II ASAPULO 10 - Embimbiliya - Bíblia Sagrada em Umbundu

¹ Rehovama wa enda ko Sekeme, momo Isareli yosi ya liongoluila ko Sekeme oku u vialeka.

² Yerevoama omõla a Nevata wa ci yeva, momo wa kala kEgito kuna a tililile Soma Salomone. Yerevoama wa kala kEgito.

³ Oco va tuma oku u vilikiya, kuenje Yerevoama weya la va Isareli vosi, yu va popia la Rehovama, vati,

⁴ So wa lemisile okanga yetu. Kaliye ove leluisa upange wa kãla wa so, lokanga yaye yi lema yina a tu kapele, oco tu ku vumbe.

⁵ Wa popia lavo, hati, Tiuki vali kokuange kovaso yoloneke vitatu. Oco omanu va enda.

⁶ Soma Rehovama wa pula akulu vana va vumbaile isiaye Salomone osimbu handi a kala lomuenyo, hati, Elungulo lie vu nyiha si kumbulula omanu avandeti?

⁷ Va popia laye vati, Nda o linga ohenda omanu ava, nda o va sanjuisa loku vangula lavo olondaka viwa, oco ovo va laika oku linga akuenje vove otembo ka yi pui.

⁸ Eye puãi wa pembula elungulo lia wiha olosekulu, kuenje wa pula amalehe omo va kulila, vana vo vumba.

⁹ Wa popia lavo hati, Elungulo lie vu nyiha si kumbulula omanu ava va popia lame vati, Leluisa okanga yina so a tu kapele?

¹⁰ Oco amalehe omo va kulila va popia laye vati, Kumbulula omanu vana va popia love vati, So wa lemisile okanga yetu, puãi ove tu yi leluisile, oco va kumbulula ndomo, huti, Okanikenike kange kanene, ombunda ya tate yi sule.

¹¹ Nda tate wo tuikili okanga yi lema, ame mbandeka kokanga yene. Tate wo yamboli lolohava, puãi ame ndu yambuli lanyenya.

¹² Oco Yerevoama lowiñi wosi veya ku Rehovama keteke liatatu, ndeci ca popele Soma, hati, Tiuki vali kokuange keteke liatatu.

¹³ Oco Soma wa va kumbulula lukãlu, kuenje wa pembula elungulo liolosekulu.

¹⁴ Soma Rehovama wa popia lavo ndeci amalehe va wimbile onumbi, hati, Tate wa lemisile okanga yene, ame puãi mbandekako. Tate wo yamboli lolohava, ame puãi ndu yambuli lanyenya.

¹⁵ Oco Soma ka yevele komanu, momo ondaka yaco ya songuiwa la Suku, oco Yehova a tẽlise ondaka yaye, yipa a popele la Yerevoama omõla a Nevata, lomela wa Ahiya u Siloni.

¹⁶ Eci Isareli yosi ya limbuka okuti Soma ka va yevele, omanu va kumbulula Soma, vati, Ocikepa ce tu kuete ku Daviti? Ndaño ocipiñalo ka tu kuete komõla a Jese. A Isareli, omunu omunu a ende kombalaka yaye! Tata epata liove muẽle, a Daviti! Oco va Isareli vosi va enda kolombalaka viavo.

¹⁷ Puãi va Isareli vana va tungile vovaimbo a Yuda, Rehovama wa va viala.

¹⁸ Soma Rehovama wa tuma Adorama, ukuacikele cupange wocikisika, kuenje omanu vosi va Isareli vo sosola lovawe, yu wa fa. Oco Soma Rehovama wa yayulako oku wila vekãlu liaye, ha tilila ko Yerusalãi.

¹⁹ Oco Isareli ya ñualelapo epata lia Daviti toke etaili lilo.