II ASAPULO 27 - Embimbiliya - Bíblia Sagrada em Umbundu

¹ Yotama eci a fetika oku viala wa kala lanyamo akuĩ avali la atãlo. Kuenje wa viala anyamo ekui lepandu ko Yerusalãi. Onduko ya inaye Yerusia, omõla a Sadoke.

² Eye wa linga eci ca sunguluka kovaso a Yehova, ndeci muẽle ca lingaile isiaye Usiya, puãi ka lukutile oku iñila vonembele ya Yehova. Haimo omanu lopo va linga cĩvi.

³ Konjo ya Yehova wa tungako ombundi yokonano, ndaño kocimbaka ca Ofele wa tungako calua.

⁴ Wa tungavo ovaimbo kolomunda via Yuda kuenda vasisi wa tungamo olombonge lovivundilo.

⁵ Wa liyakavo losoma ya va Amoni, kuenje wa yi yula. Unyamo waco, va Amoni va wiha ocita colotalendo viopalata, lekui liolohulukãi violonjongo viotiliku, kuenda ekui liolohũlukãi violonjongo viosevata. Eci oco va Amoni vo lambuila, ndaño kunyamo watatu.

⁶ Oco Yotama wa kuata unene, momo wa sokiyaila olonjila viaye kovaso a Yehova Suku yaye.

⁷ Ovilinga vikuavo via Yotama, lovilunga viaye viosi lolonjila viaye, tala, via sonehiwa velivulu liolosoma via Isareli la Yuda.

⁸ Wa kala lanyamo akui avali la atãlo eci a fetika oku viala, kuenje wa viala anyamo ekui lepandu ko Yerusalãi.

⁹ Yotama wa pekela lolosekulu viaye, kuenje vo kenda vimbo lia Daviti. Omolaye Ahasi wa piñala komangu yaye.