HOSEA 13 - Embimbiliya - Bíblia Sagrada em Umbundu

¹ Ale, eci Efarimi a popaele, omanu va luluma. Wa kemãlẽle vi Isareli. Puãi wa linga ekandu poku fendela Baale kuenje wa fa.

² Cilo va kasi loku amamako kakandu. Va litungila oviteka viutale wa yanguluiwa, loviteka vimue va vi tunga lopalata. Upange waco wosi wolomesele. Va popia vati, Vi lumbila! Omanu va sipula olonãle!

³ Oco va linga ndombundu yomẽle, pamue ndowume u takata lombili, pamue ndovisaikiti viocimbandi via ambatiwa locipepe, pamue ndowisi u tunda velungu.

⁴ Ame muẽle Yehova Suku yene tunde wa kaili ve Egito. Ka wa kũlĩhĩli Suku yikuavo te ame. Ka kuli upopeli ukuavo te ame.

⁵ Ame ndo kũlĩhĩli vekalasoko, haimo vofeka yekango.

⁶ Puãi eci va lia cocili kuenje ve kuta oco ovitima viavo via tumba kuenje va njivala.

⁷ Oco kokuavo ñala ndohosi. Ndi va lavekela konẽle yonjila ndongue.

⁸ Ndi vondumũhĩla ndombinji ya nyẽhĩwa omãla vayo. Mapulula onete yavo. Ndi va takĩla ndohosi pamue oku va soyoala ndocinyama ca tema covusenge.

⁹ A Isareli, hu nyõla. Helie o ku kuatisa?

¹⁰ Cilo hẽ, Soma yove o kasi pi nda o ku popela? Olombuale viove vi kasi pi nda vi ku yakela? vina wa tukola eci wa pinga, huti, Nyĩhe osoma kuenda olombuale.

¹¹ Nda ku ĩhĩle olosoma lonyeño yange, kuenje nda vi upa locikumbiti cange.

¹² Evĩho lia Efarimi lia kutiwa, lekandu liaye lia solekiwa.

¹³ Olongembia ndeci viukãi o kasi loku cita vio kuata. Eye puãi oñaña ya huka. Momo otembo ya pitila puãi ka yiya konjila yoku citiwa.

¹⁴ Ame nga, ndi va yovola kunene wonjembo? Kokufa ndi va yovola? A Kufa, olohali viove vi kasi pi? A Njembo, ekundu liove li kasi pi? Vutima wange ka mũli oku pongoloka.

¹⁵ Ndaño o kũla ciwa ndoloneva, haimo ofela ya Yehova yi tunda kekango li kasi kutundilo, yiya. Ono yaye layovo yi kukuta letumu liaye li takata. Ofela yaco yi nyõla ukuasi wovikuata viaye viosi via posoka.

¹⁶ Samaria o yambuiwila ongole yaye momo wa ñualẽlapo Suku yaye. Va pondiwa losipata, lotumãla tuavo tu sasuĩwa. Kuenje akãi vavo olomisi va toliwa pokati.