HAVAKUKI 2 - Embimbiliya - Bíblia Sagrada em Umbundu

¹ Ñala ño-o kutala wange woku lavela. Ndavekela vombonge. Njimba ovaso si limbuka ndeci o popia lame, leci o ñumbulula kokulisiõsiõla kuange.

² Oco Yehova wa ñumbulula, hati, Soneha ocitumasuku. Ci soneha ciwa kavaya okuti ci tangiwa ndaño lu o lupuka.

³ Momo ocitumasuku eci ci kuete muẽle otembo yaco. Ci yayula oku lingiwa. Ka ci kembi. Ndaño ci tutuvala, ove o ci talamẽla. Ciya muẽle, ka ci cilua.

⁴ Tala! Ukuotima ka wa sungulukile o tokoka, puãi, ukuesunga o muila omuenyo kekolelo liaye, nda o kuamelela lalio.

⁵ Kuenda vali, ovinyu vi kembisa. Ukuepela ka tumãla. Ocipululu caye ca tanda konjembo. Wa soka la Kufa, ka la tẽla. O liongoluila olofeka viosi, lomanu vaco vosi o va tukula hati, Vange.

⁶ Ava vosi hẽ, ka vo yoli epembe? Ka vo tela olusapo, vati, Ngongo yaye! O limuisa ño eci hacayeko. Okusĩlĩha kuaye ka ku popiwa. Cosi eci ci sulila pi?

⁷ Ava nga va silĩhĩwile love ka va katuka ocipikipiki? Ka va pasuka ha va ku lulumisa? Eci ciya ove o linga ohute yavo.

⁸ Omo ove wa punda olofeka vialua, oco omanu va siala va ku punda ove. Va ku pundila osonde yomanu, kuenda ohali wa talisa ofeka lovaimbo la vosi va tungamo.

⁹ U o muisa onjo yaye ipako vievĩho, ngongo yaye! Ndaño u o tumbika ocanju caye kilu ha puluka kohali!

¹⁰ Wa kutisa onjo yove osõi omo wa nyõla omanu valua. Cilo wa lipumbisa ove muẽle omuenyo.

¹¹ Momo ewe liovocimano li vilikiya kuenda ohangalo yi li kumbulula.

¹² U o tunga imbo losonde, ngongo yaye! Ndaño u o seveta imbo lekandu.

¹³ Tala! Ha-Yehova Ukualohoka-ko wa popia hati, Omanu va talavayela ño ondalu, olofeka vi likavisa ño-o olivova?

¹⁴ Momo oluali lu yuka ukũlĩhĩso wulamba wa Yehova ndeci ovava e yuka vokalunga.

¹⁵ U o nyuisa vakuavo kokopo yonyeño yaye, kuenje o va koluisa ha tali epõlõla liavo, ngongo yaye!

¹⁶ Wa kutiwa ale osõi, holambako. Nyuako, ove muẽle. Linga ndociyamba! Okopo yi kasi peka liondio lia Yehova yiya kokuove, kuenje osõi yiya kulamba wove.

¹⁷ Ohali wa talisa Levanone yi ku wila. Okukundula kuovinyama ku ku lulumisa, ndaño osonde yomanu, lokunyõlẽha kuofeka lovaimbo, kuenda olonungi viaco.

¹⁸ Eci omesele ya mala oku songa ociteka, pamue oku tunga ociñumañuma coku itila haico ca linga ndu o longisa uhembi, ovina viaco he, vi silivila nye? Momo, eci omesele yi tunga oviteka ka vi popi, ca lomboloka okuti, ya kolela ovina a tunga lovaka aye.

¹⁹ U o popia lociteka ca songiwa, hati, Pasuka,— ngongo yaye! Lu o sapuila ewe ka li popi, hati, Votoka,— ngongo yaye! Ovio hẽ, vi longisa cimue? Ocili, via lañiwa lulu pamue lopalata, vokati kavio puãi ka muli omuenyo.

²⁰ Puãi Yehova o kasi vonembele yaye yi kola. Omanu vosi vohile kovaso aye.