HAVAKUKI 1 - Embimbiliya - Bíblia Sagrada em Umbundu

¹ Ocitumasuku ca mõla uprofeto Havakuki.

² A Yehova, toke pi ndi likutilila ekuatiso liove kuenje ku yevi? Toke pi mbilikiya siti, Popela, kuenje ku popela?

³ O ndekisila nye evĩho? O mbanjisila nye ahuku? Momo ndete okunyõla lokupunda. Ema lia wenguka. Okuyaka kua katuka.

⁴ Oco ovihandeleko via fa, kuenje esunga ka li mõlẽha vali. Omo vakuevĩho va ñuala vakuesunga ocingonja, oco oku tetulula ka ku lingiwa lesunga.

⁵ Vanji pokati kolofeka! Limbuki! Komõhi loku saluka. Momo ñasi loku linga cimue voloneke viene okuti ndaño cu sapuilui haimo ko tava.

⁶ Momo, tala! Ñasi loku katula va Kaldea, ovo omanu va tema haivo olonjaki. Olohoka viavo viñila volofeka viosi viokilu lieve, ha vi kuata ovaimbo ha-avoko.

⁷ Va kãla, Va linga usumba. Ndaño koku tetulula, ndaño koku sumbila, va linga ndeci va panga.

⁸ Otuvalu tuavo tu kuete olupesi okuti olupesi luongue lu sule, tua tema okuti olombinji vi ñuala ñuala uteke vi sule. Vakuakuendela kotuvalu va endelako lutõi. Ocili, vakuakuendela kotuvalu va tunda kupãla, va pãlãla ndongonga yi yayuila kokulia.

⁹ Vosi yavo veyilila oku punda. Ocinjoko coku va yokokela ca pitila kuosi. Va konga olomandekua ndeseke.

¹⁰ Va pembula olosoma. Va sepula olombiali. Va yola epembe olombonge viosi. Va vi lundikila olondunda loku vi kuata.

¹¹ Oco va pita lolupesi ndofela, va papula ño. Vosi yavo vakuakandu. Ongusu yavo oyo suku yavo.

¹² A Yehova, a Suku yange, a wange o kola, ku kasi hẽ tunde ka ku ci? Ka tu fi. A Yehova, ove wa va nola ha va limbukisa episo. Awe, ove wa va katula ha va yambula.

¹³ Ove ukuavaso a sanjukila lika eci ca yela, okuti ku tẽla oku vanja kevĩho, ci kasi ndati okuti o vanja vanja ño vakuakandu, haive uha ño eci ukuakandu o nyõla vakuesunga?

¹⁴ Momo wa sokisa omanu lolosi viovokalunga, pamue lapuka a yaila posi ka a kuete ombiali.

¹⁵ O vopamo vosi lonjolo yaye. O va kuata luleva waye. O va kongela vowanda waye. Oco a sanjuka loku yolela.

¹⁶ Oco o lumbila uleva waye ocilumba, o timĩhĩla owanda waye insensu. Momo ovio o likuatela lavio eci ca lela, kuenje o lialia elau.

¹⁷ Oco hẽ, endaenda ño oku sukumũla owanda waye? Endaenda ño oku ipaipa olofeka, ohenda lakamue?