ndi vi lumbila ha vi ñuatisa. Puãi via linga enyõleho liaye leli lia Isareli yosi.

²⁴ Ahasi wa kongela ovikuata vionjo ya Suku, wa tetola ovikuata vionjo ya Suku kuenje wa yika apito onjo ya Yehova, yu wa litungila ovotala vo Yerusalãi yosi.

²⁵ Vovaimbo osi a Yuda, vimbo limbo wa tungilamo ovotala kolonumbuko oku timihila olosuku vikuavo insensu, kuenje wa sanumula onyeño ya Yehova, Suku yolosekulu viaye.

²⁶ Ovilinga viaye vikuavo, lolonjila viaye viosi, evi viatete levi via sulako, tala, via sonehiwa velivulu liolosoma via Yuda la Isareli.

²⁷ Oco Ahasi wa pekela kumue lolosekulu viaye, yu vo kenda vimbo, vo Yerusalãi, momo ka vo tualele kayambo olosoma via Isareli. Omolaye Hesekiya wa piñala komangu yaye.