II ASAPULO 17 - Embimbiliya - Bíblia Sagrada em Umbundu

¹ Omolaye Yehosafata wa piñala komangu yaye, kuenje wa lipamisila Isareli.

² Wa kapa asualali vovaimbo osi a pama oko Yuda, lovovaimbo a Efarimi ana a pundile isiaye Asa.

³ Yehova wa kala kumue la Yehosafata momo wa endaila volonjila viatete via isiaye Daviti kuenda ka sandele Baale,

⁴ puãi wa sandiliya Suku ya isiaye loku endela vovihandeleko viaye, kuenda ka endelele volonjila via Isareli.

⁵ Oco Yehova a pamisila usoma povaka aye kuenje Yuda yosi ya nenele Yehosafata ulambu, leye wa sanga ukuasi walua kuenda esumbilo.

⁶ Utima waye wa kuata utõi volonjila via Yehova, kuenje olonumbuko loviteka vofeka ya Yuda wa viupamo.

⁷ Kunyamo watatu wusoma waye, Soma wa tuma olombuale viaye Benehayile la Ovadiya la Sakariya la Nataneli kuenda Mikaya oku longisa kovaimbo a Yuda.

⁸ Wa va tuma kumue la va Lewi ava: Semaya la Netamiya la Sevadiya la Asahele la Seroiramote la Yehonatana la Adoniya la Toviya la Tovadoniya, ovo va Lewi, kuenda Elisima la Yehorama ovitunda.

⁹ Ovo va kala lelivulu liovihandeleko via Yehova kuenje va longisa ko Yuda. Va ñuala ñuala vovaimbo osi a Yuda loku longisa omanu.

¹⁰ Usumba wa Yehova wa kuata ovosoma osi olofeka vi lisungue la Yuda, oco ka va yakisile Yehosafata.

¹¹ Vamue va Filisiti va nenela Yehosafata olombanjaile, lopalata yulambu. Va Arabia vo nenelavo olohũlũkãi epanduvali lovita epanduvali kovitupi violomeme lolohũlũkãi epanduvali lovita epanduvali kovitupi violohombo.

¹² Kuenje Yehosafata wamamako calua kunene. Yu wa tunga ko Yuda olombonge lovaimbo olosila.

¹³ Wa kala lolosila vialua kovaimbo a Yuda. Ko Yerusalãi, wa kalako lasualali haivo alume va pama vakuotoi.

¹⁴ Ndapata olosekulu viavo, ovo va tendiwa ndomo: Ko Yuda, vakesongo liolohũlũkãi vava: Adina usongui, kumue lovita vitatu kolohũlũkãi vialume va pama vakuotoi.

¹⁵ U wa kuamamo, Yehohanana kumue lovita vivali lakui ecelala kolohũlũkãi vialume.

¹⁶ U wa kuamamo, Amasiya, omõla a Sikiri, lovita vivali kolohũlũkãi vialume va pama vakuotoi.

¹⁷ Ko Benjamin, Eliada ulume wa pama haeye ukuotoi kumue lovita vivali kolohũlũkãi vialume va maleha olohonji loviyepelo.

¹⁸ U wa kuamamo, Yehosavade kumue locita lakui ecelala kolohũlũkãi vialume va malehela ovita.

¹⁹ Ava vosi va kala kupange wa Soma. Havoko lika, vovaimbo a pama a Yuda yosi, Soma wa kapelemovo vakuavo.