HOSEA 10 - Embimbiliya - Bíblia Sagrada em Umbundu

¹ Isareli uyuva wa salala, wimaima epako liawo. Ndokulua kuepako liaye haico a luisa ovotala aye. Ndeci ofeka yaye yamamako haico wa posuisa olongunji viaye vi kola.

² Utima wavo we yuka uhembi, oco va yambuiwila ongole yavo. Yehova o nyõla ovotala avo kuenda o teya olongunji viavo vi kola.

³ Cilo ka va kambi oku popia vati, Ka tu kuete osoma momo ka tu kuete usumba wa Yehova, kuenje Soma o tu kuatisa ndati?

⁴ Va popia ño olondaka viaño. Va lisila ovisila viesanda. Oco oku tetulula kuavo kua soka ndovimbuandu violunjuanjua vi tunda tunda vovipanga viovepia.

⁵ Olonungi via Samaria vi lulumĩla onãle ya Betawene. Omanu vaco va yi lilila kuenda ovitunda vi yi liyeyela. Vi lilila omo ulamba wayo wa tunda.

⁶ Onãle, oyo muẽle, yi tualiwa ka Asuria ha yi lingi ombanjaile ku Soma yinene. Efarimi o kutisua osõi. Isareli layevo o kutisua osõi mekonda liociteka caye.

⁷ Osoma ya Samaria yi taka ndokacinjula kilu liovava.

⁸ Olonumbuko via Avene, havio ekandu lia Isareli, vi nyõlẽha. Kovotala avio ku tundila olosongo lososo. Va popia lolomunda, vati, Tu tuviki, kuenda loviwulu, vati, Tu kupukili.

⁹ A Isareli, tunde koloneke via Givea wa linga ekandu. Wamamako lalio. Ovita he, ka vi va sangi vo Givea?

¹⁰ Ame ñatukila omanu vange va huka oku va yambula. Vakualofeka va vongolokela eci va yambuiwila akandu avo avali.

¹¹ Efarimi wa kaile onãle ya pokuisua hayo ya solele oku sasa, kuenje nda popela osingo yaye ya posoka. Cilo puãi Efarimi ndu kapa okanga. Yuda layevo o lima losialuwa, Yakoba o lisosomuĩla ovimu.

¹² Likulĩlĩ esunga, lomboli ocisola ka ci pongoloka. Sosololi ocisoso; momo otembo yeya yoku sanda Yehova okuti iya, o vu lokisila epopelo ndombela.

¹³ Wa limi esanda kuenje wonguli evĩho, haene wa li epako liuhembi. Momo wa koleli akalu ovita lolohoka viene vialua.

¹⁴ Oco pokati komanu vene pa yevala onjuvungo yovita, kuenje olombonge viene viosi vi nyõlẽha, ndeci Salamane a nyõla Betevele keteke liovita. Olonjali viakãi via nyanyõhaila kumosi lomãla.

¹⁵ Oco muẽle, ci lingiwa lene, apata lia Isareli, mekonda lievĩho liene liakahandangala. Osoma ya Isareli yi nyõlẽhẽla pe vekungukungu.