II ASAPULO 26 - Embimbiliya - Bíblia Sagrada em Umbundu

¹ Omanu vosi va Yuda va vialeka Usiya ha piñala komangu yaisiaye Amasiya. Eye wa kala lanyamo ekui lepandu.

² Wa tunga Eloti, yu lia linga vali lia Yuda. Koloneke viaco Soma wa pekela ale kumue lolosekulu viaye.

³ Usiya eci a fetika oku viala wa kala lanyamo ekui lepandu. Kuenje wa viala ko Yerusalãi anyamo akui atãlo la avali. Onduko ya inaye Yekoliya, u Yerusalãi.

⁴ Wa lingainga eci ca sunguluka kovaso a Yehova, ndeci cosi ca lingaile isiaye Amasiya.

⁵ Wa likapela oku sanda Suku, koloneke via Sakariya, haeye wo longisa usumba wa Suku. Osimbu a sanda Yehova, Suku wo sumuluisa.

⁶ Wa tundila oku yaka la va Filisiti. Wa lundula ocimbaka ca Gati, locimbaka ca Yavine, locimbaka ca Asidode. Wa tunga ovaimbo vofeka ya Asidode kuenda pokati ka va Filisiti.

⁷ Suku wo kuatisa oku yaka la va Filisiti, la va Arabia va kala ko Guru Baale la va Neuni.

⁸ Va Amoni va iha Usiya olombanjaile. Oluhimo luaye lua sandokaila toke kolongave viEgito, momo wa kuata unene wa lua.

⁹ Usiya wa tungavo olombonge vo Yerusalãi, kombundi yevindi, lokombundi yocimbota, lokevindi liocimbaka, kuenje wa vi pamisa.

¹⁰ Wa tunga olombonge vekalasoko. Wa fẽla ovisimo vialua, momo wa kala loviunda vinene vovimbota lovatapi. Wa kalavo lolongunja lavakuayuva kolomunda lokovapia a volela, momo wa sola upange woku lima.

¹¹ Usiya wa kalavo lolohoka viasualali, va endaenda ovimuka kovita, ndomo va tendiwa lusonehi Yeyele la kesongo Maaseya, haivo va songuilua la Hananiya, umue povakesongo va Soma.

¹² Akulu vosi vapata, haivo alume va pama vakuotõi va soka olohulukãi vivali lovita epandu kalume.

¹³ Ovo va tumila olohoka viasualali va soka ovita vitatu lepanduvali kolohũlũkãi lovita vitãlo vialume, va tela oku yaka kovita lolohõlo vialua ha va kuatisa Soma oku liyaka lunyali.

¹⁴ Usiya wa sokiyila olohoka viosi oviyepelo, lolonjelia, lolokapasete viutale, lovikutu viutale, lolohonji, lovawe apipili.

¹⁵ Vo Yerusalãi wa pangamo olomakina vioku asa ovisongo lovawe anene, haivio via sovuiwa lalume va loñoloha, via kapiwa kilu liolombonge lokavindi ovimbaka. Oluhimo luaye lua sandokaila kupala, momo wa kuatisiwa cimue ci komohisa, toke a kuata unene.

¹⁶ Puãi eci a kuata unene, utima waye wa lenda wo nyõla, kuenje wa lueyela Yehova Suku yaye. Wa iñila vonembele ya Yehova oku timiha insensu kutala winsensu.

¹⁷ Puãi ocitunda Asariya wo landuilamo, kumue lakui ecelala kovitunda via Yehova, haivo alume vakuotõi.

¹⁸ Yu va tamalala la Soma Usiya, va popia laye vati, Hacoveko, a Usiya, oku timihila Yehova insensu, ci tiamela lika kovitunda omãla va Arone, vana va tumbikilua oku timiha insensu. Tunda vocitumãlo ci kola, momo wa lueya kuenda ka ci ku muisa ale ulamba kovaso a Yehova Suku.

¹⁹ Usiya yu wa tema. Wa kala lociyukilo peka liaye ha timiha insensu puãi osimbu a temela ovitunda, ovilundu vio veta vopolo yaye kovaso ovitunda, vonjo ya Yehova, konele yutala winsensu.

²⁰ Ocitunda cinene Asariya lovitunda viosi vio vanja, kuenje tala, ovilundu vievi vopolo yaye. Oco vo leñuila posamua lonjanga, leye muẽle wa yayulako oku tunda, momo Yehova wo veta.

²¹ Soma Usiya wa linga ukuavilundu toke keteke a tula omuenyo. Wa likaila lonjo yaye, omo ukuavilundu. Vonjo ya Yehova wa tepiwamo. Kuenje Yotama omõlaye, wa songuila onjo ya Soma, haeye wa viala omanu vofeka.

²² Ovilinga vikuavo via Usiya, evi viatete levi via sulako, uprofeto Isaya, omõla a Amosi, wa vi soneha.

²³ Usiya wa pekela lolosekulu viaye, kuenje vo kenda kumue lolosekulu viaye vusenge wayambo olosoma, momo vati, eye ukuavilundu. Omolaye Yotama wa piñala komangu yaye.