II ASAPULO 16 - Embimbiliya - Bíblia Sagrada em Umbundu

¹ Kunyamo wakui atatu lepandu wuviali wa Asa, Baasia Soma ya Isareli wa katukila Yuda, kuenje wa tunga Rama, oco lomue a tunde pamue oku iñila ku Asa, Soma ya Yuda.

² Asa yu wa nyañula opalata lulu wopovokuasi onjo ya Yehova lowu wonjo ya Soma. Wa vi tuma ku Benehadada, Soma ya Suria, una wa tunga ko Damasko, hati,

³ Pokati ketu, ame love, pa kale ocisila ndeci ca kala pokati ka tate la so. Tala, nda ku tumisa ombanjaile yopalata lulu. Kuende, ka imule ukamba wove la Baasia, Soma ya Isareli, oco a nunde.

⁴ Oco Benehadada wa yeva ku Soma Asa, kuenje wa tuma vakesongo kolohoka viaye oku katukila ovaimbo a Isareli. Oco va kuata Iyoni la Dani la Avelemayi, lovaimbo osi olosila o ko Nafitali.

⁵ Eci Baasia a ci yeva, wa liwekapo oku tunga Rama, wa lembula ovopange aye.

⁶ Oco Soma Asa wa enda la Yuda yosi, yu va tuta ovawe oko Rama lovinendele vina Baasia a tungile lavio. Asa wa tunga lavio Geva la Misipa.

⁷ Koloneke viaco ukuavitumasuku Hanani weya ku Asa, Soma ya Yuda, kuenje wa popia laye hati, Omo wa kolela Soma ya Suria kuenje kua kolelele Yehova Suku yove, oco olohoka viosoma ya Suria via pulukila povaka ove.

⁸ Va Etiopia la va Luvimi ka va kaile hẽ olohoka vinenenene kumue lakalu lavakuatuvalu vakahandangala? Haimo lumue, omo ove wa kolelele Yehova, eye wa va eca peka liove.

⁹ Momo ovaso a Yehova a vanja vanja kuosi kilu lieve ha lekisa unene waye kuvakuavitima vio sungulukila. Wa linga uveke kondaka eyi, momo tunde cilo o ka sanga ovita.

¹⁰ Asa puãi, wa temela ukuavitumasuku, kuenje wo kapa kukumbi vokayike, momo wo funguilila olondaka evi. Koloneke viaco, vamue pokati komanu vofeka, Asa wa va talisa ohali.

¹¹ Ovilinga via Asa, evi viatete levi via sulako, via sonehiwa velivulu liolosoma via Yuda la Isareli.

¹² Kunyamo wakui atatu lecea wusoma waye, Asa wa vela kolomãi. Uvei waco wamamako calua; haimo pokuvela kuaye ka sandele Yehova, puãi wa puliliya olondotolo.

¹³ Asa wa pekela lolosekulu viaye kuenje wa fa kunyamo wakui akuãla lamosi wusoma waye.

¹⁴ Yu vo kenda veyambo lina a lisokotuilile eye muẽle vimbo lia Daviti. Vo langeka pula we yuka lovihemba vialemba a pepa lolosimbolua viñi viñi via angiliyiwa la vakuoloño waco, yu vo timihila olosimbolua vialua.