II ASAPULO 24 - Embimbiliya - Bíblia Sagrada em Umbundu

¹ Yoasi eci a fetika oku viala wa kala lanyamo epanduvali. Wa viala anyamo akuĩ akuãla vo Yerusalãi. Onduko ya inaye Siviya, u Bereseva.

² Yoasi wa linga eci ca sunguluka kovaso a Yehova, koloneke viosi viocitunda Yehoyada.

³ Yehoyada wo vanjela akãi vavali, kuenje wa cita omãla valume lomãla vakãi.

⁴ Kovaso yaco Yoasi wa panga oku tumbulula onjo ya Yehova.

⁵ Wongoluila pamosi ovitunda la va Lewi, kuenje wa popia lavo hati, Kuendi kovaimbo a Yuda, kongoli kIsareli yosi olombongo vioku tumbulula onjo ya Suku yene, unyamo kunyamo. Yayuisiko ondaka yaco. Puãi va Lewi ka va yi yayuisileko.

⁶ Soma wa pañinya usongui Yehoyada, kuenje wa popia lave hati, Nye kua vetiyilile va Lewi oku kongola ko Yuda loko Yerusalãi elisimu lia Mose ukuenje wa Yehova, lina a tukuila ohongele ya Isareli ha li lingi liombalaka yuvangi?

⁷ Momo omãla va Ataliya, ukãi una uvi, va nyõla onjo ya Suku. Ovikuata viosi vi kola vionjo ya Yehova, va vi lingisa vio voBaale.

⁸ Oco Soma wa tuma oku panga ocikasa, kuenje va ci kapa posamua, pombundi yonjo ya Yehova.

⁹ Va imba oluiya ko Yuda la Yerusalãi yosi, ha va nenela Yehova elisimu lina Mose ukuenje wa Suku a tukuilile Isareli vekalasoko.

¹⁰ Olombuale viosi lomanu vosi va sanjuka kuenje va nena elisimu liavo, yu va limba vocikasa toke va mala.

¹¹ Olonjanja viosi va Lewi va nena ocikasa kakulu va Soma, eci va limbuka okuti muli olombongo vialua, oco usonehi wa Soma lukulu wocitunda cinene veya, va sukumula ocikasa, va ci yelulapo loku ci tiuwiya vali apa ca kala. Oco va lingainga eteke keteke, kuenje vongeka olombongo viakahandangala.

¹² Soma la Yehoyada va vi eca kuava va kala locikele cupange wonjo ya Yehova. Lovo va fetela vakuakusonga ovawe lolokalupindelu ha va tumbulula onjo ya Yehova, lolomesele viutale losipi ha vi tumbulula onjo ya Yehova.

¹³ Oco olondingupange via talavaya, kuenje upange wamako povaka avo. Va tumbulula onjo ya Suku, kuenje yeyamo vali, kuenda va yi kolisa.

¹⁴ Eci va mala, va nena ocisupe colombongo ku Soma la Yehoyada. Va panga lavio ovikuata vionjo ya Yehova, evi viupange, levi vioku lumbila ovilumba vioku pia elisi, latiyela lovikuata viulu lopalata. Va lumbaila ovilumba vioku pia elisi vonjo ya Yehova, oloneke viosi via Yehoyada.

¹⁵ Puãi Yehoyada wa kuka, wa linga ekongo, kuenje wa fa. Wa kala lanyamo ocita lakui atatu eci a fa.

¹⁶ Vo kenda vimbo lia Daviti, pokati kolosoma, momo wa linga ciwa kIsareli, loku Suku lonjo yaye.

¹⁷ Kovaso yokufa kua Yehoyada, olombuale vio ko Yuda vieya, yu via fendela Soma. Oco Soma wa va yevelela.

¹⁸ Va yanduluka onjo ya Yehova, Suku yolosekulu viavo, kuenje va vumba Asera loviteka. Oco onyeño ya Yehova ya wilila Yuda la Yerusalãi ongole eyi yavo.

¹⁹ Haimo wa va tumisa ovaprofeto, ha va va tiuwiya vali ku Yehova. Yu va tamalala lavo, puãi ovo ka va va yevele.

²⁰ Espiritu lia Suku lia wila Sakariya, omõla a Yehoyada ocitunda. Wa talama kovaso omanu, kuenje wa popia lavo hati, Ca popia Suku ceci, hati, Vu nyolela nye ovihandeleko via Yehova, ho lipumbisa esumulũho? Omo wa yanduluki Yehova, eye wo yandulukivo.

²¹ Oco vo tumbikila ongombo, kuenje vo sosuila lovawe vocitali conjo ya Yehova, ndomo Soma a ci handelekele.

²² Soma Yoasi ka ivalukile ohenda Yehoyada isiaco o lingile, puãi wa ponda omolaye. Eci a kala loku fa, wa popia hati, Yehova a vanjeko, kuenda a ci fetuluinye.

²³ Kesulilo liunyamo, ohoka ya va Suria ya katukila Yoasi. Veya ko Yuda la Yerusalãi, kuenje va ipa olombuale viosi via kala pokati komanu. Cosi va va punda va ci tuma kosoma yoko Damasko.

²⁴ Ohoka ya va Suria, ndaño yeya lomanu va sule, haimo Yehova wa eca povaka avo olohoka vinenenene, momo va yandulukile Yehova, Suku yolosekulu viavo. Oco va tẽlisa episo lia tukuilua Yoasi.

²⁵ Eci va tunda kokuaye loku u sia lolongembia vialua, akuenje vaye muẽle vo lingilila usuanji osonde yomãla vocitunda Yehoyada. Yu vo wipaila pula waye, kuenje wa fa. Vo kenda vimbo lia Daviti puãi havayambo olosomako.

²⁶ Vo lingila usuanji vava: Savada omõla a Simeata ukãi u Amoni, la Yehosavada omõla a Simiriti ukãi, u Moavi.

²⁷ Kaliye omãla vaye lovina vinenenene vio silihiwa kuenda okutumbuluiwa kuonjo ya Suku, cosi muẽle ca sonehiwa valomboluilo elivulu liolosoma. Kuenje omolaye Amasiya wa piñala komangu yaye.