II ASAPULO 15 - Embimbiliya - Bíblia Sagrada em Umbundu

¹ Espiritu lia Suku lia wila Asariya omõla a Odede.

² Kuenje wa enda ku ñualẽhẽla la Asa, yu wa popia laye hati, ye a Asa, love a Yuda, la Benjamini yosi, njeveleli. Yehova o kala lene osimbu ene vu kalavo laye, kuenje nda vu u sandiliyi eye o tava oku sangiwa lene, puãi nda ene vu u yanduluki eye u yandulukivo.

³ Osimbu yalua Isareli, ka kaile la Suku yocili, ndaño lulongisi umue wocitunda pamue ovihandeleko.

⁴ Puãi eci vohali yavo va tiukila vali ku Yehova Suku ya Isareli kuenda eci vo sandiliya, oco wa sangiwa lavo.

⁵ Kotembo yaco lomue wa kala lombembua, ndaño poku tunda ndaño puku iñila, momo olonungi viosi violofeka via tokotelelue.

⁶ Ofeka ya katukila ofeka, imbo lia katukila imbo, loku linyanyola momo Suku wa va sakalaisa lolohali viñi viñi.

⁷ Ene puãi kolisiko, ovaka ene ka a ka lende momo upange wene u kuete onima.

⁸ Eci Asa a yeva olondaka evi viocitumasuku cuprofeto Asariya, omõla a Odede, oco wa kuata utoi kuenje wa tundisa evĩho liosi vofeka yosi ya Yuda la Benjamini leli liovaimbo ana a pundile kolomunda via Efarimi, kuenda wa tumbulula utala wa Yehova, una wa kala kovaso yocindumba conjo ya Yehova.

⁹ Yu wongolola Yuda yosi la Benjamini kuenda ovingendeleyi viokEfarimi la Manase la Simeone, momo omanu valua vokIsareli va tundila kokuaye eci va limbuka okuti Yehova Suku yaye wa kala kumue laye.

¹⁰ Oco va liongoluila ko Yerusalãi kosãi yatatu kulima wekui latãlo wusoma wa Asa.

¹¹ Keteke liaco, povinyama via pundiwa, va lumbilapo Yehova ocilumba covita epanduvali kolongombe kuenda olohulukãi epandu kolomeme.

¹² Kuenje va lisila oku sandiliya Yehova Suku yolosekulu viavo lutima wavo wosi kuenda lomuenyo wavo wosi.

¹³ Va lisilavo okuti u wosi ka sandi Yehova Suku ya Isareli a fe, ci kale omõla pamue ukulu, ci kale ulume pamue ukãi.

¹⁴ Va lisinga la Yehova loku vilikiya lolukandi, loku ulula lolombeta languena.

¹⁵ Yuda yosi ya sanjukila okulisinga kuaco, momo va lisinga lutima wavo wosi kuenda vo sandiliya lonjongole yavo yosi, kuenje wa sangiwa lavo; Yehova yu wa va muisa epuyuko kolonele viosi.

¹⁶ Ndaño inaye Maaka Soma Asa wa wupa komangu yaye yunasoma momo wa tungilile Asera ociteka cimue. Asa wa kupula ociteka caye, wa ci keleketa yu wa ci yokela kolui Kedrone.

¹⁷ Puãi olonumbuko kIsareli, ka viopilueko, haimo lumue utima wa Asa wa pua evelo koloneke viosi viomuenyo waye.

¹⁸ Kuenje wa nena vonjo ya Suku ovina vi kola isiaye a tumbikile levi eye muẽle a tumbikile, ndokuti opalata lulu kuenda ovikuata.

¹⁹ Kuenje ka kua kaile vali ovita toke kulima wakui atatu latãlo wusoma wa Asa.