II ASAPULO 14 - Embimbiliya - Bíblia Sagrada em Umbundu

¹ Kuenje Aviya wa pekela lolosekulu viaye, yu vo kenda vimbo lia Daviti. Omolaye Asa wa piñala komangu yaye; Koloneke viaye ofeka ya kala lepuyuko ekui lianyamo.

² Asa wa linga eci ciwa haico ca sunguluka kovaso a Yehova Suku yaye,

³ momo ovotala osi olosuku via vakualofeka wa a leñula lolonumbuko le, kuenda wa lundula oviñumañuma kuenda wa timbula Asera.

⁴ Wa handeleka Yuda oku sanda Suku yolosekulu viavo loku lava ovihandeleko locikundi caye.

⁵ Olonumbuko lovotala insensu okovaimbo a Yuda wa a leñulavo kuenje kotembo yaye usoma wa kala lepuyuko.

⁶ Ko Yuda wa tungako ovaimbo a pamisua lovimbaka, momo ofeka ya kala lepuyuko. Kanyamo aco ka kaile lovita, momo Yehova wo muisa epuyuko.

⁷ Oco wa sapuila va Yuda hati, Tu tungi ovaimbo andeti loku a ñualisa ovimbaka lolombonge lolombundi lovisiakala; ofeka lopo yetu momo etu tua sanda Yehova Suku, tuo sandiliya kuenje wa tu muisa ombembua kolonele viosi. Oco va tunga kuenje va salala.

⁸ Kuenje Asa wa kala lovitundo viasualali a va Yuda va soka ovita vitatu kolohũlũkãi va maleha oviyepelo lolonjelia, kuenda ovita vivali lakui ecelala kolohũlũkãi via va Benjamini, va maleha oviyepelo haivo vakualohonji. Vosi yavo alume va pama vakuotõi.

⁹ Sera u Etiopia wa va katukila lohuluwa yasualali lovita vitatu viakalu kuenje veya take ko Maresa.

¹⁰ Asa yu wa tunda oku ñualehela laye kuenje va angiliya ocilunga vocimbota ca Sefata ko Maresa.

¹¹ Oco Asa wa vilikiya ku Yehova Suku yaye hati, A Yehova, lomue wa lisoka love poku kuatisa, ci kale u wa pama, ci kale u wa leñela. Tu kuatise, a Yehova, Suku yetu, momo tua liyeka kokuove. Vonduko yove, omo tueyilila oku liyaka lowiñi u. A Yehova, ove Suku yetu, omunu ka ka ku yule.

¹² Oco Yehova wa kunduila va Etiopia kovaso a Asa lokovaso a Yuda kuenje va Etiopia va tila.

¹³ Asa kumue lomanu va kala laye, va va landula toke ko Gerare kuenje va Etiopia va kunduka momo Yehova wa va nyanyuila kovaso aye lokovaso olohoka viaye. Omanu va Yuda vambatapo ovikuata vialua.

¹⁴ Va yulavo ovaimbo osi a lisungue la Gerare momo usumba wa Yehova wa va kuata, kuenje va punda ovaimbo aco osi momo mua kala ovikuata vialua.

¹⁵ Va nyõla olombalaka viakuaviunda yu va punda olomeme lolongamelo vialua, kuenje va tiukila ko Yerusalãi.