II ASAPULO 11 - Embimbiliya - Bíblia Sagrada em Umbundu

¹ Eci Rehovama eya ko Yerusalãi, wongolola epata liosi lia Yuda la Benjamini, va soka ocita lakui ecelala kolohũlũkãi vialume va nõliwa, vakuavita, ha va liyaki la Isareli, loku tiamisa vali usoma ku Rehovama.

² Puãi ondaka ya Yehova yeya ku Semaya, omunu wa Suku, yiti,

³ Popia la Rehovama omõla a Salomone, Soma ya Yuda, la va Isareli vosi voko Yuda la Benjamini, huti,

⁴ Ca popia Yehova ceci, hati, Ko ka lamaneliko, ko ka yaki la vamanjene. Tiukili omunu omunu konjo yaye, momo ocina eci ca tunda kokuange. Oco va yevela kondaka ya Yehova, va tiukako, va liwekapo oku katukila Yerevoama.

⁵ Rehovama wa tumãla vo Yerusalãi, kuenje wa tunga ovaimbo a pama vo Yuda.

⁶ Wa tunga Beteleme, Etami, Tekoa,

⁷ Bete Cure, Soko, Adulama,

⁸ Gati, Maresia, Sife,

⁹ Adoraimi, Lakisi, Aseka,

¹⁰ Sora, Ayalone la Hevirone, ovaimbo a pamisua o vo Yuda la Benjamini.

¹¹ Wa pamisa olombonge, yu wa kapamo vakesongo, lolosila viokulia, lulela lovinyu.

¹² Vimbo limbo wa kapamo oviyepelo lolonjelia kuenje wa a pamisa calua. Oco Yuda la Benjamini va linga muẽle vaye.

¹³ Ovitunda la va Lewi vana va kala kIsareli yosi, va tunda vovaimbo avo kuenje veya kokuaye.

¹⁴ Va Lewi va siapo ovikanjo viavo lovipiñalo viavo, kuenje veya ko Yuda loko Yerusalãi, momo Yerevoama kumue lomãla vaye va va tateka oku lingila Yehova upange wutunda.

¹⁵ Wa linolela ovitunda viovotala okolonumbuko, levi vioviñumañuma violohombo lolonale, vina a pangele.

¹⁶ Vonyima yavo mua kuama ava va kapela ovitima viavo oku sanda Yehova, Suku ya Isareli. Va tunda kapata osi a Isareli, veya ko Yerusalãi oku lumbila Yehova Suku yolosekulu viavo.

¹⁷ Va pamisa usoma Wa Yuda, kuenje anyamo atatu va kokela Hehovama omõla a Salomone ongusu, momo anyamo aco atatu va endaila vonjila ya Daviti la Salomone.

¹⁸ Rehovama wa kuela Mahalati, omõla a Yerimote, omõla a Daviti la Avigaile, omõla a Eliava, omõla a Tese.

¹⁹ Eye wo citila omãla, vava: Yewusi la Semariya la Sahama

²⁰ Kovaso yaco wa kuela Maaka, omõla a Avisalome. Leye wo citila Aviya la Atai la Sisa kuenda Selomiti.

²¹ Rehovama wa sola calua Maaka, omõla a Avisalome, akãi vaye lovakama vaye vosi ci sule, momo wa kala lekui lecelala liakãi kuenda akuĩ epandu kovakama, kuenje wa cita akuĩ avali lecelala komãla valume lakui epandu komãla vakãi.

²² Rehovama wa kapa Aviya, omõla a Maaka, ndusongui povahuvaye lopovamanjaye, momo wa yongola oku u lingisa osoma.

²³ Eye wa ci linga lolondunge kuenje omãla vaye vosi wa va sandowaila kolofeka viosi via Yuda la Benjamini, kovaimbo osi a pamisua lovimbaka. Yu wa va iha ovilia viakahandangala kuenda wa va yonguila akãi valua.