HOSEA 7 - Embimbiliya - Bíblia Sagrada em Umbundu

¹ leci njongola oku sakula Isareli, oco ekandu lia Efarimi li mõlẽha, kuenda ovilinga vĩvi via Samaria. Momo va fũla fũla luhembi. Ocimunu ci iñila vokati, kosamua ovingumba vi punda.

² Puãi ka va sokolola okuti ame njivaluka avĩho avo osi. Cilo ovilinga viavo via va ñuala, vi kasi muẽle kovaso ange.

³ Va sanjowaisa Soma levĩho liavo, lakulu vofeka lusuanji wave.

⁴ Vosi yavo vakahonga, va soka ndofolono ya sanyisua. Ukuakuyoka olombolo ka sanyisa vali ondalu tunde koku vi kosa toke vi tumba.

⁵ Eteke liulima wa Soma yetu akulu vofeka va vela luholua wovinyu. Lahevo wõlõla eka liaye kumosi la vakuaku pembula.

⁶ Momo ndeci ofolono yi sanya haico ovitima viavo vi sanya lahala eviho. Uteke onyeño yavo yi witila. Omele yi ngeloha ndondalu yi liakoka.

⁷ Vosi yavo va tokota ndofolono. Va nyõla olombiali viavo. Olosoma viavo viosi via kupuka. Pokati kavo lomue o mbilikiya.

⁸ Efarimi wa litenga la vakualofeka. Efarimi ekende ka lia pongoluiwile.

⁹ Vakualofeka va nyõla ongusu yaye kuenje eye ka ci kũlĩhĩle; Utue waye wa fetika oku sova owele kuenje eye ka ci limbukile.

¹⁰ Epela lia Isareli liu wimbila uvangi woku u pisa; haimo lumue, cosi eci, ka va tiuka ku Yehova, Suku yavo, ndaño oku u sanda.

¹¹ Efarimi wa soka ndopomba, wa wulua, ka kuete olondunge, O vilikiya Egito, enda ka Asuria.

¹² Osimbu va enda ndi va tuvika lowanda wange, kuenje ndi va lowisa ndolonjila viovilu. Ndi va yambuila ovilinga viavo vĩvi.

¹³ Ngongo yavo! momo va litepa lame. Va nyõlẽhe omo va ñualẽlapo. Ame, nda nda va yovola puãi va ñembela.

¹⁴ Oku mbilikiya kuavo ka ku tundi kovitima viavo, puãi va liyuila ño povola avo, Poku pinga otiliku lovinyu va litandatanda, va ñualẽlapo.

¹⁵ Ndaño ame, ame muẽle, nda va longisa, haime nda va kolisila ovoko, haimo va simĩla civi.

¹⁶ Va pongolokela ku Baale. Va soka ndohonji ya kuõha. Olombiali viavo vi kupuiwa losipata mekonda lielimi liavo lĩvi. Eci oco ci va kokela epembe vofeka ye Egito.