II ASAPULO 13 - Embimbiliya - Bíblia Sagrada em Umbundu

¹ Kunyamo wekui lecelala kondalu ya Soma Yerevoama, Aviya wa fetika oku viala ko Yuda.

² Wa viala alima atatu ko Yerusalãi. Onduko ya inaye Mika, omõla a Uriyele ko Givea.

³ Pokati ka Aviya la Yerevoama peya ovita. Aviya wa tundila ovita viaco lolohoka vialume vakuavita, haivo vakuotõi, va soka ovita vikuãla kolohũlũkãi vialume va noliwa. Yerevoama wa angiliya ocilunga ha yaki laye, lolohũlũkãi ecelala vialume va noliwa haivo vakuotõi.

⁴ Oco Aviya wa talama komunda ya Semarimi, yimue polomunda via Efarimi, kuenje wa popia hati, A Yerevoama, love a Isareli yosi, njeveleli!

⁵ Ka co sesameleli hẽ oku limbuka okuti usoma wa Isareli Yehova wa weca ku Daviti lokomãla vaye otembo ka yi pui, loku lisila ocisila comongua?

⁶ Haimo Yerevoama, omõla a Nevata, ukuenje wa Salomone, omõla a Daviti, wa katukila cime caye luku u lingila usuanji.

⁷ Kuenda omanu vamue vaño, haivo vakuemande, vo liongoluila yu va vaya la Rehovama omõla a Salomone, cina Rehovama a kala handi umalehe haiye esumba, kuenje ka telele oku litamalala lavo.

⁸ Kaliye ene, omo wa lingi owiñi wa lua, kuenda vu kasi lolonale viulu, vina Yerevoama o pangeli ndolosuku, vu simi oku litamalala lusoma wa Yehova u li povaka omãla va Daviti.

⁹ Ka wa takumuili hẽ ovitunda via Yehova, omãla va Arone la va Lewi kuenda ka wa linõleleli hẽ ovitunda viene muẽle ndeci omanu volofeka vikuavo? U wosi iyilila oku litumbika lonale yimue pamue lovitupi epanduvali, o linga ocitunda cevi halosukuko.

¹⁰ Etu puãi, Yehova eye Suku yetu, letu ka tuo yandulukile. Tu kuete ovitunda vi vumba Yehova, haivo omãla va Arone, kuenda va Lewi va linga upange wavo.

¹¹ Omẽle lomẽle kuenda oñolosi loñolosi ovo va lumba ovilumba vioku pia elisi kuenda insensu vielemba li pepa; va kapa ombolo yoku taliwa komesa yulu wopululu; va miha ondiyelo yulu kuenje ovinyi viayo vi taima oñolosi loñolosi. Oco etu tu lava ovihandeleko via Yehova Suku yetu, ene puãi wo yanduluki.

¹² Kuenje tala, Suku yu kumue letu haiye o tu songuila, kuenda ovitunda viaye vi kasivo kumue letu, lolombeta viavo vioku tu kovongela kovita vioku liyaka lene. Amala va Isareli, ko ka liyaki la Yehova Suku yolosekulu viene, momo ko yuli ale.

¹³ Yerevoama puãi wa tuma oku va yombela konyima yavo, oco asualali aye a kala kovaso a Yuda osimbu ava va yomba va kala konyima yavo.

¹⁴ Kuenje tala, eci va Yuda va petula ovaso, va mõla ocilunga kovaso lokonyima yavo, yu va vilikiya ku Yehova kuenda ovitunda via sika olombeta.

¹⁵ Alume va Yuda volula ongulu yocilunga. Oco eci volula, Suku wa kunduila Yerevoama la Isareli yosi kovaso a Aviya la Yuda.

¹⁶ Va Isareli va tila kovaso a va Yuda kuenje Suku wa va eca povaka avo.

¹⁷ Aviya kumue lomanu vaye va kundula va Isareli valua, kuenje kua fa ovita vitãlo kolohulukãi vialume va noliwa.

¹⁸ Kotembo yaco va Isareli va ketisua kuenje va Yuda va yula momo va kolela Yehova Suku yolosekulu viavo.

¹⁹ Aviya wa landula Yerevoama kuenje wo punda ovaimbo alo: Betele kumue lovikanjo viaco, la Yesana kumue lovikanjo viaco, kuenda Efirone kumue lovikanjo viaco.

²⁰ Yerevoama ka kuatele vali olohõlo koloneke via Aviya kuenje Yehova wo veta yu wa fa.

²¹ Aviya puãi wamamako kupami, kuenje wa kuela akãi ekui la vakuãla kuenda wa kala lakui avali lavavali komãla valume lekui lepandu komãla vakãi.

²² Ovilinga vikuavo via Aviya kuenda omuenyo waye lolondaka viaye via sonehiwa velivulu liuprofeto Ido.