II ASAPULO 12 - Embimbiliya - Bíblia Sagrada em Umbundu

¹ Eci uviali wa Rehovama wa kolisua kuenda leye wa pama oco wa yanduluka ovihandeleko via Yehova la Isareli yosi kumue laye.

² Omo va lueyela Yehova, oco kunyamo watãlo wa Soma Yehovama, Sisiake Soma yEgito a tundila Yerusalãi,

³ kumue lovita ekui lavivali viakãlu lakui epandu kolohũlũkãi viavakuakuendela kotuvalu. Omanu va tunda laye kEgito valua, oku va tenda ka ci teliwa, va Libia, va Suki la va Etiopia.

⁴ Wa kuata ovaimbo a pama a Yuda, kuenje weya toke ko Yerusalãi.

⁵ Oco uprofeto Semaya weya ku Rehovama lokolombuale via Yuda va liongoluilile Sisiake ko Yerusalãi. Wa popia lavo hati, Ca popia Yehova ceci, hati, Omo wa njanduluki, oco ame ndo weceli peka lia Sisiake.

⁶ Oco olombuale via Isareli kumue la Soma va liketisa kuenje vati, Yehova Ukuesunga.

⁷ Eci Yehova a limbuka okuti va liketisa, ondaka ya Yehova yeya ku Semaya, yiti, Omo va liketisa, si va nyõli puãi ndi va muisa epulu limue. Onyeño yange ka yi wila vali Yerusalãi leka lia Sisiake.

⁸ Haimo lumue va linga akuenje vaye, oco va tepise pokati koku mbumba ame loku vumba ovosoma olofeka.

⁹ Oco Sisiake Soma yEgito wa tundila Yerusalãi. Wopa ovokuasi onjo ya Yehova, lovokuasi onjo ya Soma, wopa muẽle cosi. Wopavo oviyepelo viulu vina Salomone a pangele.

¹⁰ Soma Rehovama oku vi piñainyapo wa panga oviyepelo viosipi, wa vi eca povaka a vakesongo liavakuakulava ombundi yonjo ya Soma.

¹¹ Olonjanja viosi Soma a enda vonjo ya Yehova, vakuakulava veya, va vi wala, noke va vi nena vali vohondo yavakuakulava.

¹² Eci a liketisa, onyeño ya Yehova yo tinduka, oco ka ko nyõle pe. Kuenda vali ko Yuda, kua kala handi ovina vimue viwa.

¹³ Oco Soma Rehovama wa lipamisila vo Yerusalãi kuenje wa viala. Rehovama eci a fetika oku viala wa kala lanyamo akuĩ akuãla lamosi kuenje wa viala anyamo ekui lepanduvali vo Yerusalãi, imbo lina Yehova a nola povapata osi a Isareli ha kapimo onduko yaye. Onduko ya inaye Nahama u Amoni.

¹⁴ Wa lingainga eci cĩvi, momo ka kapele utima waye oku sanda Yehova.

¹⁵ Ovilinga via Rehovama, evi viatete levi via sulako, ka via sonehelue he velivulu liasapulo uprofeto Semaya leli liukuavitumasuku Ido, pokati kalivulu apata? Pokati ka Rehovama la Yerevoama pa kala kala ovita olonjanja viosi.

¹⁶ Rehovama wa pekela lolosekulu viaye, yu vo kenda vimbo lia Daviti. Omolaye Aviya wa piñala komangu yaye.