HOSEA 3 - Embimbiliya - Bíblia Sagrada em Umbundu

¹ Yehova wa popia lame hati, Kuende vali. Ka sole ukãi wa soliwa lombaisi yaye, haye ocipuepue. U sola ndeci Yehova a sole omãla va Isareli, ndaño va imba ovaso kolosuku viñi loku sola olombolo viayuva.

² Oco ndo landa lolosiekele viopalata ekuĩ lavitãlo, kuenda onjongo yimosi komeyu yosevata.

³ Nda popia laye, siti, O kala lame oloneke via lua. Ku lingi ukahonga, ndaño oku kala lulume ukuavo. Lamevo si lingi veyove.

⁴ Momo omãla va Isareli va kala oloneke via lua, osoma lakamue, ndaño omõla a Soma, ndaño ocilumba, ndaño ongunji yi kola, ndaño terafe lefonde.

⁵ Noke omãla va Isareli va pongoloka ha va sandi Yehova Suku yavo, la Daviti Soma yavo. Kovaso veya lesumbilo ku Yehova lohenda yaye.