HOSEA 2 - Embimbiliya - Bíblia Sagrada em Umbundu

¹ Tukula manjove ulume huti, Omanuvange, kuenda manjove ukãi huti, Wasangohenda.

² Livondeli la nyõho,— momo eye hokãi wangeko, ndaño ame, si veyayeko—livondeli muẽle, okuti eye upa upuepue kocipala caye, kuenda onambo yuvaisi kavele aye,

³ sanga ndu sũlũla, ha kala ndeci a kaile eteke a citiwa, sanga ndu lingisa ekalasoko loku u sokisa lekango okuti o fa lenyona.

⁴ Ndaño omãla vaye si va kuatela ohenda momo omãla vupuepue.

⁵ Momo inaco wa limba kupuepue. U wa va cita ka kuete osõi. Momo hati, Ngenda ku vambaisi yange, vana va nyihãiha ombolo lovava, luwalo wange wovonya olomeme, lowu welinyu, lulela, levi viange vioku nyua.

⁶ Oco sitika onjila yaye lolosongo, loku umbako ongumbo, okuti ka sangi vali olonjila viaye.

⁷ O landula vambaisi yaye puãi ka va sangi. O va sanda puai ka va mõli. Oco o popia, hati, Ngenda niukila ku veyange watete, momo nda kaile ciwa, ndeci ñasi ci sule.

⁸ Puãi eye ka ci kũlĩhĩle okuti ame, ame ndo muĩsa muĩsa olomema lovinyu lulela, haime ndo luisila opalata lulu, vina va lumbaile ku Baale.

⁹ Oco si eci vali olomema viange lovinyu viange kuvo wavio. Kuenda ovonya olomema lelinyu liange, vina a si oku liwalisa lavio, ndu vi upa.

¹⁰ Oco situluila evĩho liaye kovaso a vambaisi yaye, kuenje lomue u popela peka liange.

¹¹ Nyimũla esanju liaye liosi, lolofesta viaye viefendelo, levi violosãi, lasambata aye, kuenda olofesta viaye vina via kũlĩhĩwa.

¹² Ñundula uyuva waye lukuyu waye, vina a tukula, hati, Evi olombanjaile viange vambaisi yange va nyĩhãiha. Ndi vi lingisa usitu, kuenje ovinyama viovusenge vi vi lia.

¹³ Ndu fetuluinyila oloneke violofesta vioku timãhãila Baale insensu, cina a liposuisa lovimbilingu lolomota viaye kuenje wa landula vambaisi yaye, ame puãi wa njivala. Oco ca popia Yehova.

¹⁴ Oco ndu tamba. Ndu tuala kekalasoko. Mbangula laye loku omboka.

¹⁵ Ndu wĩha vali oviumbo viaye viayuva, locimbota ca Akore ndi ci pongolola uvelo welavoko. Oko eye a nambuluila ndeci a nambuluile eci a kaile umãlẽhe, leci a kaile kotembo yoku tunda ke Egito.

¹⁶ Yehova hati, Eteke liaco o nukula huti, Veyange. Ku nukula vali huti, Baale yange.

¹⁷ Momo njupa vomela waye olonduko via va Baale okuti ka vi tukuiwa vali londuko.

¹⁸ Eteke liaco hu inãlĩsa lovinyama viovusenge lolonjila viovilu kuenda evi vi yaila posi. Vofeka nyimũlamo ohonji losipata lovita. Hu tumãlĩsa ciwa oko kua koka.

¹⁹ Kuenje hu kuela. O kala lame otembo yosi. Hu kuela lesunga locili locisola kuenda ohenda.

²⁰ Hu kuela muẽle locili, kuenje ove o kũlĩha Yehova.

²¹ Kuenje Yehova hati, Eteke liaco ame nambulula ciwa ovailu; lovailu a tambulula ciwa ongongo;

²² longongo yi tambulula ciwa otiliku lovinyu lulela; kuenje ovio vi tambulula ciwa Yesirele.

²³ Eye ndu likũlĩsila ame muẽle vofeka. Ndingila ohenda Kasangiohenda, Mopia la Hamanuvangeko, siti, Vumanu vange. Leye o nukula hati, Ove vu Suku yange.