II ASAPULO 23 - Embimbiliya - Bíblia Sagrada em Umbundu

¹ Kunyamo wepanduvali, Yehoyada wa kuata utoi kuenje wa lisila ocisila lavakesongo kovita, Asariya omõla a Yerohama, la Isameli omõla a Yehohanana, la Asariya omõla a Ovede, la Maaseya omõla a Adaya, la Elisiafata omõla a Sikiri.

² Kuenje va ñuala ko Yuda, vongolola va Lewi vokovaimbo osi a Yuda kumue lolosekulu viapata a Isareli. Yu veya ko Yerusalãi.

³ Ohongele yosi ya lisila ocisila la Soma vonjo ya Suku. Kuenje Yehoyada wa popia lavo hati, Tali omõla a Soma. A viale, ndeci Yehova a popela omãla va Daviti.

⁴ Eci vu linga ceci: Onepa yimue yovitunda la va Lewi va tunda kupange kesambata va lave kolombundi.

⁵ Onepa yavali yi kale kelombe, leyi yatatu yi kale kombundi ya Yesode. Omanu vosi va kale vovitali vionjo ya Yehova.

⁶ Lomue ka ka iñile vonjo ya Yehova, te lika ovitunda la va Lewi vakuopange. Ovo va tela oku iñila momo va kola. Puãi omanu vosi va lave ocikundi ca Yehova.

⁷ Va Lewi va ñuale Soma, omunu lomunu lovimaleho viaye peka. Wosi iñila vonjo, ipaiwa. Kali kumue la Soma eci a iñila leci a tunda.

⁸ Va Lewi la Yuda yosi va linga cosi ca va handeleka ocitunda Yehoyada. Omunu omunu weya lalume vaye, ava va tunda kupange kesambata, lava veya kupange kesambata. Momo ocitunda Yehoyada ka sanduile ovisoko.

⁹ Ocitunda Yehoyada wa eca kovakesongo olonjelia loviyepelo vinene levi vitito, vina via kaile via Soma Daviti, haivio via kala ño vonjo ya Suku.

¹⁰ Wa talamisa omanu vosi, omunu omunu lovimaleho viaye peka. Va ñuala Soma tunde konele yondio yonjo toke konele yepili yonjo. Va ñualavo utala, lovolonele vionjo.

¹¹ Oco wamisako omõla a Soma, wa kapa ekolowa kutue waye, kuenda wa wiha uvangi. Vo vialeka ndosoma, kuenje Yehoyada lomãla vaye vo waveka ulela. Va popia vati, Soma a kale lomuenyo.

¹² Eci Ataliya a yeva onjuela yomanu va lupoka loku sivaya Soma, oco weya komanu vonjo ya Yehova.

¹³ Yu wa vanja kuenje ota, Soma o tailili pongunji yaye pombundi. Vakesongo lavakuakusika olombeta va tailili Soma. Owiñi wosi wofeka wa sanjuka loku sika olombeta. Olonjimbi via songola ovisungo viesivayo lovisikilo viavo. Oco Ataliya wa tola uwalo waye kuenje wa kaluka hati, Usuanji, usuanji!

¹⁴ Oco ocitunda Yehoyada wamisako vakesongo liolohoka kuenje wa popia lavo hati, U tundisi pokati kovilala. U wosi u kuama, a ipaiwe losipata. Momo ocitunda ca popia citi, Ko ka wipaili vonjo ya Yehova.

¹⁵ Oco vo kuata. Wa pitila kombundi yotuvalu, kombundi yelombe, haiko va wipaila.

¹⁶ Yehoyada wa lisila ocisila eye lomanu vosi la Soma, okuti va linga omanu va Yehova.

¹⁷ Omanu vosi va enda konjo ya Baale, yu va yi lundula. Ovotala aye loviñumañuma viaye va vi nyanyola pe, yu va ipaila Matana ocitunda ca Baale kovaso yovotala.

¹⁸ Yehoyada wa nolela onjo ya Yehova olondavululi, via songuilua lovitunda la va Lewi, vana Daviti a tepaile kovisoko vonjo ya Yehova, ha va lumbila Yehova ovilumba vioku pia elisi, ndomo ca sonehiwa vovihandeleko via Mose, lonjolela lovisungo ndocihandeleko ca Daviti.

¹⁹ Vakualombundi wa va kapa kolombundi vionjo ya Yehova, oco ka ku ka iñile umue ka yelele.

²⁰ Wa enda lavakesongo liovita, lolombuale, lolombiali viomanu, lomanu vosi vofeka, yu va tunda la Soma vonjo ya Yehova. Va pitila kombundi yokonano yelombe, kuenje va tumbika Soma kocalo cusoma.

²¹ Oco omanu vosi vofeka va sanjuka, kuenda imbo lia pola, momo va ipa Ataliya losipata.