HOSEA 6 - Embimbiliya - Bíblia Sagrada em Umbundu

¹ Enjui, tu tiukili ku Yehova; momo eye wa soyola okuti o tu sakula; eye wa tu tonyõla, haiye o tu itika.

² Kovaso yoloneke vivali o tu tumbulula. Keteke liatatu o tu pindula okuti tu kala lomuenyo kovaso aye.

³ Tu kũlĩhĩsi Yehova. Tu kuati ombili yoku u kũlĩha. Kokutunda kuaye ka kuli atatahãi, ku sokiyiwa ale ndokutola kuongula, Iya kokuetu ndombela, ndombela yomandavela yina yi yulisa osi.

⁴ Ndinga nye love, a Efarimi? Ndinga nye love, a Yuda? Ocisola cene ca soka ndelende liomẽle kuenda ndowume u loluka lonjanga.

⁵ Oco nda va kupula lovaprofeto. Nda va ipaya lolondaka viomẽla wange. Lolonimbu viange vi tunda ndocinyi.

⁶ Momo njongola ocisola ka ci pongoloka, ovilumba havioko, kuenda ukũlĩhĩso wa Suku, ovilumba vioku yoka, havioko.

⁷ Puãi ovo va lueyela ocisila vo Adama, haimo va ndingila usuanji.

⁸ Gileada olio imbo liolondingãivi, halio lia vĩhĩsua losonde.

⁹ Ndeci ovingumba vi lavakaila omunu haico ovitunda vi likongela, vi pondaila omanu vonjila yoko Siekeme. Ocili muẽle, va linga ungalu.

¹⁰ Vonjo ya Isareli nda muilamo eci ca vĩha. Ukahonga wa Efarimi haimo u li. Isareli wa vĩhĩsua.

¹¹ Lovevo, a Yuda, kua ku tukuiwila elombolo. Eci njongola oku tumbulula esumũlũho liomanu vange,