II ASAPULO 22 - Embimbiliya - Bíblia Sagrada em Umbundu

¹ Oco olonungi via Yerusalãi komangu yaye via vialekako Ahasiya, omõlaye umalehe. Momo omãla vosi vakulu va ipailue locimuka comanu vana veyile kocilombo kumue la va Arabia. Oco Ahasiya, omõla a Yehorama, Soma ya Yuda, eye wa viala.

² Ahasiya eci a fetika oku viala, wa kala lanyamo akuĩ avali la avali, kuenje wa viala unyamo ko Yerusalãi. Onduko ya inaye Ataliya, omõla a Omiri.

³ Wa endailavo volonjila viepata lia Ahava, momo inaye wo longa oku linga cĩvi.

⁴ Wa linga eci cĩvi kovaso a Yehova, ndeci ca linga epata lia Ahava, momo kovaso yokufa kua isiaye, ovo vo longa longa, loku u sindila kenyoleho.

⁵ Wa kuama elungulo liavo, kuenje wa enda kumue la Yehorama, omõla a Ahava, Soma ya Isareli, oku ka liyaka la Hasaele, Soma ya Suria, ko Ramote Gileada. Kuenje va Suria va lemeha Yorama.

⁶ Yu wa tiukila ko Yesirele, ha kayisua olombole vo lemehele ko Rama, cina a liyaka la Hasaele, Soma ya Suria. Ahasiya omõla a Yehorama, Sorm ya Yuda, wa lokila ko Yesirele, oku pasula Yehorama, omõla a Ahava, momo wa kala loku vela.

⁷ Suku wa panga okuti Ahasiya o sanga enyoleho poku pasula Yorama, momo eci eyako, eye kumue la Yehorama, va katukila Yehu omõla a Nimisi, una Yehova a wavekelele oku nyõla epata lia Ahava.

⁸ Oco eci Yehu a kala loku telisa episo lia tukuilua epata lia Ahava, oco wa sanga olombuale via Yuda kumue lomãla va vamanja a Ahasiya, vana va vumba Ahasiya, kuenje wa va ponda.

⁹ Wa sanda Ahasiya, yu vo kuata eci a sokele oku salama vo Samaria. Vo nena ku Yehu kuenje vo ponda. Yu vo kenda momo va popia vati, Eye omõla a Yehosafata, una wa sandele Yehova lutima waye wosi. Oco epata lia Ahasiya ka lia kaile vali longusu yoku talamisa usoma.

¹⁰ Eci Ataliya ina ya Ahasiya a mõla okuti omolaye a fa, wa votoka kuenje wa kundula vosi vakuambuto yusoma wepata lia Yuda.

¹¹ Puãi Yehosiaveata, omõla a Soma, wa yelula Yoasi, omõla a Ahasiya, wo yombolola pomãla va Soma vana va ipaiwa, kuenje vo kapa vohondo yoku pekela kumue lu wo nyamisa. Yehosiaveata, omõla a Soma Yehorama, haeye ukãi wocitunda Yehoyada. Omo eye mukãi wa Ahasiya, oco wo vundisa ku Ataliya, kuenje ka wipaile.

¹² Yoasi wa kala lavo, vo salamisa vonjo ya Suku anyamo epandu, osimbu Ataliya a viala ofeka.