HOSEA 11 - Embimbiliya - Bíblia Sagrada em Umbundu

¹ Eci Isareli a kala omõla ndo sola kuenje ndo tukula siti, Omõlãnge, tunde ndo wupa ke Egito.

² Puãi ndaño ame nda tongeka oku va kovonga haimo vamamako oku litepa lame. Va lumbaile va Baale kuenda va timĩhãile insensu oviteka.

³ Haimo lumue, ame, ame muẽle nda longisa Efarimi oku enda, ame nda vambayata peka; puãi ka va kũlĩhĩle okuti ame nda va sakula.

⁴ Nda va koka lovikolo viomunu okuti ovikolo viocisola, kuenje kokuavo nda kala ndu o leluisa okanga kolosingo viavo. Nda va petamela kuenje nda va ĩha okulia.

⁵ Va tiukila kofeka ye Egito kuenje Asuria o linga Soma yavo, momo va likala oku pongolokela kokuange.

⁶ Osipata yi kundula vovaimbo avo, yi nyõla ovikundiko violombundi viavo kuenje yi va lila vovikolo viavo,

⁷ Omanu vange va likapela utima woku litepa lame; oco va kapiwa okanga kuenje lomue o va yupa.

⁸ A Efarimi, ndi litepa ndati love! Hu eca ndati, a Isareli! Nẽla ndati oku ku kundula ndeci nda linga la Adimah! Nẽla ndati oku linga love ndeci nda linga la Cevoyi! Utima wange ka u tava, ohenda yange yi tumbuluka loku omboka.

⁹ Si lingi vali eci onyeño yange ya simile oku linga. Si nyõli vali Efarimi. Momo ame ndi Suku, ame simunuko, haime ndi kola pokati kene kuenje siya oku nyõla.

¹⁰ Va kuama Yehova kuenje eye o koma ndohosi. Ocili muẽle o koma, kuenje omãla vaye tunda kutakelo, veya loku luluma.

¹¹ Va tunda ke Egito, veya lonjanga ndoku pãlãla kuolonjila, pamue kuolopomba vi tunda vofeka ya Asuria, kuenje ndi va tiula vali volonjo viavo. Oco ca popia Yehova.

¹² Efarimi, ame wa ñualĩsa luhembi, lepata lia Isareli lia ñualisa lelimbi. Yuda puãi, lopo wa kũlĩhĩwa la Suku haeye wa sunguluka ku U o kola.