HAVAKUKI 3 - Embimbiliya - Bíblia Sagrada em Umbundu

¹ Ocisungo cuprofeto Havakuki cimbilua kumue lovisikilo violosipa.

² A Yehova, nda yeva oluhimo luove, lupange wove, a Yehova, ndu sumbila. U wamaisa pokati kanyamo. Pokati kanyamo u situlola. Vonyeño ivaluka oku linga ohenda.

³ Suku wa tunda ko Temani U o kola wa tunda komunda ya Parana. Ulamba waye wa sikĩlila ovailu. Oluali lue yuka esivayo liaye.

⁴ Okunina kuaye kua tua ndocinyi. Peka liaye pa tunda olosongo vi ndelenga, haipo pa wundisilua unene waye.

⁵ Efengi lio pitila kovaso, kuenda uvei wo kuama konyima.

⁶ Eci a talama wa seteka ongongo. Eci a vanja wa tuñunya olofeka. Oco olomunda via sandoka, loviwulu via tunda ka ku ci via petama. Ovio haivio ovituwa viaye tunde kosiahũlu.

⁷ Nda mõla olombalaka via Kusiana okuti via totoloka, lolongumbo viofeka ya Hidiane okuti via luluma.

⁸ A Yehova, wa temẽla olondui? Olondui muẽle wa temẽla? Ele okalunga ka ku temisa eci wa endela kotuvalu tuove, kuenda vakãlu ove eyulo?

⁹ Wa nyañula ohonji. Wa pambekela usongo. Wa tola ongongo lolondui.

¹⁰ Olomunda via ku mola kuenje via saluka. Etande lia pitahãla. Alondo a kaluka, a tumuĩla kilu ovaka ao.

¹¹ Ekumbi losãi via talama vocitumãlo cavio, momo via mõla okundelenga kuisongo viove eci via pita, via mõlavo aliangalianga okunina kuonjelia yove.

¹² Wa pita volofeka, Nduli! nduli! lonyeño yove. Wa kosa olofeka loku tema.

¹³ Wa tundila eyovo liomanu vove leli liolombuavekua viove. Wa nyõla onjo yondingaĩvi toke ovawe ociseveto a mõlẽha.

¹⁴ Lovonga ove muẽle wa toma ovitue viavakuavita viaye, haivo veya ndocipepe oku ndi sandula. Veya lonjolela oku lia olosuke uyombeki.

¹⁵ Wa kosa okalunga lotuvalu tuove. Akimba ako a litasola.

¹⁶ Nda ci yeva kuenje etimba liange lia luluma. Omẽla wange wa titimĩla ondaka. Okuvola kua wila vakepa ange. Oku enda ndi luluma. Nayilĩli lutima wa tula eteke liohali liya kuava va tu katukila.

¹⁷ Ndaño ukuyu ko yovi, pamue uyuva ka wimi, ndaño koliveira ka kuiya apako, pamue kovapia ka ku tundi okulia, ndaño vocunda ka mũli olomeme, pamue olongombe vocimanga cavio,

¹⁸ haimo njolela Yehova, sanjukila Suku yeyovo liange.

¹⁹ Yehova Suku eye ongusu yange, haeye endisa olomãi viange ndevi viohoha, kuenje o ngendisa kolonumbuko viange. Ca sonehiwila usongui wolonjimbi. Cimbilua kumue lovisikilo violosipa.