HOSEA 14 - Embimbiliya - Bíblia Sagrada em Umbundu

¹ A Isareli, tiukili ku Yehova Suku yene, momo wa kupukili akandu ene.

² Pongiyi olondaka vioku enda lavio. Tiukili ku Yehova. Popi laye, hoti, Tupe evĩho liosi, tambula esunga li sialapo kuenje tu ku lumbila olondaka viovimẽla vietu, olonãle havioko.

³ Va Asuria ka va tu popela. Ka tu endela kotuvalu. Ka tu tukula vali upange wovaka etu, tuti, Ove Suku yetu. Osiwe yi sanga ohenda kokuove.

⁴ Ndi va sakula oku konyõha kuavo. Ndi va sola lutima wange wosi, momo nda liweka oku va temẽla.

⁵ Ndingila Isareli ndowume. Eye o tẽlẽha ndavonge, o tuamẽla ndovinendele vio ko Levanone.

⁶ Olonavi viaye vi tembaika. Ulambi waye u linga ndu woliveira. Lelemba liaye li linga ndeli lia Levanone.

⁷ Va tiuka kuenje va tumãla vundembo wange. Va tumbuluiwa ndocumbo kuenje va yova nduyuva. Elemba liavo li soka leli liovinyu vioko Levanone.

⁸ A Efarimi, ñuete hẽ nye loviteka? Ame, ame muẽle ndukuaku kumbulula, haime hu tata. Nda linga ndulemba u talala. Kokuange ku tunda esumũlũho liove.

⁹ Wosi ukualondunge, ovina evi viu lomboloke. Wosi wa loñolõha, a vi limbuke. Momo olonjila via Yehova via suñama kuenje vakuesunga va endelamo. Olondingãivi puãi vi kupukilamo.