HOSEA 1 - Embimbiliya - Bíblia Sagrada em Umbundu

¹ Ondaka ya Yehova yeya ku Hosea omõla a Beheri, kovava a Usiya la Yotama la Ahasi kuenda Hesekiya, olosoma via Yuda, kuenda kovava a Yerevoama omõla a Yowasi, osoma ya Isareli.

² Kefetikilo, eci Yehova a nola Hosea ha lingi uprofeto, oco Yehova wa popia la Hosea, hati, Kuende, ka kuele ukãi ocipuepue loku cita laye omãla, momo ofeka ya limba calua kupuepue poku litepa la Yehova.

³ Oco wa enda, wa kuela Gomere, omõla a Divilayimi, yu we mina kuenje wo citila omõla ulume.

⁴ Yehova yu wa popia laye hati, U luka Yesirele, momo hasimbuko kuenje ndi fetuluinyila onjo ya Yehu osonde ya Yesirele. Nyimũla usoma wepata lia Isareli.

⁵ Eteke liaco ohonji ya Isareli ndi yi teyela vocimbota ca Yesirele.

⁶ Gomere we mina vali kuenje wa cita omõla ukãi. Yehova wa popia laye hati, luka Kasangiohenda, momo si kuatela vali epata lia Isareli ohenda. Si va ecela vali.

⁷ Epata lia Yuda puãi ndi li kuatela ohenda. Ndi va popela la Yehova Suku yavo. Si va popela lohonji pamue losipata, pamue lovita, pamue lotuvalu, pamue lava vakuakuendela kotuvalu.

⁸ Eci Kasangiohenda a sumũha oco Gomere we mina vali, wa cita omõla ulume.

⁹ Yehova wa popia hati, U luka Hamanuvangeko momo havumanu vangeko, lame si Suku yeneko.

¹⁰ Kaimo omãla va Isareli va ka lua ndeseke liokalunga, okuti oku li yonga ka ci tava, ndaño oku li tenda. Kuenje kuna va sapuililue hati, Hamanuvangeko, haiko va sapuilua vali, hati, Vumãla va Suku yomuenyo.

¹¹ Kuenje omãla va Yuda lomãla va Isareli va likongela pamosi. Va kapa osoma yimosi. Veya vali kofeka yavo, kuenje eteke lia Yesirele li linga linene.