II ASAPULO 2 - Embimbiliya - Bíblia Sagrada em Umbundu

¹ Kaliye Salomone wa panga oku tungila onduko ya Yehova onembele kuenda eyemba liaye muẽle.

² Salomone wa tukula akui epanduvali kolohũlũkãi vialume vakuakuambata ovilemo, lakui ecelala kolohũlũkãi va songa ovawe kolomunda, kuenda Olohũlũkãi vitatu lovita epandu kalume va va lavulola.

³ Salomone wa tuma ku Hutama Soma ya Turo, hati, Ndeci wa lingaile la tate Daviti, kuenje wo tumisaile ovinendele ha litungila onjo yoku kalamo, lingavo ndoco lame.

⁴ Tala, ñasi oku tungila onduko ya Yehova Suku yange onjo si yi tumbika kokuaye oku timihila insensu violosimbolua kovaso aye loku lumbaila olombolo vioku taliwa lovilumba vioku pia elisi, omẽle loñolosi, kasambata lokokumoleha kuosãi, lokolofesta via tukuiwa via Yehova Suku yetu, ndeci ca handelekelua Isareli otembo ka yi pui.

⁵ Onjo ñasi oku tunga yinene, momo Suku yetu unene, haeye o kasi kilu liolosuku viosi.

⁶ Puãi helie o tẽla oku u tungila onjo, nda vilu, lovilu liovailu ka suimo? Ame he, ame elie okuti ndu tungila onjo, nda hacitumãloko cimue ño coku timihila insensu kovaso aye?

⁷ Oco kaliye numise omesele yimue yulu lopalata losipi lutale, haeye omesele yolonanga vi vumbula, lohusu, lonoloti, haeye o tela oku luvikiya, oco a kale kumue lolomesele vi kasi lame vo Yuda lo vo Yerusalãi, vina tate Daviti a nolele.

⁸ Numisekovo oviti viovinendele longaye lalimugi vioko Levanone, momo nda kuliha okuti akuenje vove va loñoloha oku timbula oviti vo Levanone. Oco akuenje vange va kala kumue lakuenje vove,

⁹ ha va ngangiliyila oviti vialua, momo onjo ndi laika oku tunga yinene haiyo ya posoka cimue.

¹⁰ Akuenje vove vakuakutimbula oviti, ndi va iha akui avali kolohũlũkãi violonjongo viotiliku ya vandulua, lakui avali kolohũlũkãi violonjongo viosevata, lakui avali kolohũlũkãi violombatu viovinyu, lakui avali kolohũlũkãi violombatu viulela.

¹¹ Oco Hurama, Soma ya Turo, wa kumbulula lukanda, yu wo tuma ku Salomone hati, Omo Yehova a sole omanu vaye, oco a ku lingisila Soma yavo.

¹² Hurama wa popiavo hati, Yehova, Suku ya Isareli, a sivayiwe, u wa panga ilu losi. Wa eca ku Soma Daviti omõla ukualondunge, wa lunguka haeye ukuovanga, o tungila Yehova onembele kuenda o tungavo eyemba liaye muẽle.

¹³ Kaliye nda tuma Hurama Abi omesele haeye ukualondunge,

¹⁴ omõla ukãi umue wopo va Dani. Isiaye wa kala u Turo. Wa loñoloha kupange wulu lopalata losipi lutale lovawe loviti, haeye omesele yolonanga vi vumbula, lonoloti lohusu kuenda ovalatanya. O luvikiyavo ovina viñi viñi kuenda o songa eci cosi co tukuilua. A kale kumue lolomesele viove, lolomesele via cime cange, so Daviti.

¹⁵ Oco kaliye, otiliku losevata lulela lovinyu vina cime cange a popele, a vi tume kakuenje vaye.

¹⁶ Tu ku timbuila vo Levanone oviti viosi o sukila. Tu ku vi nenela loku vi kuta ovitungu ha vi endi lovava okalunga toke ko Yopa, kuenje ove o vi tuala ko Yerusalãi.

¹⁷ Salomone wa tenda vakualofeka vosi va kala vofeka ya Isareli, vana isiaye Daviti a tendele ale. Kua sangiwa ocita lakui atãlo lavitatu kolohũlũkãi lovita epandu viomanu.

¹⁸ Pomanu vaco, wa tukulapo akui epanduvali kolohũlũkãi vakuakuambata ovilemo, lakui ecelala kolohũlũkãi va songa ovawe kolomunda, kuenda olohũlũkãi vitatu lovita epandu va lavulola omanu loku va talavayisa.