II ASAPULO 18 - Embimbiliya - Bíblia Sagrada em Umbundu

¹ Yehosafata wa kala lukuasi walua lekemãlo. Wa livala ukamba la Ahava poku kuela omolaye.

² Kovaso yanyamo amue, eye wa lokila ko Samaria ku Ahava. Ahava wa ipaila Yehosafata lomanu va kala kumue laye olomeme lolongombe viakahandangala, kuenda wo tutuminya oku katukila Ramote Gileada.

³ Ahava Soma ya Isareli wa popia la Yehosafata Soma ya Yuda, hati, O yongola hẽ oku enda kumue lame ko Ramote Gileada? Eye wo kumbulula hati, Ame, haime ño ove, omanu vange omanu vove, tu enda love kovita.

⁴ Yehosafata wa popia la Soma ya Isareli, hati, Hu pinga, puliliya handi ondaka ya Yehova.

⁵ Oco Soma ya Isareli wongoluila pamosi ovaprofeto, va soka ovita vikuãla vialume, yu wa popia lavo hati, Ngenda oku liyaka la Ramote Gileada ale, ale ndi liwekapo? Ovo vati, Kuende, momo Suku o yeca peka lia Soma.

⁶ Puãi Yehosafata hati, Kulo hẽ ka kuli uprofeto umue ukuavo wa Yehova ha tu u puliliya?

⁷ Soma ya Isareli wa popia la Yehosafata hati, Kuli omunu umue, Mikaya omõla a Imila, eye o tela oku tu pulilako ku Yehova. Puãi ndu nyale, momo vovitumasuku viaye olonjanja viosi ka mopailako ciwa, te cĩvi. Oco Yehosafata hati, Soma ka ka vangule ndoco.

⁸ Oco Soma ya Isareli wa kovonga ukuenje umue welombe, hati, Yayulako, kope Mikaya, omõla a Imila.

⁹ Kaliye Soma ya Isareli la Yehosafata Soma ya Yuda va wala uwalo wavo wusoma, va tumala u kocalo caye, u kocalo caye. Va tumãla polumbandi luokombundi ya Samaria. Ovaprofeto vosi va kala loku popia ovitumasuku kovaso avo.

¹⁰ Sedekiya omõla a Kenaana wa lipangela olombinga viutale, kuenje hati, Ca popia Yehova ceci, hati, O ka toma va Suria lolombinga evi toke va kunduka.

¹¹ Ovaprofeto vosi va popia ocitumasuku citi, Kuende ko Ramote Gileada, o ka yula, momo Yehova o yeca peka lia Soma.

¹² Omunga yina ya ka kovongele Mikaya ya popia laye yiti, Tala, olondaka viovaprofeto vi likuete kumosi oku popela Soma eci ciwa. Oco hu pinga, ondaka yove yi linge ndeyi yavo, popiavo ciwa.

¹³ Mikaya hati, La Yehova o kasi lomuenyo, eci Suku yange a sapuila, haico mopia.

¹⁴ Eci eya ku Soma, Soma wa popia laye hati, A Mikaya, tu enda oku liyaka la Ramote Gileada ale, ale ndi liwekapo? Eye wa tambulula hati, Kuende, o ka yula, momo va eciwa peka liene.

¹⁵ Puãi Soma wa popia laye hati, Olonjanja viñami hu lipilikila siti, Ku ka sapuile cimue caño, te eci cocili vonduko ya Yehova?

¹⁶ Mikaya hati, Nda mõla Isareli yosi ya sandokaila kolomunda, ndolomeme ka vi kuete ungombo. Kuenje Yehova hati, Avandeti ka va kuete cime cavo. Va tiukile lombembua omunu omunu konjo yaye.

¹⁷ Soma ya Isareli wa popia la Yehosafata hati, Sia ku sapuilile hẽ okuti eye ka mopela ciwa vocitumasuku caye, te cĩvi?

¹⁸ Mikaya hati, Oco yevelela ondaka ya Yehova. Nda mõla Yehova wa tumãla kocalo caye, kuenda olohoka viosi viokilu vi tai kondio yaye lokepĩli liaye.

¹⁹ Kuenje Yehova hati, Helie o tamba Ahava, Soma ya Isareli, oco a ende ko Ramote Gileada, ha takelako? U wa tambulula eci, u wa tambulula eci.

²⁰ Kuenje espiritu limue lieya, lia talama kovaso a Yehova, liti, Ame ndu tamba. Yehova wa popia lalio hati, U tamba la nye?

²¹ Eye hati, Nunda ha linga espiritu liuhembi vomẽla wovaprofeto vaye vosi. Yehova hati, Ove o ko tamba, haive u yula. Kuende, ci linga.

²² Kaliye tala, Yehova wa kapa espiritu liuhembi vomẽla wovaprofeto vove avandeti. Yehova wa ku tukuila eci civi.

²³ Oco Sedekiya omõla a Kenana wamako, yu wa tendula Mikaya ocikusi, kuenje hati, Espiritu lia Yehova lia pita pi, yu lia tunda kokuange ha li vangula love?

²⁴ Mikaya hati, Tala, o ci limbuka eteke liaco, eci o ka salama vohondo yovokati.

²⁵ Soma ya Isareli wa popia hati, Kuata Mikaya, tiukila laye ku Amoni, sekulu yimbo, loku Yoasi omõla a Soma.

²⁶ Ka linge huti, Ca popia Soma ceci, hati, Kapi omunu u vokayike, u tekuli lokulia kuohali, u nyuisi ovava ohali, toke niuka lombembua.

²⁷ Mikaya, hati, Nda o tiuka ocili lombembua, Yehova ka popele lame. Kuenda wa popia hati, Ene alofeka viosi, yeveleli!

²⁸ Oco Soma ya Isareli la Yehosafata Soma ya Yuda va enda ko Ramote Gileada.

²⁹ Soma ya Isareli wa popia la Yehosafata, hati, Poku enda kocilunga, ndi liviaviaiya, puãi ove wala ño uwalo wove wusoma. Oco Soma ya Isareli wa liviaviaiya, yu wa enda kocilunga.

³⁰ Puãi Soma ya Suria wa handeleka vakesongo liakalu aye, hati, Lomue vu ka yaka laye, ci kale utito, ci kale unene, te lika la Soma ya Isareli.

³¹ Eci vakesongo liakãlu va mola Yehosafata, oco va popia vati, U eye Soma ya Isareli. Oco vamako, ha va yaki laye. Yehosafata wa liyula, kuenje Yehova wo kuatisa. Suku wa va tetula kokuaye.

³² Eci vakesongo liakãlu va limbuka okuti heyeko Soma ya Isareli, oco vo siapo.

³³ Omunu umue wa imba ño usongo waye lonumbi, lowo wasa Soma ya Isareli petokekelo liuwalo waye wutale. Oco wa popia lukuakuendisa ekalu liaye, hati, Ñualisapo, njupe vocilunga, momo nda asiwa.

³⁴ Eteke liaco, ocilunga ca tokota, kuenje Soma ya Isareli wa liyeka vekãlu liaye kovaso a va Suria, toke koñolosi. Pokuiñila kuekumbi, wa fa.