II ASAPULO 1 - Embimbiliya - Bíblia Sagrada em Umbundu

¹ Salomone, omõla a Daviti, wa kolisiwa vusoma waye, kuenje Yehova, Suku yaye, wa kala laye, kuenda wo kemalisa cimue.

² Salomone yu wa popia la Isareli yosi, la vakesongo liolohũlũkãi lava vovita, lolonganji, lolombuale via Isareli yosi, lakulu vapata.

³ Oco Salomone wa enda kumue lohongele yosi kowulu woko Giveone, momo oko kua kala ombalaka yoku ñualẽhẽla la Yehova, yina Mose, ukuenje wa Yehova, a tungile vekalasoko.

⁴ Puãi ocikasa ca Suku, Daviti wa cupile ale ko Kiriyata Yeari loku ci nena kocitumãlo Daviti a cangiliyilile, momo wa ci tungilile ombalaka ko Yerusalãi.

⁵ Utala wosipi, una Becalele, omõla a Uri, omõla a Huri, a tungile, wa kalavo kovaso yo tavernakulu ya Yehova. Kuenje Salomone kumue lohongele va sanda Yehova.

⁶ Salomone yu wa lamanela kutala wosipi kovaso a Yehova, kombalaka yoku ñualẽhẽla la Yehova kuenje wa lumbilako ohũlũkãi yovilumba vioku pia elisi.

⁷ Kuteke waco Yehova wa tukulukila Salomone, yu wa popia laye hati, Tukula eci ndu ku ĩha.

⁸ Salomone wa popia la Suku hati, Ove wa muisa ohenda yalua tate Daviti, kuenje wa miñalisa komangu yaye yusoma.

⁹ Kaliye, a Yehova Suku, ohuminyo yove ku tate Daviti yi lemuluhe, momo wa ndingisa Soma yepata lialua ndoneketela yoposi.

¹⁰ Kaliye nyihe olondunge lukulihiso pokutunda kuange lopokuiñila kuange kovaso epata elindeti, momo helie o tela oku tetuluila epata eli liove, hailio linene cimue?

¹¹ Oco Suku wa popia la Salomone hati, Omo eci oco ca kala vutima wove, kuenje kua pingile ovipako lukuasi, pamue ekemalo, pamue omuenyo wava va ku suvuka, kuenda ndaño omuenyo wa lepa kuo pingile, puãi wa pinga olondunge lukũlĩhiso woku viala omanu vange, vana nda ku vialekela,

¹² oco olondunge lukulihiso viu kuihiwa. Kuenda ndu ku iha ovipako lukuasi lekemãlo lia lua ndokuti olosoma viosi via ku tetekela pamue vievi vi ku kuama, ci sule.

¹³ Oco Salomone wa tiuka konumbuko yoko Giveone, kombalaka yoku ñualẽhela la Yehova, yu weya ko Yerusalãi. Kuenje wa viala kIsareli.

¹⁴ Salomone wongoluila pamosi akãlu lavakuakuendela kotuvalu. Wa kala lohũlũkãi lovita vikuãla viakãlu lekui lavivali kolohũlũkãi viavakuakuendela kotuvalu. Wa va kapa vovaimbo akãlu kuenda vo Yerusalãi kumue la Soma.

¹⁵ Vo Yerusalãi, Soma wa siatisa opalata lulu ndovawe, kuenda ovinendele wa vi luisa ndoviti viakuyu vatapi.

¹⁶ Otuvalu tua Salomone tua tunda kEgito loko Kuwe. Ovafũli va Soma va tu landa landa londando ko Kuwe.

¹⁷ Va landa landa ekãlu kEgito lovita epandu kolosiekele viopalata kuenda okavalu ka landaiwa locita lakui atãlo kolosiekele. Kuenda ovo va nenailakovo olosoma viosi via va Hiti lolosoma via Suria.