HOSEA 9 - Embimbiliya - Bíblia Sagrada em Umbundu

¹ Ku ka yolele, a Isareli. Ku ka sanjuke nda vakualofeka. Momo wa linga ocipuepue. Wa yanduluka Suku yove. Wa sanjukila ofeto yupuepue kovisaselo viosi viotiliku.

² Ocisaselo locikamelo cayuva ka vi va tekula, lovinyu viokaliye vi va kamba.

³ Ka va tumãla vofeka ya Yehova; Efarimi o tiukila ke Egito, kuenje va lila okulia kua vĩha vo Asuria.

⁴ Ka va itilila Yehova ocilumba cavo covinyu, kuenje ka vo sanjuisa lovilumba viavo. Ombolo yavo yi linga ndombolo ya vakuakulila kolonambi. Vosi va liako va vĩhĩsua momo ombolo yavo va yi lila ño onjala, ka yi iñila vonjo ya Yehova.

⁵ Vu linga nye veteke li kola, pamue veteke liofesta ya Yehova?

⁶ Momo, tala! Va enda ka Asuria; Egito o va ongolola, Mefisi o va kenda. Onjunde yi sitika ovikuata viavo vi kola viopalata, lolosongo vi kala volombalaka viavo.

⁷ Oloneke vieyambulo vieya. Oloneke viefetuluinyo via pitila. Isareli o ci kũlĩha. Mekonda liolohole viene via lua lesuvu liene lialuavo, oco, kokuene uprofeto eveke, lu wa kolela esunga liovutima eyui.

⁸ Uprofeto eye ondavululi ya va Efarimi, ovo omanu va Suku yange. Cilo puãi vo tela onjanjo volonjila viaye viosi, kuenda vonjo ya Suku vo lekisa esuvu.

⁹ Va livihĩsa ca piãla ndeci koloneke via Givea. Eye ivaluka ũvi wavo, o va yambuila akandu avo.

¹⁰ Isareli ndo sangele ndayuva ovekalasoko, nda muĩle va isiene ndapako onendela ukuyu kefetikilo liuvo waco. Puãi va enda ko Baalepeore kuenje va litumbika ku Baale, yu va livihisa ha va lisoki levi va sola.

¹¹ Ulamba wa Efarimi u pãlãla ndonjila ha wendi kũpãla. Ka ku kala oku cita, ka ku kala omisi, ndaño oku mina.

¹² Ndaño va cita omala loku va tekula haimo ndi vopa kokuavo okuti ka ku kala vali omunu. Ngongo yavo, eci ndi litepa lavo!

¹³ Ndomo nda ci limbuka ale, omãla va Efarimi va laika oku ambatiwa; Efarimi, eye muẽle, o tuala omãla vaye koku pondiwa.

¹⁴ A Ñala, va ĩha … puãi o va ĩha nye? Va ĩha oku pulumũla kuenda avele ka a kuete cimue.

¹⁵ Ũvi wavo wosi u mõlẽhẽla ko Giligali. Oko nda fetikila oku va suvuka. Mekonda lievĩho liovilinga viavo ndi va tundisa vonjo yange. Si va sole vali. Olombuale viavo viosi via ñualẽlãpo.

¹⁶ Efarimi wa lemẽhĩwa, ononge yavo ya kukuta, ka va imi epako. Ndaño va cita ame njipãla omãla vavo va soliwa.

¹⁷ Suku yange o va nyẽhũla momo ka va yevelile kondaka yahe, kuenje va linga vakatungayanga pokati kolofeka.