II ASAPULO 19 - Embimbiliya - Bíblia Sagrada em Umbundu

¹ Yehosafata, Soma ya Yuda, wa tiukila lombembua konjo yaye, ko Yerusalãi.

² Yehu omõla ukuavitumasuku Hanani wa tunda oku ñualẽhela laye, kuenje wa popia la Soma Yehosafata, hati, Ca ku sesamẽla hẽ oku kuatisa ondingaivi loku sola ava va suvuka Yehova? Oco onyeño ya Yehova ya ku wengukilila.

³ Haimo lumue kokuove kua sangiwa vimue viwa, okuti wopa oviteka via Asera vofeka kuenda wa kapa utima wove oku sanda Suku.

⁴ Yehosafata wa tumãla ko Yerusalãi, kuenje wa tunda vali ha ñuala pokati komanu tunde ko Bereseva toke kolomunda via Efarimi, kuenje wa va tiuwiya ku Yehova, Suku yolosekulu viavo.

⁵ Wa kapa olonganji vofeka, vovaimbo osi a pama oko Yuda, vimbo lovimbo.

⁶ Yu wa popia lolonganji hati, Sokololi eci vu linga, momo hamunuko vu tetuluila, te Yehova una o kasi kumue lene poku tetulula.

⁷ Oco, kuati usumba wa Yehova. Lunguki leci vu linga, momo ku Yehova Suku yetu ka kuli oku pengisa esunga, ndaño ocame comanu pamue oku tambula ovitukiko.

⁸ Eci va tiukila ko Yerusalãi, Yehosafata wa kapa vamue pova Lewi la vamue povitunda lopovakulu vapata a Isareli oku tetuluilako Yehova loku tepisa olonamalala.

⁹ Wa va kundika hati, Kali lusumba wa Yehova, locili, lutima wa pua evelo. Lingi ndomo:

¹⁰ Olondaka viosi viu neneli vangandiene, vana va tunga vovaimbo avo, ci kale ondaka yumondi, ci kale yimue yocihandeleko, pamue yocikundi pamue yovisila pamue yovihõlo, ene va lunguli, oco ka va ka lueyele Yehova, sanga onyeño yaye yu wengukili, ene la vangandiene.

¹¹ Kuenje tali, ocitunda cinene Amariya, eye usongui wene kolondaka viosi via Yehova, la Sevadiya, omõla a Isameli, eye ombiali yonjo ya Yuda, haeye usongui wolondaka viosi via Soma. Va Lewi vo lingili ndakulu. Kuati kupange lutõi, kuenje Yehova o kala lava va sunguluka.