HOSEA 12 - Embimbiliya - Bíblia Sagrada em Umbundu

¹ Efarimi o seteka oku endisa ofela, o landula ofela yokutundilo eteke liosi. Va luisa uhembi lesanda. Va linãlĩsa la Asuria kuenje va tuala ulambu wulela ke Egito.

² Yehova o kuete ondaka la Yuda, kuenje o yambula Yakoba ndeci ca soka lolonjila viaye. U fetuluinyila ovilinga viaye.

³ Vimo wa kuatele kocisendemãi ca huvaye, kuenda eci a linga ulume wa tamãlãla la Suku.

⁴ Wa liyaka lungelo kuenje wa yula. Wa lila loku u lipilikila. Wa sanga Suku ko Betele kuenje haiko Suku a vanguila laye,—

⁵ Yehova Suku yolohoka, Yehova oyo onduko yaye,—

⁶ hati, Oco, tiukila ku Suku yove. Linga ohenda lesunga. Imba ovaso ku Suku yove olonjanja viosi.

⁷ Ukuakufũla, nda peka liaye peli ombalãsa yuhembi, o sole oku kangisa omanu.

⁸ Efarimi wa popia hati, Ame muẽle ndihuasi. Nda limuisa ukuasi. Puãi ukuasi waye wosi ka wimũla akandu a linga.

⁹ Ame ndi Yehova Suku yene tunde wa kaili ve Egito. Ndu tumãlisi vali volombalaka ndeci koloneke violohongele vi kola.

¹⁰ Nda popia lovaprofeto, haime nda luisa ovinjoinjoi, kuenje kawanji ovaprofeto nda eca ovindekaise.

¹¹ Nda vo Gileada mũli evĩho va nyõlẽha muẽle. Nda vo Giligali va lumba olongombe, ovotala avo a soka ndolondunda viovawe vovimbambo viepia.

¹² Yakoba wa tilila kofeka ya Arama, haiko Isareli a vumbila ukãi. Oku sanga ukãi, wa tata olomeme.

¹³ Yehova wopa Isareli ke Egito leka liuprofeto. Kuenje wa tatiwa leka liuprofeto.

¹⁴ Efarimi wa lingisa ca lua onyeño. Oco Suku yaye u pisa episo liosonde, kuenje u fetuluinyila olongole viaye.