II ASAPULO 25 - Embimbiliya - Bíblia Sagrada em Umbundu

¹ Amasiya, eci a fetika oku viala, wa kala lanyamo akui avali la atãlo, kuenje wa viala anyamo akuĩ avali lecea ko Yerusalãi. Onduko ya inaye Yehoadana, u Yerusalãi.

² Wa linga eci ca sunguluka kovaso a Yehova, puãi halutima wosiko.

³ Eci usoma wa kolisilua povaka aye, wa ponda akuenje vaye, vana va ipaile Soma isiaye.

⁴ Puãi, omãla vavo eye ka va ipaile, wa linga ndeci ca sonehiwa vocihandeleko, velivulu lia Mose, ndeci Yehova a handeleka, hati, Vaisia ka va ka ipailue omãla, ndaño omãla ka va ka ipailue vaisia; omunu lomunu a file ekandu liaye muẽle.

⁵ Amasiya wongolola alume vosi va Yuda, kuenje wa tepa tepa Yuda yosi la Benjamin! ndapata olosekulu viavo kumue lavakesongo liolohulukãi lava vovita. Wa tenda vakuanyamo akuĩ avali lava va pitahalamo, yu wa sanga ovita vitatu kolohũlũkãi vialume va noliwa, veya voku enda kovita, va tela oku yaka lonjelia lociyepelo.

⁶ Wa kongavo ocita colohũlũkãi kalume vo kIsareli, va pama haivo vakuotõi, kuenje wa va feta ocita colotalendo viopalata, ha vo yakisako.

⁷ Puãi kokuaye kueya omunu umue wa Suku, wa popia hati, A Soma, ku ka tave okuti olohoka via Isareli vienda kumue love, momo Yehova ka kasi la Isareli, ndaño la va Efarimi yaco vosi.

⁸ Haimo nda o yongola oku enda, kuatako, lipamisila ovita, puãi Suku o laika oku ku kupuila kovaso unyali, momo Suku o kuete unene woku kuatisa, lowu woku kupula.

⁹ Kuenje Amasiya wa popia lomunu wa Suku, hati, Puãi tu linga nye locita colotalendo viopalata, vina nda ecele kolohoka via Isareli? Omunu wa Suku wa tambulula hati, Suku o tela oku ku iha vali calua, oco ci sule.

¹⁰ Oco olohoka vina via wiyililile kEfarimi, Amasiya wa vi tepamo, ha vi endi kofeka yavio. Kuenje va funguila calua Yuda, yu va tiukila kofeka yavo, onyeño ka va likuete.

¹¹ Amasiya wa kuata utoi, yu wa tunda lomanu vaye, wa enda kocimbota comongua kuenje po va Seire wa ipapo ekui liolohũlũkãi komanu.

¹² Ekui likuavo liolohũlũkãi viomanu, va Yuda va vambata lomuenyo toke kilu liewe limue, kuenje va va kunyuila posi, oco vosi va nyanyoha.

¹³ Puãi alume volohoka, vana Amasiya a tiuwiyile oco ka va ka ende kumue laye kovita, vondumuhila ovaimbo a Yuda, tunde ko Samaria toke ko Betehorone. Va ipako olohulũkãi vitatu viomanu, kuenda va punda vialua.

¹⁴ Eci Amasiya a tiuka koku kundula va Edome, wa nena olosuku via va Seire. Wa vi tumbika ndolosuku viaye. Wa vi fendela loku vi timihila insensu.

¹⁵ Oco onyeño ya Yehova ya wengukila Amasiya, wa tuma uprofeto kokuaye, yu wa popia laye hati, Wa sandiliyila nye olosuku viomanu vina ka via popelele omanu vavio peka liove?

¹⁶ Osimbu a kala loku vangula, Soma wa popia laye hati, Tua ku lingisa nga ondunguli ya Soma? Uhako. O yonguila nye oku fa? Oco uprofeto wohako, puãi hati, Nda kuliha okuti Suku wa panga oku ku nyõla momo wa linga ndoco, kuenda kua yevele elungulo liange.

¹⁷ Eci va longelelapo Amasiya, Soma ya Yuda, oco wa tuma ku Yoasi, omõla a Yehoahasi, omõla a Yehu, Soma ya Isareli, hati, Enju, tu limole kolopolo.

¹⁸ Yoasi, Soma ya Isareli, wa tuma ku Amasiya, Soma ya Yuda, hati, Ocikualu covo Levanone ca tuma ondaka kocinendele covo Levanone citi, Eca omõlove ukãi ha likuela lomolange. Oco kua pita ocinyama covusenge, covo Levanone, kuenje ca liataila ocikualu.

¹⁹ Ove o popia huti, Tala, nda yula Edome. Kuenje utima wove wa lenda loku lipanda. Puãi kaliye tumala kimbo liove. Nye o kuetele olumbue leci ci ku valula, hã hu kupuka, ove kumue la Yuda?

²⁰ Puãi Amasiya ka yonguile oku yevako, momo ca tunda ku Suku wa panga ale oku va eca peka liovanyali vavo, momo va sandele olosuku viEdome.

²¹ Oco Yoasi, Soma ya Isareli, wa katuka. Eye la Amasiya, Soma ya Yuda, va limõla kolopolo ko Bete Siemese yoko Yuda.

²² Yuda wa yuliwa la Isareli, kuenje omunu lomunu wa tilila konjo yaye.

²³ Yoasi, Soma ya Isareli, wa kuatela Amasiya, Soma ya Yuda, omõla a Yoasi, omõla a Ahasiya, ko Bete Siemese. Wo nena ko Yerusalãi kuenje kocimbaka ca Yerusalãi wa lundulako ca soka ovita vikuãla kovikeya, tunde kombundi ya Efarimi toke kombundi yevindi.

²⁴ Wopa ulu wosi lopalata, lovikuata viosi via kala la Oved Edome vonjo ya Suku. Wopavo ovokuasi onjo ya Soma, lomanu va linga ndolonjeke, kuenje wa tiukila ko Samaria.

²⁵ Kovaso yokufa kua Yehoasi omõla a Yehoahasi Soma ya Isareli, Amasiya omõla a Yoasi Soma ya Yuda, wa tumãla handi anyamo ekui la atãlo.

²⁶ Ovilinga vikuavo via Amasiya, evi viatete levi via sulako, ka via sonehelue hẽ velivulu liasapulo olosoma via Yuda la Isareli?

²⁷ Tunde apa Amasiya a pambuka koku kuama Yehova, oco vo tumbikila ongombo ko Yerusalãi. Wa tilila ko Lakisi. Puãi va tuma oku u landula ko Lakisi, kuenje oko va wipaila.

²⁸ Va wambatela kotuvalu, yu vo kenda vimbo lia Daviti kumue lolosekulu viaye.