HOSEA 4 - Embimbiliya - Bíblia Sagrada em Umbundu

¹ Amanu va Isareli, yeveleli ondaka ya Yehova, momo Yehova o kuete ondaka lolonungi viofeka. Vofeka ka mũli esunga, ndaño ohenda, ndaño ukũlĩhĩso wa Suku,

² te lika uvangi wuhembi, loku kemba, loku ponda, loku iva, lukahonga. Omanu vaco va ci piãla enene, loku ponda ku likuãi ño-o.

³ Oco ofeka yi kasi oku lisiõsiõla, kuenje vosi va tungamo va tepuluka ongusu, kumosi lovinyama viovusenge, lolonjila viovilu. Ndaño olõsi viovokalunga vi upiwa.

⁴ Haimo, lomue ka ka katukile ukuavo, lomue ka ka vetele ukuavo evelo, momo, acitunda, ove muẽle, ove, ame nda ku vetela evelo.

⁵ Utanya o lilondoka. Uteke o lilondokaila pamosi luprofeto. Nyõla muẽle inene.

⁶ Omanu vange va kasi loku nyõlẽha omo va kamba ukũlĩhiso. Omo ove wa pukula ukũlĩhĩso wange, oco lamevo hu pukulavo okuti ku lingi vali ocitunda cange. Lomo wa ivalako ovihandeleko via Suku yove, lamevo njivalavo omãla vove.

⁷ Ndeci va licita haico va lovisa akandu va ndingila. Ulamba wavo ndu pongoluisa akutisasõi.

⁸ Va litekula lakandu omanu vange. Ohatu yovina via vĩha yi va kuete.

⁹ Ci kala okuti ndeci ci lingiwa lomanu haico ci lingiwa locitunda. Ndi vi yambuila ovituwa viavo. Ovilinga viavo ndi vi fetuluinya.

¹⁰ Va lia puãi ka ve kuta. Va linga ukahonga puãi ka va citi, momo va yanduluka Yehova ha va sanjukila ukahonga.

¹¹ Oloñeyi vivi kuenda ovina vi koluisa vi va nyẽha olondunge.

¹² Omanu vange va pinga pinga kociteka cuti, lombueti yavo yi va imbaimba onumbi. Momo utima wukahonga wa va lueyisa, kuenje va litepa la Suku yavo ha va lingi vakahonga.

¹³ Va lumbaila kilu liolomunda. Va timĩha insensu koviwulu vemẽhi liovilemba, momo undembo wavio uwa. Oco omãla vene vakãi va linga ovipuepue, kuenda olondombua viene vi limba kukahonga.

¹⁴ Si yambula omãla vene vakãi eci va linga ovipuepue, ndaño olondombua viene eci vi limba kukahonga. Momo alume lavovo va pambuka ha va kala lovipuepue, va lumbaila kumosi lolombaisi viefendelo liavo. Omanu ka va kuete olondunge va nyõlẽha.

¹⁵ A Isareli, ndaño ove muẽle o limba kukahonga, haimo Yuda ka ka pie. Ku ka ende ko Giligali. Ku ka lamane ko Betawene. Ku ka lisile, huti, Ndeci Suku o kasi lomuenyo.

¹⁶ Ndeci ongombe yi sina haico Isareli yi sinasina. Oco Yehova hẽ, o tẽla oku va lisa ndeci o lisaila okameme vusenge unene?

¹⁷ Efarimi wa litokeka loviteka. A kaleño.

¹⁸ Va linga oloholua. Va limba kukahonga, va sole ca velapo akutisasõi avo, ulamba wavo ci sule.

¹⁹ Ofela yimue ya va wungila vavava ayo. Va kutisua osõi mekonda liovilumba viavo.