HOSEA 8 - Embimbiliya - Bíblia Sagrada em Umbundu

¹ Kapa olumbeta komela wove momo ongonga yulombo ya loña konjo ya Yehova, momo va nyõla ocisila cange haivo va siñala ovihandeleko viange.

² Va mbilikiya, vati, A Suku, etu tu va Isareli tua ku kũlĩha.

³ Isareli puãi wa pañula esunga oco unyãli u lupukila.

⁴ Va vialeka olosoma, puãi halondaka yangeko. Va tumbika olombiali, ame puãi sia ci kũlĩhĩle. Lopalata yavo lulu wavo va litung oviteka. Va vi litungilila okunyõlẽha kuavo.

⁵ A Samaria, nda pembula onale yove. Onyeño yange ya va wengukila. Oku lipua kua va Isareli kuiya eteke lipi?

⁶ Omunu wa yi tunga, Suku heyeko, Onale ya Samaria yi nyanyuiwa.

⁷ Momo va waya ofela kuenje vongula ocipepe. Otiliku ka yi kuete apunga, ka yi tundi osema. Nda ya tunda vakualofeka nda va yi lia.

⁸ Isareli wa liwa. Pokati kolofeka va linga ale ndocikuata ka ci silivila.

⁹ Momo va lamana ka Asuria ndocisema congendalika. Efarimi wa fetela vokahonga.

¹⁰ Ndaño va feta vakualofeka oku va yakela haimo hasimbuko ndi va sandula. Okatembo kamue va liweka oku vialeka olosoma lakulu vofeka.

¹¹ Momo Efarimi wa luisa ovotala, ovotala aco puãi kokuaye ovotala ekandu.

¹² Ndaño ndo sonẽhẽla ekuĩ liolõhũlũkãi viovihandeleko viange, eye o vi tenda ndocina ka ca kũlĩhĩwĩle.

¹³ Va sole oku lumba, va lumba lumba ositu kuenje va yi lia, Yehova puãi ka ci sanjukila. Cilo ivaluka olohole viavo, kuenje o va yambuila akandu avo. Va tiukila ke Egito.

¹⁴ Momo Isareli wa ivalako Usovoli waye, kuenje wa tunga olonjo viulamba; kuenje Yuda wa luisa olombonge via pama. Ame puãi numa ondalu ha yi yoki ovaimbo aye anene loku yokavo olombonge viaye.