II ASAPULO 20 - Embimbiliya - Bíblia Sagrada em Umbundu

¹ Kovaso yaco va Moavi la va Amoni la vamue pova Meunimi va katuila Yehosafata ovita.

² Kueya vamue va sapuila Yehosafata, vati, Ku kasi loku iya owiñi unene, wa ku tundila kEdome, sinyolio liokalunga. Kuenje tala, va tai ale ko Hasasoni Tamare, kEngedi.

³ Oco Yehosafata wa yokoka kuenje wa likapela oku sanda Yehova, yu wa handeleka vo Yuda yosi oku likandangiya okulia.

⁴ Kuenje Yuda ya liongolola oku pinga ekuatiso ku Yehova, oco vokovaimbo osi a Yuda veya ha va sandi Yehova.

⁵ Yehosafata wa talama vohongele ya Yuda la Yerusalãi, vonjo ya Yehova, kovaso yocitali cokaliye.

⁶ Yu wa popia hati, A Yehova, Suku yolosekulu vietu, haveko hẽ Suku kilu? Haveko hẽ o viala ovosoma osi olofeka? Peka liove pali unene lupami, kuenje lomue o tela oku tamalala love.

⁷ Haveko he, a Suku yetu, wa tundisa olonungi viofeka yilo kovaso omanu vove va Isareli? Kuenda kua yecele hẽ otembo ka yi pui kombuto yekamba liove Avirahama?

⁸ kuenje va tumalamo, kuenda va tungilamo onduko yove ocitumãlo ci kola, vati,

⁹ Nda olohali vi tu veta, ndeci osipata pamue efengi pamue vali elambu, tu talama kovaso onjo yilo lokovaso ove, momo onduko yove yi li vonjo yilo, kuenda vohali yetu tu vilikiya kokuove, love o tu yeva hu tu popela.

¹⁰ Kaliye tala, va Amoni la va Moavi lava vokomunda Seire, vana kua tavele okuti Isareli a va iñilile vofeka yavo, cina va tundilile kofeka yEgito, puãi va va pita vonele, yu ka va va kunduile,

¹¹ tala ndomo va tu pandula loku iya oku tu tundisa vofeka yove yina wa tu ihile ndocipiñalo.

¹² A Suku yetu, ku yongola hẽ oku va yambula? Momo layimue ongusu tu kuete kovaso owiñi wakahandangala u tuiyilila ndeti. Leci tu linga ka tu ci lete, puãi tu imba ovaso kokuove.

¹³ Yuda yosi ya talama kovaso a Yehova, kumue loloñaña viavo lakãi vavo kuenda omãla vavo.

¹⁴ Vokati kohongele, Espiritu lia Yehova lia wila Yahasiyele, omõla a Sakariya, omõla a Benaya, omõla a Yeyele, omõla a Mataniya, u Lewi wopo va Asafe.

¹⁵ Wa popia hati, Ove a Yuda yosi, lene alonungi via Yerusalãi, love a Soma Yehosafata, yeveleli! Eci oco ca popia Yehova kokuene, hati, Ko ka saluki, ko ka yokokeli owiñi u wakahandangala, momo heneko vu ka yaka, te Suku.

¹⁶ Hela lokili kokuavo, ovo va ka lamana lowulu wa Sisi, lene vu ka va sanga kombuelo yocimbota, oku lisuñama lekango lia Yeruele.

¹⁷ Vocilunga eci, heneko vu kuete oku yaka. Kuendiko, ka talameli ño ha vu mõli ndomo Yehova u popeli, ove a Yuda, love a Yerusalãi. Ko ka saluki, ko ka yokoki ño! Hela va tundili, momo Yehova o kala lene.

¹⁸ Oco Yehosafata wa petamisa utue waye, locipala caye wa ci tuvika posi, kuenda Yuda yosi, lolonungi via Yerusalãi va wila posi kovaso a Yehova, oku fendela Yehova.

¹⁹ Va Lewi vopo va Kohata lava vopo va Korihi, va votoka vilu oku sivaya Yehova, Suku ya Isareli, lolukandi.

²⁰ Oco va tunda omẽle ociteketeke, yu va enda toke kekango lia Tekoa. Eci va kala loku enda, Yehosafata wa talama kuenje wa popia hati, A Yuda lene alonungi via Yerusalãi, njeveleli! Koleli Yehova Suku yene, oco vu kola ngo. Koleli ovaprofeto vaye, oco cu wendi ciwa.

²¹ Eci a puliliya omanu, oco wa tukula olonjimbi, yu va pita kovaso yolohoka loku wala uwalo u kola, kuenje va imbila Yehova loku u sivaya vati, Panduli Yehova, momo ohenda yaye ka yi pui.

²² Eci va fetika oku imba loku sivaya, oco Yehova wa kapa vamue va lavekela va Amoni la va Moavi kuenda ava vomunda Seire, haivo va katukila Yuda, kuenje va lunduiwa.

²³ Momo va Amoni la va Moavi va katukila olonungi viomunda Seire, ha va va ipa loku va kundula pe. Eci va malusulapo olonungi via Seire, va likuatisa oku lipa pokati omunu lomunu.

²⁴ Eci va Yuda va pitila kilu liomunda ya imba ovaso vekango, va vanja kowiñi, kuenje tala, wa liyala posi, wa fa elindi, lomue wa pulukapo.

²⁵ Eci Yehosafata lomanu vaye veya oku vopa ovikuata viavo, va sanga pokati kovivimbi ovokuasi alua, lovikuata via tĩla. Va pundapo vialua, ndaño oku vi ambata ka va ci telele. Kuenje va kalako oloneke vitatu, oku pupula ovikuata, momo via lua.

²⁶ Keteke liakuala puãi va Mongolia vocimbota ca Beraka, momo oko va sivayaila Yehova. Oco ocimbota caco ca lukiwa ocimbota ca Beraka, toke etaili lilo.

²⁷ Omanu vosi va Yuda la Yerusalãi va tiuka, kuenje Yehosafata wa va pitila kovaso, yu va tiukila ko Yerusalai lesanju, momo Yehova wa va muisa esanju poku va popela kovanyali vavo.

²⁸ Va iñila vo Yerusalai loku sika ovisumba lolohalupa lolombeta, toke konjo ya Yehova.

²⁹ Usumba wa Suku wa kuata ovosoma osi olofeka, eci va yeva okuti Yehova wa yaka lovanyali va va Isareli.

³⁰ Oco usoma wa Yehosafata wa enda posi, momo Suku yaye wa wiha etulumuho kolonele viosi.

³¹ Omo Yehosafata a viala omo ko Yuda. Eci a fetika oku viala, wa kala lanyamo akui atatu la atãlo. Yu wa viala anyamo akui avali la atãlo ko Yerusalai. Onduko ya inaye Asuva, omõla a Silihi.

³² Wa endaila vonjila ya isiaye Asa, kuenje ka pambukilemo, wa linga eci ca sunguluka kovaso a Yehova.

³³ Haimo lumue, olonumbuko ka viopilueko, momo omanu lopo ka va tiamisile ovitima viavo ku Suku yolosekulu viavo.

³⁴ Ovilinga vikuavo via Yehosafata, evi viatete levi via sulako, via sonehiwa vasapulo a Yehu, omõla a Hanani, ana a vokiyiwa velivulu liolosoma via Isareli.

³⁵ Kovaso yaco, Yehosafata Soma ya Yuda wa linala la Ahasiya Soma ya Isareli, haeye ondingaivi.

³⁶ Wa linala laye ha va tungi olonaviyu vienda ko Tarsisi. Yu va tunga olonaviyu kEciongevere.

³⁷ Oco Eliesere, omõla a Dodawa u Maresia, wa popela Yehosafata ocitumasuku, hati, Omo wa linala la Ahasiya, Yehova o nyõla ovopange ove. Kuenje olonaviyu via teka teka, yu ka via telele oku enda ko Tarsisi.